L’Angolo de la Wanda – Gennaio 1996 – “El color de Verona – Òcio, che doman pióve!”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“El color de Verona – Òcio, che domàn pióve!”

Se capitè a Verona, da le parte de Corso Porta Borsàri, provì a fermarve na s-ciànta a la piera de San Giovani in Foro, l’igrometro de la me çità, e dèghe na bela sfregolada; se l’è umida, òcio, che doman pióve. Se inveçe l’è suta, metì pura in cantier la gita sul lago o ai monti che’l tenpo el farà pulito. I giovani de sta usansa no i sà na Madona e se i ve vedarà a far sta operassion, come minimo i ve scanbiarà par n’inbriago ma i veci de passaio, quei si, i trovarà el coraio de ripètar, drio de voialtri, un gesto fato meiàra de òlte… ilo tènpore e mai desmentegà. Çercar de tuto questo un fondamento storico, l’è inutile; a trasformar la piera in igrometro g’à pensà la tradission, ma vedémo de farse almanco n’idea del parché i nostri noni i l’à invià. Se trata de’n sarcofago atribuì ai Castelbarco. Sóra gh’è un tabernacolo da le cusbidi gotiche che’l contien la figura del Cristo coi brassi verti come quel del monte de pietà, (sto ultimo però i brassi verti el ghe l’à par de fóra. ‘Pena drento gh’è el stesso Cristo ma coi brassi seradi-inciavà; meditate, gente!). Nei du spèi in basso, da le parte, gh’è Maria e Giovani contro un sfondo laorà a cape. Tra ste do figure, n’epigrafe: “ANNO DNI/ M.C.LXXII/ CONBUSTA EST/ CIVITAS VERONE” e in un restauro del canpanil, in prinçipio de sto secolo i à catà i resti del teribile incendio. El sarcofago el porta scolpida na croçe in meso a du stemi. Gh’è però un retangolo de marmo, tuto udo, come incornisà, del qual no se capisse el motivo e propio in sto punto de dimanda che no cata risposta se pol individuar el parché de l’uso che la gente ghe n’à fato. De fronte a l’inutilità de sta sovrastrutura la fantasia popolare la s’à scadenà. La posission a la portada de man e l’umidità che ghe vien trasmessa forsi dai matoni de la fassada, i è bastà a rèndar la piera de san Giovani in Foro cara e pressiosa ai veronesi che i à finì col trasformarla in un strumento infalibile par i eventi meteorologici; mèio dei cali! Con quela “del diaolo” de la catedral de San Zen (quela de Re Teodorico drio al cervo dai corni d’oro, che i buteleti i sfrégola con un sasso par sentir spussa de zolfo) la piera de san Giovani in Foro l’è la pì curiosa de Verona. Cissà mai quante mane l’avarà caressada! Ancora ‘dèsso, da ani desmentegà, se la vede in mèso più neta e più lustra. De sicuro tante volte l’avarà tradì la fiducia prometendo sol prima de piove a séce roèrse o aqua ‘vanti a periodi de suta. Ma tanto, el popolo el g’à fìsse le so tradissioni e le so rosàrie e no’l se lassa smontar da qualche delusion. Spesso l’è stà anca bidonà dai proverbi che i è definì “la sagessa dei popoli”: Quando piove el dì de l’assensa par quaranta dì ghe ne sémo sensa – Sol su l’ulivèla, aqua su la brassadèla – Quando piove a san Gal, aqua fin a Nadàl. Par no parlar de le usanse come quela de mètar fóra da la finestra na botilia con dele ciare de ovo nela note de san Piero che, se le se condensa in na forma simile a na barca a vela, vol dir che ghe sarà na bona stajon (da quando me mama no la gh’è più ò proà tante òlte a ripètar sto esperimento ma no’l m’è mai riussì come quel’altra dela çeola taiada in dodese fete (i mesi de l’ano) ogniun con un gran de sal; ogni mese se andava a controlar se’l gran el s’èra o nò desfà e se ricavava auspici boni o manco). Ma tornando a la nostra piera… quando che passo de là me diverto da mati a sfregolarla e pò’ a guardar in su. Dopo un poco gh’è almanco 5 o 6 altri pìfari che i se ferma col naso parària, dopo aver tocà anca lóri la piera sensa gnanca saver el parché. Naturalmente, a mi no me par gnanca vera de podèrghe far lession. Ma la storia no la se finisse miga li. Nel canton de sinistra gh’è un segno che’l mete in luce la levegadura del marmo, beh… postandoghe la man se g’à l’iluminassion come el Budda e s’è, in quatro e quatr’oto, in grado de risòlvar un dubio o de vèdar saltar fóra na verità sconossuda. Come se no bastasse, fasèndo pirlar la pónta de l’indice in un crèpo del marmo se pol pura catar el vero amor. Corajo… provèmoghe tuti che no l’è mai massa tardi.

Wanda Girardi Castellani