L’Angolo de la Wanda – Gennaio 2008 – “BON CONPLEANO”

…a cura di Graziano M. Cobelli

gcobelli05@gmail.com

Quatro Ciàcoe: da Verona

BON CONPLEANO

Ogni mese el me calendario perpetuo el me segnala el conpleano de qualche amigo. Par esempio, a novembre ghe n’è stado ben oto. De norma çerco di ricordarmeli tutti, magari soltanto co’ ‘na cartolina o ‘na telefonada!
Ignorando l’esistensa del sudeto calendario tacà in bela mostra sopra il me computer, i più i resta maraveiadi de la me “prodigiosa memoria” e forsi qualchedun che preferiria desmentegarse l’inesorabile marcia “kaiseresca” del tenpo, quando el riceve i me auguri, nel dirme “grassie” a denti stretti, mentalmente el me mandarà po’ a …ff…!
I auguri postali i pol èssar “seri”, cioè scriti su un cartonçìn adornà da ‘na foto o un disegno del lógo da ‘ndó i parte, opura “umoristico”… e qua se spassia da l’umoristico elegante e intelligente a quel pesante che spesso el lassa el segno (vedi quei che maca de bruto su l’età, quando el festegiado el cavalca da tenpo i “anta” e l’è pura scancanà la parte sua).
El “bon compleano” par i inglesi l’è “birthday”, i francesi i lo ciama “anniversaire”, i spagnoli “cumpleanos” ma anca lori, come noialtri, i mete in tola ‘na torta con tante candeline, tante quanti i è i ani del festegiado che’l deve po’ smorsarle co’ n solo supiòn (mi da qualche ano me fasso sostituìr da un ventiladór). Generalmente, specie se a conpìr i ani l’è un butìn, a darghe aiuto supiando fin a farse scopiàr le ganasse, ghe se mete tuti i altri buteleti presenti ala festa sprussando la sudeta torta (zà sbusolada da diverse deàde de “assaggio”) de spuaci. A ‘sto punto, sia che la festa la vegna fata a New Jork che a Camacici o Rosegafero, (tre fameie, çinque vache, du cani e un gato) tutti i presenti in un sgangarado coro i se buta a gola spiegà col “tanti auguri a te…, concludendo col solito: “…parché l’è un bravo ragasso (ragasso ???) e nessuno ne pol dubitàr…!”
Nel mondo, quanto a regài de conpleano, gh’è varie usanze: se te si giaponese e te conpi 61 anni te g’avarè un capèl rosso… Ma la famigerada usansa de regalarghe ai omeni ‘na cravata (generalmente de’n color e de ‘na fantasia da far regatàr) la coerse el 99% de l’intiero pianeta. Par le done se pol spassiàr da un masseto di fiori a ‘n diamante. Mio sio Gino, fradèl de me mama (vedi Q.C. otobre 2000) el g’à regalà a la moiér par el só 50° conpleano dú lussuosi vasi da notte (bocài) in ceramica decoradi con ninfe, fauni e corone de fiori e quel sens’altro come regàl l’è stà’ el più originale (anca e soratuto se ghe cavemo via la “gi”). El belo l’è che prima de ‘stó aquisto l’èra vegnudo a dimandàrme consiglio a mi che no’ m’à parso gnanca vera de poderlo torcolàr… cusì ”perfidamente” g’ò racomandà di star atento che i ghe dasse i vasi con i màneghi giusti; come a dir: uno a destra e quel’altro a sinistra… in maniera de poderli métar nel rispetivo bufeto.
Naturalmente la “racomadassión” l’à fato sbuelàr da le sganassade tute le comesse de botega!
Secondo noialtri veneti Novembre l’è el mese de l’ano più mal visto da le done in quanto: migra i usèi, casca i maroni e, sicome de solito gh’è nebia, no’ se vede un ca…o
Dicembre, inveçe, l’è el mese preferido da le “Teresine” (gay) in quanto “el sera l’ano”.
(San Silvestro, cusì, naturalmente, pa’l stesso motivo l’è el só Patrono).
I nati nel periodo 24 ottobre – 22 novembre, i casca soto el segno del scarpión che l’è quelo che à pónto Orione, el gigante, belissimo fiol de Poseidone (Nettuno) che l’ aveva osado sfidàr Artemide (Diana) la dea de la caccia al tiro co’ l’arco. ‘Desso i è tuti dú finiti in ciel; Orione e el scarpión… uno el scapa e quel’altro el ghe core drio par l’eternità.

