L’Angolo de la Wanda – Gennaio 1997 – Poesia dialetal veronese, in marcia verso el… domila”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Poesia dialetal veronese, in marcia verso el… domila”

Anca a Verona de poeti moderni in campo dialetal ghe n’è pochi e, Diograssia, l’è za quasi un miracolo no’ dover dir che no’ ghe n’è gnanca uno.
Ci-sà parché, anca a le porte del domila, generalmente quando qualchedun afronta ‘sta nostra arte, i temi che’l mete a “tapeto” i è quei ligà al passato (spesso remoto), a la nostalgia de le robe andade; gioventu, usanse fameiari e via discorendo. Quasi sempre, po’, gà da èssarghe la rimeta facile. Quanto a la metrica, quela che vien zo mèio l’è l’otonario; el metro del “coriere dei picoli”. Par no’ parlar de la sintesi che spesso no’ i sà gnanca andó che la stà de casa; infati, par dir conceti che se podarìa sbolognar in du versi, i ghe ne infila ‘na çinquantina faséndoghe vègnar, durante l’immancabile susseguente letura, la barba de Canela al pòro publico, la parte del qual che s’à sistemà prudentemente ne le ultime file, par metà la fà subito “féte” sbrissiando a drio i muri come tante spie, nel mentre quei che resta i taca un pisoléto, ronchesàndo de bruto.
El belo l’è che quei stessi poeti, po’, quando par caso i se mete a scrìvar in ‘talian, de solito i cambia registro e argomenti.
Beh, tuto ‘sto preanbolo l’è par parlar de du nostri poeti che inveçe, non solo i ghe fà onor a la poesia in lengua veronese ma a la poesia in general; PIERO SARTORI e ELENA PICCOLI FALEZZA, rispetivamente, el primo, vicepresidente del Cenacolo e quel’altra segretaria.
PIERO SARTORI l’è fiol d’arte in quanto so papà l’è stà’ el noto avocato Angelin Sartori, poeta e principe del nostro Foro.
Ma ci se spetasse de trovar nei versi de Pietro ‘na qualche someiansa con quei del papà, el restarìa deluso… o, mèio, piasevolmente maraveià. Piero l’è un poeta unico, moderno, pien de idee nove, una più splendida de l’altra, sior de ‘na fantasia che la pàr ‘na póla de aqua fresca e ciara, che rùgola da çime alte, infinide… zo-zo, verso oceani de armonie. ‘Na póla che pàr destinà a no’ sugarse mai. Par tanti ani, forsi sofegà da la personalità de Angelìn, l’à seità a scrìvar inbusando po’ le so òpare in t’un calto… po’, qualche ano fa, l’à trovà finalmente el coràio de vègnar fóra, e da quel momento praticamente in tuti i concorsi triveneti se l’à visto ai primi posti. La so Musa l’è instancabile; el scrive ‘na diesina e più de poesie a la setimana e no’l ghe sbàlia un colpo!
Come omo, l’è un teramoto! Esuberante, alegro, generoso, amante de la bona tòla e de la compagnia ma anca pronto a ciapar fógo e magari a alsar la voçe, par po’, subito dopo, tornar tuto d’un colpo chieto come un lagheto de montagna, far de tuto par farse pardonar… ànca quando che l’avéa ostregà con sacrossanta rason.
E passemo a la ELENA PICCOLI FALEZZA.
L’è la bela de la coàda! Giovanissima no’ la d’è mia… ma la par senpre ‘na buteleta. Descrivarla? Forsi bastarìa vardar a fondo un ritrato picà nel so saloto, òpara de’n noto pitor veronese; ‘na faceta che tenta un soriso ma solo a metà, dal naso in zo. Più sóra… du oci splendidi ma de ‘na malinconia cusì profonda da strucar el cor.
Eco, la ELENA l’è tuta lì, in quel ritrato che un artista, che savéa evidentemente lésar anca sóto de le righe, el g’à impiturà.
Come poetessa, anca ela l’è aparsa su la sèna veronese abastansa de recente; verso el 1978/79.
I so temi i è generalmente spolvarà de malinconia ma gh’è drento ‘na dolcessa che incanta e tanta, tanta pietà verso tuto e tuti.
El metro l’è sempre lìbaro; l’unica roba lìbara, forsi, de la so vita. La scrive da dona rivolta spesso a le done de le quali, traverso el filtro de la so stessa anima e de la so esistensa, la capisse i dolori, i problemi de ieri e più ancora quei de ancó.
Diversi e importanti i premi e i riconossimenti triveneti ma i podarìa èssar de più se no’ fusse che la Elena, contrariamente a Piero, l’è pitosto introversa e anca schiva, specie tratandosse de le so poesie; finestre su la so anima. La dise che mandar ‘na poesia a un premio l’è come mandar un fiol a un concorso de belessa o come passar, sensa vestiti adosso, soto le forche caudine de gente che, magari, i è in grado de giudicarte par soravìa de la pèl… ma solo raramente de capir quel che stà sóto.

