L’Angolo de la Wanda – Febbraio bis 1996 – “Febrar… 1996: ano bisesto, ano funesto?”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Febrar… 1996: ano bisesto, ano funesto?”

I ani bisestili i ga senpre avù ‘na gran bruta fama. A sentir me mama, quando che i se presentava sul calendario, gh’èra da ‘spetarse de tuto; teramoti, inondassioni, pestilense, morte, carestìa e via discorendo. Ela, da brava dona previdente, za da la fine de l’ano prima la tacava a muciar roba in dispensa, a cargar la cantina de legna e carbon, a ‘npastar baie de carta, bolle da far fogo e, tanto par tirarse qualche sinpatia in più dal pian de sora, a dir tute le sere, sensa mai sgarar, el rosario. La facenda, a mi, buteleta, la me piaseva poco assè. Dover star-lì, ferma su la carega, a slanbrotar-sù parole in latin, de le quali no’ capivo ‘na madona e che, de conseguensa, disea a la “vateciàva”, l’era ‘n gran stufesso! Naturalmente, de ‘sto mese, la vecia statua de gesso de Sant’Antonio sul so altarin guarnì de fiori de plastica, la andava in restauro ‘na olta a la setimana e tuti i dì al lavagio rapido.
E st’ano, donca, ghe semo! L’ano bisestile el riva, puntual, a febrar, ogni quatro ani; el mese el ga ‘vu 29 giorni ansiché i soliti 28, nel 1992 e po’ el tornarà, dopo st’ano, a ‘verghene 29 nel 2000.
La storia del calendario l’è longa e fadigosa da contar. L’è partì da quel romano, deto “giuliano”, parché dovù a Giulio Cesare. Quelo prima, atribuì a Re Numa, l’era basà su la luna e el g’avea 354 giorni, quindi no’l corispondeva a l’ano solare. Par indrissarghe la goba, ogni du ani se ghe zontava 20 o 21 giorni a partir dal 23 de febrar e de conseguensa ‘sto poro mese el finiva col ‘verghe 43 o 44 giorni inveçe de 28; massa grassia!
Giulio Cesare l’à alora pensà ben de metarghe rimedio e dopo averghe dimandà consilio ai egissiani che de ‘ste robe i se ne intendeva più de i altri, nel 46 a.C. l’à instaurà un novo calendario de 365 giorni, zontàndoghe po’, ogni quatro ani, un giorno dopo el 24 de febrar, come a dir, dopo el 6° giorno da le Calende de marso e sicome el giorno de zonta el cascava apunto nel 6° giorno da le Calende, i l’à ciamà “bisextus” (l’ano, de conseguensa, l’è stà nominà “bixestilis”).
Ma gnanca qua no’ se se catava. EI calendario giuliano el calcolava l’ano in 365 giorni e un quarto, inveçe l’ano solare I’è più curto de circa 11 minuti e 13 secondi. Par questo, nel XVI secolo el solstissio d’inverno l’era portà indrìo dal 21 dicenbre a I’11. Eco alora che è intervegnù, a metar le robe in squadra, papa Gregorio XIII. EI calendario “gregoriano” I’à cusì infine stabilì che fra i ani secolari i fusse bisesti solo quei che se podea spartir in quatro, spostando el giorno intercalar dal 24 al 29 febrar.
Tanti i è i proverbi ligà al mese che, vòltela e mìssiela, el resta senpre el più curto de l’ano. A chi nasse de febrar, par esenpio, se usa dirghe: “febrar, febrarèto… curto e maledèto”.
Carneval a parte, de febrar casca, oltre che la festa de i morosi, San Valentin, al 14, la festa de San Biagio (el 3). ‘Sta festa qua a mi la m’è particolarmente cara parche ligada a la me infansia, a fil dopio. Son cressuda ne la parochia de San Nazar dove che gh’è un splendido altar dedicado a’ sto Santo; altar che l’è po’ la tonba ‘stessa del vescovo de Sebaste che, oltre a èssar el patrono de Maratea, l’è soratuto el protetor de la gola. Conta la legenda che fin che’l vegneva portà a Sebaste par èssar processà e po’ portà al patibolo durante le persecussioni del IV secolo, ‘na dona la g’à portà el fiol che’l se stava sofegando a causa de ‘la resca de pesse che se g’avea incastrà in gola. A Biagio gh’è bastà darghe la benedission parché el butin el fusse salvo. Par questo, ogni ano, se usa, dopo el baso de la relichia, tocarghe la gola ai butini con do’ candele incrosade.
No’ sò se ‘sta usansa la vien ancora rispetà. Sò che ai me tenpi la cesa de San Nazar, par la festa de San Biagio, la se ‘npeniva come ‘n ovo e… finìa la cerimonia, se andava a magnar tuti el cao-de-late da “Checheto” al ponte Nave o a cronparse la tiramola o la rigolissia, i toscanini de sùcaro e la ducamara, al “cafetin” o la suca baruca e i peri coti, su i banchi in piassa.

Wanda Girardi Castellani