L’Angolo de la Wanda – Gennaio 2004 – “EL MUSEO PALEONTOLOGICO E PREISTORICO de Sant’ANNA d’ALFAEDO”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“EL MUSEO PALEONTOLOGICO E PREISTORICO de Sant’ANNA d’ALFAEDO”

Generalmente par feragosto ‘na bona parte dela gente la s’à za trasferida in qualche spiaja a meiara de chilometri da casa, ci co’ l’aereo, ci co ‘l treno e ci co’ la machina; ‘sti ultimi incolonandosse par ore tra ‘na marea de altri vacansieri, tuti coti e stracoti, serà  nela só scatola de lamiera, come tante ancùsene soto la massa del sol.
Inveçe, mi, Angelo e i me amiçi Ennio e Luisa Caloi el 15 de agosto, da ani usemo spostarse  si e no de ‘na trentina de chilometri, generalmente tra i monti dela nostra Lessinia, in çerca de onbria ma soratuto dei tesori del nostro teritorio, tesori che tanti nostri concitadini gnanca i sa ch’i esista!
St’ano, 2003, semo andadi a visitàr un museo tra i più bei e ben organisadi ch’emo visto. El se trova a Sant’Anna d’Alfaedo a du passi dal Corno D’Aquilio e altretanti da ‘n’altra maravéia de le nostre parte; la “Spluga dela Preta”, un abisso dal svilupo vertical che interessa ‘na serie de strati: el scominçia in superfice co’ le roce del Cretaceo inferiore e’l toca in profondità quele dolomitiche del Trias. Poco distante; la ceseta dei speleologi inaugurada nel 1970, dedicada a S.Benedetto Abate (patrono, oltre che dei speleologi anca dei architeti e dei ingegneri) voluda par ricordar, con tute le altre vitime de ‘stó pericoloso sport, la speleologa Marisa Bolla Castellani, morta (sposeta da poco e incinta) durante ‘na spedissión. Ma de tuto questo parlaremo in seguito, più in largo!
Par ora, dedichemosse al bel Museo de Sant’Anna inaugurà da pochissimi anni. Struturà in dó sessioni; una dedicà ala paleontologia, co’ l’esposissión dei grandi vertebrati marini ritrovadi nele cave de piera dela zona (tra i quai uno tra i squali più grandi d’Europa), l’altra dedicada ala preistoria con la mostra del materiàl racolto nei loghi presenti sul teritorio del paese, tra le quale selci simili a quele rinvegnude nel coredo de l’omo de Similaunt. E proprio ‘stó qua, ricostruì con tute le só  strasse e i só arnesi, a sinistra, péna dentro al museo, el ghe dà el benvegnudo ai visitadori! El materiàl esposto con ordine e bon gusto, el g’à varie proveniense: el Ponte de Veja, logo magico e sugestivo, architrave d’ingresso de n’enorme caverna carsica croàda (visità anca da Dante e ritrato dal Mantegna nela camara dei sposi nel castel de Mantova), sior de giacimenti de selce. Pò’, le cave de piera dela Lessinia da le quale è vegnù fora i fossili marini del museo. Altri ritrovamenti i è stà fati nele altre nostre varie contrà  con l’apporto, tra i altri, de dú grandi siensiati e me grandi amissi: Attilio Benetti de Camposilvano e don Alberto Benedetti, el famoso prete paleontologo scomparso un par de ani fa.
Interessante l’estrassión e la lavorassión dela piera dela quàl i è fati tuti i copi dele case e parfin, tra le altre, la Sinagoga de Tel Aviv. Tante e splendide le ammoniti el qual nome, secondo Attilio Benetti (considerà el più grande esperto de fossili e tradizioni popolari del teritorio) el deriva da Ammone, el Dio egissiàn dela vita, rapresentado con i corni da ariete che i ricorda, apunto, la forma dele amoniti. Pò’ i greci i l’à ciamà Giove Ammone. ‘Ste splendide conchiglie i è aparse su la tera 240 milioni de ani fa par scomparìr pò’ ala fine de l’era Mesozoica, circa 70 milioni de ani fa. Verona, nei só scalini, nei só marcipié e soratuto sul liston de la Bra (un “mar de piera”, come la l’à ciamà l’indimenticabile poetessa Enrica Gorgeri da Schio) la d’è piena e ghe n’è de cusì grandi da lassàr i turisti a boca vèrta… digo, “i turisti” parché noialtri veronesi de solito, ghe caminemo sora sensa gnanca inacorserse che le gh’è! La visita se l’émo gustà grassie soratuto a Elena, ‘na bela, simpatica, giovane e colta studentessa che la n’à fato da “cicerona” con competensa e straordinaria gentilessa. El museo de Sant’Anna, inserì nela rete museale dela Comunità Montana dela Lessinia (composto da 7 musei) l’è visitabile, previo contatto telefonico al numaro 045 7532656, dale 10 ale 12 e dale 15 ale 17, nei giorni de mercoledì, sabato e dominica (indirissi: e-mail asslafonte@libero.it, lafonte@ciaoweb.it
El bilieto el costa 2 o 3 euro a testa; sconto par ci à passà i 60 ani.
Par altre informassioni: tel. 045 8014987, opur sito internet www.lessiniamusei.it.
Sant’Anna l’è ragiungibile superando la Valpolesela, su, dopo Negrar, Fane, Giare, Prun e via cusì… La strada l’è bela e par gnente dificile.

Wanda Girardi Castellani

NB: Le note ed i contatti per le visite, sono da verificare.