LA POESIA DIALETAL IN MARCIA VERSO EL… DOMILA

SECONDA PARTE

L’altra òlta ò parlà de Piero Sartori e de la Elena Piccoli Falezza. ‘Dèsso voi farve conóssar i altri dú “moschetieri” de la poesia moderna veronese. A èssar un fiantin imodesta, podarìa infilarmeghe drento anca mi, ma i moschetieri i era 4…, quindi, lassemo stàr la quinta (tanto, me conossì tuti) e po’, visto che son tacada a la metrica come l’edera al muro, propio-propio moderna no’ me definiria, almanco par quel che concerne la forma.

MICHELE GRAGNATO-

“Profe”, giornalista, titolar del “canton de Verona”; pagina cultural de “L’ARENA” e altro Vice Presidente del Cenacolo.
L’ò conossùdo nel 1969, o zo de lì, a Boscocesanova in ocasion de’n premio de poesia. L’avéa ciapà el 1° premio co’ ‘na roba, par quei tenpi, rivolossionaria: “Quando te me disi…”. Michele l’èra el più giovane de la coà e come poeta l’à lassà tuti un fiantin perplessi; no’ i èra bituadi ancora al metro lìbaro e a çerti concéti, almanco ne la poesia dialetal! Anca mi, paraltro, in quel’ocasion avea ciapà un premio par ‘na poesia sgancià da metrica e rima su un tema altretanto rivolussionario: “Tiro al volo”; ‘na protesta contro quel “sport”; barbaria da medioevo.
Beh… la maniera de far poesia de Michele Gragnato l’è “tuta sua”; el se esprime, in un lessico spesso arcaico, senpre eficacissimo e in genere par enblematismi. Tantissimi, anca par lu, i premi!
Oltre a varie pubblicassioni su la storia e i monumenti de Verona e la so provincia, l’à dà a le stampe un libro de poesie dialetali dal titolo “Caino e la luna” co’ la prefassion de Gian Paolo Marchi. La poesia che vèrse la publicassion l’è:

“CAINO & C.”

“Caino, el paìn (contadino)
che’l sapava la tera
che’l voltava le slope
che’l somenava el gran.
Caino
bruto, slosso
tegnisso come solo i pitochi,
cain.
E Abele
che’l sonava el pìfaro
che’l parava le pégore
che le faséva “beee”
voléndoghe ben za.
Fra el cel de Dio
e l’inferno dei omeni
gh’è ancora ‘na vosse che siga
da alora
soto la luna
e par i sgrémbani del mondo,
che ne và a manghel (questua) la rassa!”

GIOVANNI BENAGLIO-

Uno tra i più giovani del nostro cenacolo. Funsionario de banca e, nel Cenacolo, solerte, preciso e severo cassier.
Poeta moderno anca lu, con temi atuài. El gà anca el pregio de la sintesi; ‘na qualità che no’ se incontra spesso.
Tanti i premi. Qualche òlta nei so versi se ghe cata ‘na vena satirica che sgrafa sotovento con inteligensa e, come gò za avudo modo de dir, far de la bona satira no’ l’è da tuti; barselete in rima se ghe ne lese tante, qualcheduna parfin dei tenpi de me nono, spaciada par novità, ma versi come el sà farli Giovani, l’è ‘n altro par de màneghe.
El nostro Benaglio l’è, quindi, un poeta con tante corde al so arco e tute ben acordade. El scrive anca in ‘talian ma personalmente el me piase de più quando che’l usa el splendido strumento linguistico de casa nostra.
No’ so da quando el se dedica a la nostra arte ma da come ‘l sà destregiarse la so Musa sóra un fòio, penso che la poesia el ghe l’abia nel sangue fin da la cuna.

“LA MONDINA”

Supiaa sul lanternin el solito
rumar straco
e nel silensio parea pì stroo (buio)
che’l stupido star lì
a rimissiar le carte
de ‘n altro tenpo.
L’èra un ricordo garbo,
ingossà,
che strapegaa un canto patìo
e mai finio.
Altro no’ se podéa alora,
a testa in zo,
nel borbotar sordo de l’acoa
infumentà de cora,
col lustro can dei paroni
a far as-cia cornisa.
Supiaa sul lanternin un fil de aria
apena.
Ma su la periana spetaa istesso
el vecio capel de paia.
Come fiapa ligaora,
l’èra lì a strangossar ancora
na sginsa de sol.

Wanda Girardi Castellani