L’Angolo de la Wanda – Febbraio bis 1998 – “I MANODOMESTICI”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“I MANODOMESTICI”

A rimissiar çerti ricordi, pararìa che fusse passà, miga 50 ani… come che l’è in realtà, ma meiara.
Picà a un ciodo, zo in càneva, g’ò ancora la mónega, o prèo, che à scaldà i ninsói nei longhi inverni dei me primi ani de matrimonio, quando che i termosifoni i era ancora de là da vègnar e l’unico riscaldamento l’èra costituì da ‘na stua a carbon, sóra la qual, pure, se cusinava. La stua la g’avéa, da banda, ‘na vascheta senpre piena de aqua de bóio e tacà al canon, con i feri par destèndar che i sporséa a ragéra, ‘n cassarel de rame. Tuto intorno gh’èra un fero che’l podéa ‘vérghe varie funsion; sentàrseghe sóra par intepidirse schéna e fondo schena opur destèndarghe quel che no’ ghe entrava nei feri al canon. La stua la g’avéa anca un forneto ‘ndó che, principalmente, se ghe infilava i pié quan’ ch’i èra ingiassà. Me mama la usava, par lustrar i çércoli de la stua, ‘na pastèla color argento che la vegnéa venduda in un tubo, come ancó el dentifricio e l’èra gran onto de gonbio, almanco fin a l’avento del brusador da gas. Beh, ‘sto mobile de fero, oviamente, el funsionava solo da la matina al dopodisnar cusì che quando se andava in leto quel poco de caldin, tegnù-su con qualche bala de carta de giornal, l’èra za andà a despèrdarse su par i muri de la casa e i ninsói, ne la camara distante, i era fredi e de spesso anca mòi.
Ve garantisso che gnanca i boióri de ‘na copia de vint’ani la riussia a cavarghe el lispio!
Eco che alora entrava in sèna el prèo, un arnese fato (scusè el termine che no’ ghe ne cato uno de mèjo) a forma de “mona” par tègnar solevà le coèrte. In meso, su un ripian de banda, se ghe infilava la scaldina co’ le brase. El mio, però, da “manodomestico” l’èra zà deventà “eletrodomestico” parché me papà, eletricista, el g’avéa montà ‘na pigna a resistensa, fil e presa de corente.
De istà ne le fameje “bene” come la mia, andava a riposo stua e prèo e se alsava el sipario su la giassara che l’èra un armareto de legno con l’interno fodrà de aluminio, diviso in du sconparti dei quai, uno con “la carica dall’alto”. In ‘sto qua se infilava ‘na olta al giorno ‘na mesa colonina de giasso. Me ricordo che ala matina presto, prima che me marì l’andasse a laorar, inforcavo la me “Botecchia” e filavo dal masaról.
Par ci no’ lo savesse, el “masaról” l’èra el vendidor de legna, carbon e giasso. El giasso, a colonine, el ghe rivava ancora col scuro su careti tirà da cavai o mussi, da le giassare de l’alta Lessinia, proteto soto ‘na coltrina de paia. El masaról, co’ un gancio de fero el lo tirava-zo dal careto e po’ co’ un puntirol el ronpeva a metà la colonina e el me la infilava ne la sporta. Rivà a casa, mi la metevo nel so buso che’l g’aveva, in basso, un calto de racolta par l’aqua. Quando el caldo l’èra particolarmente rognoso, verséa la sportela e co’ la gratachéca (‘n afàr de aluminio fornì de lama, con el qual, andando avanti e indrio sul giasso, se lo gratava) me faséa la ‘marena… el più de le òlte condida con asedo e sùcaro o sùcaro e limon.
Ma la giassara l’èra za ‘na roba da siori! La magioransa de la gente la g’avèa inveçe la moscaróla; ‘na gabia quadrata, fornì de sportelina, tuta fata de rede fina-fina de fero, incornisà de legno. Se la picava fora da la finestra da la parte andó no’ bateva el sol, con drento la roba da magnar: el buro in te ‘na scudela de aqua, la carne, la olta rara che la gh’èra, tra du piati, la pignatina del brodo vansà e cusì via.
Par lustrar in tera, dopo aver lavà i quarèi, se proprio se voléa se usava la “galera”; ‘na piastra de ghisa pesante, bordà de moleton e fornì de mànego. In casa mia ò sempre visto el fero da stiro eletrico ma in casa de le me amighe se usava ancora la sopressa; ghe n’èra una de fero, fata tuta de’n tòco, da scaldàr sora la stua (e …causa el lustro color argento, spesso dopo stirà, le camise se dovea rimètarle in lissia) e ghe n’èra n’altra più conplicada, drento la qual se podéa mètarghe le brase.
La cafetiera, l’èra la solita “napoletana” che quando l’aqua la boieva, se la roersava e, come che faséva Eduardo De filippo, parché no andasse desperso el profumo, se ghe infassava el beco co’ un capuceto de carta.
Par far a tochéti le verdure, miga gh’èra el “robot”. Gh’èra la “mesaluna” ; un cortel tondo con un mànego par parte che, paraltro, l’andava benon e, par el cafè, crompà senpre in gran e spesso anca da tostar …el masenin!
La “lavatrice” e la “lavapiati” i èra costituide; la prima, da ‘na brenta de stagno, da ‘na brèla e un bruschìn e la seconda, da ‘n seciàr de piera, un cadin de fero smaltà e ‘na pesséta. Gh’è da zontarghe che, in çità dove no’ gh’èra vasche o fossi, par i ninsói funsionava Avesa. Infati, tute le setimane passava el caretin de le lavandare che toléa-su la roba da lavar par riportarla lavà e piegà la setimana dopo. Le lavandare le usava far in parte a la roba un segno de riconossimento col fil rosso. A Avesa, le done le lavava nel Lorì… po’ le traèva sora co’l lissiasso (sénar calda) e le destendeva al sol. Me le ricordo ancora le destese nei campi… sora fili chilometrici tirà-su su dei pali! I ninsòi che sbateva nel vento i pareva candide vele in un mar roersà!
Adesso gh’è tuto de eletrico e eletronico e no’ se fa più nissuna fadiga, gnanca quela de lavarse i denti parché l’è eletrico parfìn el spassolin e noialtri semo deventadi tuti schiavi de le machine e fiapi come ‘na pèl de figo… fiapo.

Wanda Girardi Castellani