L’Angolo de la Wanda – Gennaio 2007 – “GIORGIO FERRANTE nel Futurismo veronese e la só amicissia con Umberto Boccioni”

…a cura di Graziano M. Cobelli

gcobelli05@gmail.com

Quatro Ciàcoe: da Verona

GIORGIO FERRANTE
nel Futurismo veronese e la só amicissia con Umberto Boccioni

L’ò conossudo nel 1949 nel Cenacolo “B.Barbarani” che alora el g’avéa sede al ristorante “Torcoloti”, in via Zambelli. Ma tanto prima de lu m’èra rivà a le rece la só fama de dotór, poeta, scritór e pitór, membro de la “colonia” veronese futurista fondada da Filippo Tommaso Marinetti. Savéa inoltre la storia che ló ligava al più grande esponente de ‘stó discusso movimento; Umberto Boccioni e a la só tragica morte a Sorte del Chievo (Vr.), ‘na località ancó celebre par la ecessionàl squadra de balon.
De Boccioni ghe n’ò parlà su “Quatro ciacoe” de marso 1986 ma sicome da alora è passà vint’ani, sarà meio, par ci no lo conossesse, che torna a riparlarghene, visto che l’è ligà a fil dopio co’ l’argomento “in tola”…
Dunque… Umberto Boccioni, “Re” del futurismo italiàn; la corente artistica de la quàl ò parlado anca in lóngo e in largo, nel numaro de genàr de l’ano passà, l’èra nato a Reggio Calabria el 19 otobre del 1882 e a Verona el gh’èra capità quando da fervente interventista el s’avéa aruolà volontario ne la guera “1915/18”. Dopo de aver conbatù eroicamente su l’Altissimo de Nago con i altri ben conossudi futuristi: Marinetti, Sironi e Santelia, ne l’istà del 1916 l’èra stà, dunque, trasferido al Chievo ne l’artilieria da canpo e sicome a Verona ghe stava de casa só sorela Amelia sposada a un noto professór messicanologo, grande studioso de le civiltà pre-colombiane; Guido Valeriano Callegari, quando l’èra libaro dal servissio el podéa cusì stàr in fameia. Propio in casa Callegari l’à conossù Giorgio Ferrante, giovane studente, allievo del cugnà e aspirante futurista, col quàl, catandose in sintonia parfeta, sia in arte che nel pensiér, l’à streto amicissia tanto più che i g’avéa modo de incontrarse spesso dato che de Ferrante el prof. Callegari el se serviva par farghe aver a Umberto, a Sorte, letere, pachi ecc.
A quei tenpi stava faséndosse un nome nel canpo de la poesia vernacola veronese el nostro Berto Barbarani e le só liriche i era uno tra i argomenti principali nei saloti. Anca in casa Callegari se ghe ne parlava e, Boccioni, incuriosido, l’avéa espresso el desiderio de averghe ‘na copia dei “Du cansonieri”; el primo “parto” del Poeta scaligero. Subito Ferrante el s’avéa inpegnà a portandoghelo de persona, nel dopodisnàr del giorno 16 agosto (1916) a l’ostarìa che ancora esiste a Sorte de Chievo.
Ma el destin, inteso come ‘na logica de l’atività continua, dinamica, de la vita e de la natura, l’à volù che proprio quel giorno Giorgio Ferrante el fusse trategnù da un inproviso inpegno, cusì Boccioni… speta e speta, l’à pensà de andàrghe incontro tolendo in presto (col parmesso del só sargente) un caval. Ma el “nostro”, oltre a èssar un strasso cavaliér el sofriva pura di labirintosi; un disturbo a le rece che pol dar gravi stornisie. Cusì, durante la cavalcada l’è stà sbalsà da séla restando con un pié infilà ne la stafa e quando finalmente el cavàl l’à fermà la só mata corsa el cavaliér oramai l’èra spirà. Me ricordo che quando mi e ‘l pitór, Maestro Luciano Pollini, grande apassionado de tuto quel che se riferisse a Boccioni, emo çercà i ultimi testimoni de ‘stó fato e se semo fati firmàr ‘na dichiarassión da parte de dó done novanteni; quele ‘stesse che quela sera, acorse par çercàr de portar aiuto al pitór, le avea dovù lavarghe la facia insanguenada, par védar ci el fusse. Tute dó, a l’epoca butelòte, le se lo ricordava “tanto belo”!!
