L’Angolo de la Wanda – Gennaio 2001 – “Par el GIUBILEO, A ROMA CO’ LA CORALE DE GREZZANA”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Par el GIUBILEO, A ROMA CO’ LA CORALE DE GREZZANA

El nostro coro polifonico l’è formà da 30 elementi e, pur no’ avendo nissun de noialtri studià canto, soto la guida sapiente e apassionà del Maestro Franco Chiavegato s’avemo guadagnà in 20 ani de atività, un posto d’onór tra le corali venete anca par el particolàr repertorio de brani, oltre che italiani, russi, polacchi, tedeschi, francesi: Palestrina, Bach, Beethowen ecc…
A Roma, a cantar ne la basilica de San Piero, gh’èrimo za stadi ani fa, ma alora no’ l’èra l’Ano Santo e nissun de noialtri pensava de poderghe tornàr, specie co’ ‘n invito rivà propio dal Vaticano! Cantàr, e solo noialtri, in ‘na grande messa oficiada ne’ la prima basilica dela cristianità? L’emossión, l’entusiasmo, la paura de no’ èssar a l’altessa n’à inpenì el cor e la mente.
L’esperiensa, pò’, la n’è parsa cusì grande che avemo volù condividarla con tuto el paese e cusì semo partì con dó coriere, piene come ovi, a l’alba de domìnica 19 novembre; anno domila. Durante tuto el viàio s’à respirà n’aria de festosa amicissia tanto che gnanca se n’èmo acorti del longo masenàr de chilometri, specie noialtri del coro, ocupà e preocupà a far del nostro mèio par farghe passàr el tempo ai amissi “ospiti” grezzanesi ofrendo panetini, vin de la Valpantena e torte fate in casa.
Prima de rivàr a Roma avemo distribuì a tuti un baretìn rosso ornà del nostro stema; un’idea, tra l’altro, par no’ pèrdarse in meso a le meiàra de altri pelegrini.
Par darghe completessa al pelegrinagio, semo messi in coa par passàr la Porta Santa. Za da l’inissio de la fila (che la tacava a formarse a metà de la piassa) semo entrà a far parte dela longa marea de gente rivà lì da ogni cantón de mondo. Tuto intorno se incrociava ne l’aria n’infinità de linguagi e se capiva de far tuti parte dela stessa idea; ‘na fede cusì viva e presente da farne far un’ora e mèsa de coa con passiensa e compostessa. Tuti in silensio, ne l’intima orassión, sentevimo el bisogno de dimandàr perdono e soratuto se sentiva d’èssar perdonà. A passàr quela porta Santa l’è stà’ come rinovàr le promesse del batesimo, lievità dala cossiensa che l’èssar adulti ne inpone.
Noialtri coristi, pò’, semo andà a pareciarse nela cantoria dela capèla dela catedra de Piero, quela subito drio l’altàr del Bernini, sormontà dala vetrada co’ la colomba del Spirito. Soto le splendide volte dela basilica semo sentidi picoli, persi nela maestosità dela bimilenaria storia cristiana; picoli e quasi spaentà!
La messa l’è scominçià col canto: Inno al Creatore (Beethowen) e a questo è seguì : L’Alleluia (Mozart), Octhe Nash Kedrov (Padre nostro in russo), Sancus (Bach), Tebe Poem (Rachmaninoff-canto in russo), Ave verum corpus (Gounod), Ach herr, lass dein lieb engelein (Bach, dalla passione secondo S. Giovanni). La scelta dei canti l’à vossù dar un segno de l’universalità dela Cesa; ‘na dimostrassión dela sconfita del maleficio de Babele.
L’è stà’ ‘n emossión védar intorno tanta gente iutà nela preghiera e nela riflession dale nostre voçi e anca questo à dà un senso a tuta la fadiga fata. Ala fine, tante persone s’à fermà a conplimentarse e a ringrassiarne; gente semplice ma anca preti e altri religiosi che, entusiasti, i n’à dimandà de tornàr ancora.
Fóra, ne la grande piassa ancora piena de pelegrini in coa par la Porta Santa e spetando l’orassión dela sera, la Roma dela cristianità la n’à saludà co’ la maravèia del só tramonto; ‘na luce azura che la inondava tuto… n’aria calda e legera che caressava la pèle e speruciava i cavéi. La basilica, sapientemente inluminà la n’à parso come la concretisassion de’n sogno massa belo par èssar vero. Nissun de noialtri l’avarìa vossù lassar quel lógo de paçe, de spiritualità e de belessa, conpletamente inmagà dala magia che Roma la esercità da meiara de ani su tuta la gente. Ma el ciel zà el se vestìa del tabàr moro de la sera e el viaio de ritorno a Grezzana l’èra longo. Pur se svéi da ‘na brìgola de ore, nel pulman el boresso l’è stà’ grande e grande anca el gioioso orgolio par quel che èrimo riussidi a far, cusì avemo cantà da novo co’ l’aconpagnamento del nostro entusiasmo.
A la fine, pur se strachi dal viaio e da le tante emossioni, su la piassa granda del nostro bel paese; perla dela Valpantena, s’avemo saludà contenti d’èssar stà’ protagonisti o testimoni de ‘sta giornada unica, memorabile, momento importante par la nostra fede e la nostra storia.

Annalisa Bellamoli Castellani