L’Angolo de la Wanda – Febbraio 2017 – “Paolo Caliari… el Veronese”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Paolo Caliari… el Veronese

Museo del Louvre… pienon de gente stipà come sardine, tuti a védar (e fotografar) un quadro de 77 x 50 cm serà-sù dentro ’na cassaforte trasparente: la Gioconda. Un capolavoro (gnente da dir), ma pochi i ghe fa caso che tuta la parete de fronte l’è ocupà da ’n quadro de la belessa de 10 metri par 7! E l’è ’n pecà… parché anca le “Nozze di Cana” del nostro Paolo Caliari l’è ’n capolavoro… e così ’desso ve parlo sia del pitor che del quadro.
El “Veronese” (come za in vita el vien ciamà) el nasse ne la nostra çità nel 1528… più o meno ne i stessi ani de Tintoretto (1519) e qualche ano dopo Tiziano, Michelangelo e Leonardo (tuti de fine ’400). Intorno ai vint’ani, finché l’è a botega dal pitor Antonio Badile, el conosse el famoso architeto Michele Sanmicheli (de 44 ani più vecio) che el se le ciapa soto la so protession e ’l le introduse nel bel mondo a Venezia. Lì, tra quadri de Tiziano, Bellini e Giorgione el completa la so formassion artistica. Nel 1551 el consegna la so prima pala (par San Francesco de la Vigna) e nel 1553 el vien ciamà a far de i lavori nel Palazzo Ducale. In quel’ocasion el conosse Daniele Barbaro che subito el ghe dà el cònpito de afrescar la so nova vila a Maser, opera de Palladio. Lì el “Veronese” (ispiràndose forse a i “Trompe-l’Oeil” del Mantegna a Mantova) el crea tuta ’na serie de sène tridimensionali: gente che sbircia da le porte, finestre verte, pontesèi con le dòne che varda zo… tuto “finto”: un’incredibile ilusion de prospetiva che stupisse ancora ’desso. Tra l’altro uno de i personagi piturà l’è proprio lu: un so autoritrato.

Villa Barbaro la ghe vèrse le porte a la notorietà: parfin Tiziano el deve amétar che… ’sto Veronese l’è proprio brao. A Venezia intanto Paolo el se specializa ne i “Teleri”. El “Telero” l’è el “cinemascope” del ’500 venessian… quadri imensi, longhi anca dièse metri, con çentenara de persone rafigurà. L’è ’na sfida che al “Veronese” ghe piase. Così a partir dal 1555 el crea le famose “Cene”: ben quatro versioni de la “Cena a casa de Simeone” (se vede che a casa de Simeone se magnava ben!)… tute tele da i 4 a i 8 metri da larghessa; la “Cena a casa de Levi” (dódese metri… l’è a la Galerìa de l’Academia e da sola la val el bilieto), ’n’“Ultima Cena” (che la se trova a Brera) e par finir le “Nozze di Cana”, del 1563.
La tela la vien comissionà da i frati benedetini de l’isola de San Giorgio Magior par èssar destinà (come la famosa “Ultima cena” de Leonardo) al refetorio del convento… anca quelo laòro recente del Palladio. La tela la mostra, in un’ambientassion neoclassica, Cristo (al centro, fermo, unico che varda drito) con atorno un çentenar de persone tute in moimento: musicisti, invitadi, camarieri, sposi… e ghè oviamente el “maestro de cerimonie” che, con aria sorpresa, el sta tastando el vin del miracolo. Le face de i presenti no i è inventade: ghè tuti i “VIP” del ’500, conpreso (me par ovio) el “Veronese” in persona (che ’l sta sonando la viola) in conpagnìa de Tiziano (co ’l contrabasso). Purtropo quando Napoleon nel 1797 el vien in Italia a far rassìa de opere d’arte, el se porta a casa anca questa (tajàndola a strìcole par poder inbalarla mèjo: me vien i sgrìsoli solo a pensarghe!). Come emo dito a l’inissio, adesso la tela l’è al Louvre a farghe conpagnìa a la Gioconda… e dopo dó secoli ormai gnanca a pensarghe de avérghela indrìo!

Tornando al nostro Paolo Caliari, ne i so sessant’ani de vita l’à lassà opere in giro par tuto el Veneto… scominçiando da Verona dove (par esenpio) a San Giorgio in Braida ghè la famosa pala co ’l martirio del santo. L’è a Venezia però che ghè la più alta concentrassion de so tele: ne la sola cesa de San Sebastian (sestier de Dorsoduro) de sue ghe n’è adiritura ’na vintina… più la tonba del pitor, sepelì con tuti i onori vissin a i so quadri, nel 1588.A Verona el “Veronese” l’è stà ricordà nel 1888 con un monumento dove, invesse de èssar rafigurà in piè (come tuti i cristiani), l’è stà scolpì sentà de sbiègo su ’na spece de sgabel ne l’ato creativo de dar l’ultima penelada a ’n quadro. Ovio che i so concitadini (notoriamente “tuti mati”) i à interpretà fin da subito la scòmoda posission come quela de uno che ga de i grossi problemi a star sentà su tuto el dadrìo. El monumento l’è posissionà in ponta a la “giarina” (a dó passi dal Teatro Romano) e l’è ben visibile e conossù da tuti… tanto che quando un bocia el sta sentà storto se ghe dise: “Ma gheto le maroèle come Paolo Caliari?”

 

Wanda Girardi Castellani
Mirco Castellani