L’Angolo de la Wanda – Gennaio 2009 – “Nel 1909 + sucesso…”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Nel 1909 + sucesso…

La notissia più inportante aparsa sui giornai del genar 1909, l’è quela relativa ai 500 milioni de dolari stansià da l’America par la costrussión del canal de Panama.
In febràr, lassando l’esercito dei só fans sprofondà nel rimpianto, Eleonora Duse la se ritira dale sène… in conpenso al çinque de ‘sto mese era nato Ernesto Calindri destinà a béar un giorno un amaro a un taolìn in meso a ‘na strada tra meiara de italiani cocolà da la speransa de védarlo tirà-soto da qualche camion. Altra notissia de ‘stó febràr… el pitor livornese Amedeo Modigliani, co’ le só done-cigno, el se trasferisse par senpre a Parigi.
La notissia “bonba” de marso l’è invece, sicuramente, quela del giorno 12 quando a Palermo la Mafia la cavà da le spese el polissioto “antimafia” Joe Petrosino; un personagio entrà ne la legenda.
El 30 la Serbia cedendo a le pressioni de le grandi potense, la aceta l’anessión de la Bosnia Erzegovina a l’Austria.
L’april el g’à portà al mondo el futuro giornalista Indro Montanelli e quela che sarà un giorno la siensiata premio Nobel Rita Levi Montalcini.
Intanto in Turchia va a sentarse sul trono Maometo quinto.
E rivemo a giugno. El 26 scopia ‘n insuressión a Teheran contro el Scià Muhammad Alì. ma el 16 lùio in Persia i rivolussionari i otièn de cavarse dai pié el soracitado Scià metendoghe al so posto el fiol Ahmed Mirza.
Intanto la Francia la stapa Siampàgn a gó-gò in onor de Louis Blèriot che col só monoplano, in 36 minuti e 5 secondi l’à traversà la Manega.
Par só conto l’America la ghe regala al mondo la diva Mary Pickford (da quel dì ciamà “la fidansata d’America”) nel film “el liutaio de Cremona”.
In agosto Françoi Faber el vinse el Tour de France. In setembre Trilussa el publica el libro de poesie romanesche “Omeni e bestie” e Filippo Tommaso Marinetti el publica in Francia el primo manifesto futurista.
El 23 de otobre el Zar Nicola 2° el va farghe visita a Racconigi al nostro Re.
El mese dopo; novembre … el nostro grande Guglielmo Marconi, el ghe conquista a l’Italia ‘n altro premio Nobel par la fisica. Su le sène dei teatri italiani trionfa le compagnie de Ruggeri Dina Galli, Emma e Irma Gramatica.
Dicembre… l’è sta’ un mese denso de avenimenti: Giolitti l’à dà le dimissioni dal ministero a causa de le ostilità incontrade par el disegno de lege su la tassa progressiva sui rediti. El 15 riva a Milan el dirigibile Leonardo Da Vinci e sui schermi de tuti i cinematografi trionfa la diva più amada nel nostro Paese; Francesca Bertini nel film Francesca da Rimini.
A conclùdar ‘stó 1909… n’avenimento lutuoso: la morte del Re del Belgio Leopoldo ll° al qual sucede el neodo Alberto 1°.

Wanda Girardi Castellani