El calendario…
dividendo i giorni e i mesi su la base del movimento aparente del sol intorno a la terra, el ne permete de calcolare el tenpo. Disemo “aparente” parché semo noialtri inveçe che giremo intorno a lu! ‘Sta scoperta, come tuti savemo, par un pél no’ l’à mandà Galileo Galilei a rosolarse sul la grèla de la Santa inquisission.
El calendario che ogni primo de l’ano pichemo al ciodo l’è ancora quel in uso ne l’antica Roma più de 2000 ani fa e l’è par questo che i mesi e i giorni i g’à i nomi dei antichi Dei romani, da ‘si qua a só volta ereditadi dai Greci… Carlomagno l’à proà a ras-cianghe via quel saór pagàn e g’à proà sensa sucesso anca la rivolussión francese. El calendario de Giulio Cesare el funziona, da alora, sensa intópi però nel 1582 papa Gregorio Xlll essèndose acorto che col passàr dei ani el registrava un ritardo di diese i giorni, rispetto al movimento (sempre aparente) del sol, par riguadagnàr el tenpo perso, quel’ano s’è passadi dal 4 al 15 otobre in ‘na sola note. Giulio Cesare no’ l’aveva miga inventà el calendario, l’aveva solo perfessionà quel de Numa Pompilio, Re de Roma dopo Romolo. In quel calendario l’ano l’era diviso in 12 mesi par un totale di 355 giorni, ma i era massa pochi! Giulio Cesare alora l’à pensà ben de afidarse a un astronomo e sicome me fiol Flavio no’ l’èra gnancora nato, l’è stado costreto a ripiegàr su un çerto Sosigene che, dopo un “casìn” di calcoli l’à portà el numaro dei giorni anui a 365 con un giorno in più ogni 4 ani… giorno in più che’l casca apunto ogni 4 ani, el 29 di febbràr. L’ano in ‘stó caso el se ciama “bisestile” (o “bisesto”) e secondo l’opinión de la gente…” el porta pure pégola” (scarogna) soto forma de guerre, pestilense, terremoti, debiti e ci ghe n’à più ghe ne meta!”
In compenso quei che nasse in ‘stó giorno i g’à el compleanno ogni 4 ani cusiché i gode de ‘na lónga gioventù e ‘na altretanto lónga tersa-età!! (col che… penso di aver dito ‘na “vacada” forsa-oto… scusabile solo par avèr scolà, a stómego udo, dù goti de Valpolesela).
El nostro calendario el parte da la nassita de Gesù ma pàr che nel calcolo, Dionigi el picolo (un fratin póco taià par la matematica) l’abia fato un sbalio de 7 ani. cosicché Gesù no’l sarìa morto a 33 ani ma a 40 e alora ancó no’ saressimo nel 2007 ma nel 2014 (e la sarìa ‘na busarada).
Ne la Grecia antica el calendario el scominçiava in ‘na data difarente da cità a cità e i mesi era lunari e no’ solari come i nostri.
I paesi islamici i ‘dòpara ancora un calendario lunare basado sul tenpo che ghe mete la luna a far un giro intorno al la tera.
I ebrei, i cinesi e altri popoli asiatici i usa un calendario lunisolare che’l conprende 12 ani de 12 mesi e 7 ani de 13 mesi. I latini come noialtri i faséa duràr el giorno da ‘na mesanote a l’altra. Par I babilonesi inveçe el giorno el verséa botega a l’aurora nel mentre quel etrusco el sbarcava dal leto adiritura a mesogiorno.
In quanto ai ateniesi, come i germani, tuto scominçiava co’ l tramonto.
Tuti i gusti i è gusti !
El nostro calendario, come diséimo, el parte da la nassita de Gesù. Quel ebraico el parte dal 3761 a.C. considerado (mese più, mese manco) l’ano de la creassión del mondo. Quel islamico el parte dal 622; l’ano de l’egira, el trasferimento de Maometo da la Mecca a Medina.
El calendario istituido da la rivolussión francese l’era diviso in 12 mesi de 30 giorni l’uno più 5 giorni. (6 nei ani bisestili) de carnevàl e ’l scominçiava in autuno (vendemmiaio, brumaio, frimaio) po’ vegneva l’inverno (nevoso, piovoso, ventoso) la primavera (germile, fiorile, pratile), l’istà (messidoro, termidoro, fruttidoro) e l’è partì dal giorno della proclamassión della Republica, il 22-9-1792, usà dal 24-11-1793 all’1-1-1806.

Che altro podemo dìr ?
Purtropo el nóvo calendario che va-su el manda automaticamente in sgauiàra quel vecio…
E riva el 2008 a vèrsarghe la finestra a nove speranse inluminà da foghi… canti… bali e sóni ma noialtri vecioti, tra sgrisoloni de fredo, spetemo solo ‘na “nova” carga de magagne e de ràpole a compagnàr el conto che’l se fa sempre più sotìl.

Bah… come disea me pàre; “tiremo avanti!!” (e oò’ sotoventovia el ghe brontolava sóra: “anca se l’èra meio quando che se tirava indrio”)

BON ANO… amiçi de “Quatro ciacoe”

BON ANO (MA PROPIO CON UN “N” SOLO)

Wanda Girardi Castellani