L’Angolo de la Wanda – Gennaio 2006 – “Anca ANDREA CASON, uno tra i più inportanti pilastri de la cultura veneta, el n’à lassà”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Anca ANDREA CASON, uno tra i più inportanti pilastri de la cultura veneta, el n’à lassà.

La bruta notissia la m’à ciapà come el proverbiàl fulmine a cel serén… pensàr che s’avéimo parlà alegramente propio el giorno prima e a la me dimandà: “come stèto?” el m’avèa risposto ..”ben!”

No… no’ voi ancora crédarghe che no’ sentirò più quela só voçe inconfondibile nel mòrbido dialeto trevisàn, che no ricevarò più le só letere sempre spiritose, in risposta a le me, al solito, lónghe “paparele” e che no’ l’incontrarò più, almanco su ‘sta tera! Ghe volevo ben e soratuto lo stimavo. S’èrimo amiçi… da quanti ani? Ghe n’ò perso el conto. In ‘sti ultimi la “vecia guardia” l’è andà via come la neve al sol. Semo restadi in pochi; da Verona… dopo Tolo da Re, solo mi e za pitosto a tochi.
ANDREA CASON mi penso che più o manco i lo conossesse tuti; l’èra uno dei più grandi e stimadi pilastri dela cultura veneta.

Nato el 18 marso del 1920, laureado in pedagogia, publicista e scritór, el se interessava da sempre de storia, storia de costume e dele tradissioni popolari venete. Cultór inoltre de critica leteraria e storia del cine.
Fra i ani 1945 e 50 l’è stado tra i promotori dei grupi culturali “La Rossignona”, “La Torre” e del “Cine club Treviso”, del quàl l’è stà Presidente.
Dal 1952 al 1957 l’à fato parte del Centro de Comunità de Adriano Olivetti e nel 1989 l’à fondado el Centro Culturale “La Fenice”.
L’è stà’ par trentaçinque ani l’ativissimo, inparegiabile Presidente del giornàl “EL SIL” dei poeti dela Marca Trevisana.
Tantissimi i è stadi i premi vegnudi a coronàr la só ecletica arte. Uno anca in “casa mia”, a Pescantina; el premio Lorenzo Calabrese nel 1991.
Ma gh’è da dir che’l se interessava de tuto e l’èra anca bon de far de tuto… parfin de costruìr i buratini. Me ne ricordo uno in particolàr… un diaoléto de legno, stofa e cartón che l’à fato la feliçità de n’amiga comune, la Lucia Cozzolino, che la ghe l’à ancora picà via su un muro de casa.
Tra le tante só publicassioni:
“Un saludo da Treviso” – ediz. Canova, 1973
“Treviso ritrovada” – ediz. Canova 1977
“Poesia trevisana in dialeto” – ediz. Canova 1979
“Come eravamo” – ediz. La Tribuna di Treviso 1979
“10 carmi de Catullo tradotti in dialeto trevisàn“ litog. di Renato Nesi – ediz. dela Galeria 1980
“Quella mia Treviso” (con 83 imagini de Aldo Nascimbeni) ediz. Centro Grafico Editoriàl-Pd… 1980
“Drio de l’aqua” poesie in trevisàn –ediz. T.E.T. Treviso 1985
“Cantarane” – interventi di costume e varia umanità” – Matteo editore –Treviso 1989
ecc.
Inoltre l’à scrito testi par:
“Favolosa Marca” ediz. dela Galeria –Treviso – 1978
“Rustico Trevigiàn” ediz. dela Galeria – Treviso – 1980
“Treviso – Guida ritrato de ‘na provincia” ediz. dela Galeria – Treviso – 1986
“El castel d’amore –Treviso e la civiltà cortese” – S.I.T. – Treviso 1986

Andrea Cason l’à anca scrito diversi testi de cansonete de sucesso. El termine el saria “paroliere” ma tratandosse del “nostro” ‘sta parola no’ la ghe calsa par gnente… quà se pol sempre, solo dir “Poeta” e con la “P” maiuscola!
Tra le tante, una só cansoneta l’à vinto “el Zecchin d’oro” – “Stelina de mar” nel 1963 e un’altra l’à sbaralià tuti i altri in gara al “Musichiere” nel 1960, in “Arena” a Verona con “Un paradiso da vèndar” cantà da Wilma De Angelis” giusto l’ano che ne s’à copà, cascando in un buso del nostro anfiteatro, el presentadór Mario Riva.
Personalmente, ho fato parte con lu de diverse giurie e, su só “mandato” ò organisà a Treviso el concorso par ‘na poesia d’amor – co’ ‘na giuria formà da sole done e verta a soli concorenti òmeni.
Più volte po’ el Cenacolo de Verona l’è stà’ ospite del SIL.
L’ultima volta che son stà in compagnia del me amigo Andrea l’è stà quando le poetesse veronesi, (la Ida Benedetti, la Lucia Menini e le altre “nove leve”) col só “patrocinio” e su só organizassion, le m’à portà a recitàr par l’ultima volta a Treviso, can e tuto !
Quela, a vardàr ben, no’ l’è stà’ solo l’ultima olta che ò visto Andrea e la só romantica Treviso… l’è stà’ anca l’ultimo bel momento dela me vita de poetessa.
Andrea l’è passà dal sono al ”parnaso” del cel ’stó 17 de novembre… in ponta dei pié, co’ la discressión che lo caraterisava. L’è andà via in silensio par no’ disturbàr nissuno da quel “Signore” de altri tempi che l’èra.

Wanda Girardi Castellani

***

RICORDO DI ANDREA CASON (da Wanda Girardi Castellani)

“Non riesco ad annoiarmi, salvo quando sento discorsi di aria fritta, luoghi comuni o stupidità rivisitate, per tutto il resto amo la vita, la bellezza femminile, il mondo, i vecchi, gli alberi, le bestie, la pasta e fagioli, la buona acqua di montagna, ma anche gli onesti vini.”

Così concludeva l’indimenticabile Andrea in un divertente ”Ritrattino di me”  inviatomi nel lontano 1985. quando girava per le vie dell’amata Treviso in sella della sua bicicletta, datata 1946, chiamata dagli amici “Limousine”.
Era (e fatico a parlare di lui al passato) un uomo splendido e un artista eclettico. Aveva, tra le altre, una notevole manualità. Ricordo i suoi burattini e in particolare un drago col quale fece felice un’amica comune, la Lucia Cozzolino; membro veronese della giuria, tutta femminile, di un concorso organizzato da Andrea a Treviso… per soli uomini!
Non riesco ancora a crederci che non udrò più la sua cara voce, inconfondibile nel morbido dialetto trevisano, che non riceverò più le sue sempre spiritose lettere a riscontro delle mie lunghe missive, e che non lo incontrerò più.. almeno  su questa terra.
L’ultima volta che lo vidi fu in occasione di un incontro organizzato “a sorpresa” per me, da lui e dal gruppo delle nuove leve del Cenacolo di Verona. Le amiche mi scortarono a Treviso… ”can e tuto”! Fu un incontro memorabile immortalato dall’obiettivo della Profe. Bruna Brazzalotto…
Io e Andrea ci parlammo al telefono il giorno prima che il Padre eterno lo convocasse nel Parnaso dei cieli. La sua ultima lettera è datata 20 ottobre 2005.
Mi dicono che se n’è andato in punta di piedi, con la discrezione che lo caratterizzava… in silenzio per non disturbare nessuno, da quel “Signore” d’altri tempi che era.
Beh… penso che della vecchia guardia (almeno a Verona) sono rimasta solo io;
Ti prego, Andrea, tienimi libero un posto accanto a te!