Se pol ben imaginar la desperassión de Ferrante quando, rivà finalmente a l’ostaria de l’apuntamento col libro sóto el brasso l’à savù da la parona Maria Bianchi de la disgrassia de la quàl pò’ el s’à dà (ingiustamente) la colpa!
Ferrante l’è morto a 92 ani, nel 1990, e, fin a la fine, ogni olta che vegnéa fora el nome del só amigo Umberto ghe s’à inpenì i oci de lagrime!
El n’à contado che Boccioni l’avéa sognado de morìr conbatendo con el s-ciopo in ’na man e ‘l tricolór ne l’altra… ma che ne la bandiera, istesso, i gh’à involtolà la bara quando, con drio quatro gati, i l’à menà al nostro çimitero dove el riposa ‘rènte a só mama che su la piera la g’à ‘sta scrita comovente : “O adorata mamma, la morte di tuo figlio che ti riposa accanto, spense in te per due lustri moto e parola, non lo spirito vegliante in tragico silenzio”
La piera del “calto” de l’artista l’è inveçe ornà da ‘na grande aquila de bronso (colonbàr numaro 14, secondo ordine, reparto 14) e l’è tuta tenpestà de scrite a matita con le più bele firme del futurismo italiàn: Gino Severini, T.F.Marinetti (autór con Boccioni del famoso manifesto futurista proclamà nel 1909 sul “Figarò, a Parigi), Giovanni Centorbi, Carlo Carrà, Luigi Russolo, Giacomo Balla, Balilla Pratella e naturalmente Giorgio Ferrante.
Sul logo de la disgrazia ghe ‘stà po’ messo tacà a ‘la stacionada che divide la strada da la ferovia del Brennero un cippo comemorativo scolpì da Umberto Bottacini. De la cura de questa, come de la tonba al cimitero, se incarica el Maestro Luciano Pollini che l’è stà anca grande amigo de Giorgio Ferrante.
E proprio in casa de Luciano Pollini ò ritrovà el dr. Ferrante, dopo ‘na vita. L’èra zà avanti ben co’ i ani. Nela grande guera, l’avea fato in tenpo anca lu a aruolarse volontario come uficiàl nel corpo glorioso dei alpini. Tornà a la vita civile e finidi i studi de mediçina, l’avea fato tesoro dei insegnamenti de Boccioni. Prosa, poesia e pitura in lu i è ‘ndà a brasseto co’ la siensa de Esculapio. Tra le só opere più conossude: “Soave migrande”, “Essere atteso”, “l’Angelo”, El “garzón de la giostra”, “Prose”, ”Cuor di brina”, “Essere atteso da te”, “La foresta a domicilio”, ”Saggi di poesia”, “Parole alla madre e al padre”, ecc.
El g’à avudo diversi inportanti riconossimenti e l’è stà’ amigo stimatissimo de Renato Simoni, Leonardo Borghese, Lionello Fiumi, Arnaldo Fraccaroli, Orio Vergani, Lorenzo Montano, D’Annunzio, Barbarani, Centorbi.
Oltre che ne le prose e poesie, Ferrante el g’à avudo ne la pittura critiche lusinghiere specialmente in çerte mostre come quela a la galeria san Luca nel 1978 fata con l’amigo, Maestro Pollini.
Ferrante l’èra un straordinario “cartopittore”; un genio ne ‘sto canpo… parér stanpà anca a grandi carateri da Borghese sul “Coriér de la sera”.
Pecà che a un çerto momento, e fin a la só scomparsa avegnuda nel dicenbre 1990, el s’abia isolà dal mondo… come che’l fusse stà’ su la luna.
I só lavori, paraltro, i è stà’ senpre de’n rigór stilistico… de ‘na modernità assoluda… obedienti a ‘n emossión poetica, intesa come n’ arma de rotura, un potente mèso de evasión dai veci schemi.

El futurismo el gh’èra entrà del tuto nel sangue.

Wanda Girardi Castellani