L’Angolo de la Wanda – Gennaio 2014 – “Angelo Dall’Oca Bianca… el pitor filàntropo”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Angelo Dall’Oca Bianca
el pitor filàntropo

A la periferia de Verona, dopo el quartier de San Zen e vissin a quel de borgo Milan, ghè ’na zona che se ciama “Borgo Novo”. Le case i è ’bastansa moderne e le gira intorno un giardin con grandi àlbari, che i sta a farghe ombra a un bruto monumento: de i marmi rossi con formele de bronzo da le parte, i crea come un muro alto un par de metri contro el qual, postà come se el spetasse de èssar fusilà, ghe sta un sior, scolpì a mezo busto, pelà e con du bafoni a la Umberto I.

Da setant’ani i buteleti i ghe zuga vissin senza saver che ’sto muro rosso no l’è mia solo un monumento ma l’è anca una tomba: infati soto el basamento ghè sepelì quel che à fondà el quartier: un pitor che, partendo dal gnente, co la so arte l’è riussì a far fortuna e che in punto de morte l’à volù lassar tute le so òpere al Comune de Verona e tuti i so schei a un Fondo par crear case dove se podesse darghe un querto a i poareti che alora vivéa sbandà par la çità.
’Sto pitor filàntropo el se ciamava Angelo Dall’Oca Bianca.
L’era nato proprio a Verona, in centro… par la precision ne l’ano 1858 e in vicolo Cavalletto (che par un futuro pitor l’è ’na bela coincidensa!). So papà Giuseppe Dall’Oca el gavéa ’na carosserìa… però no stemo pensar che el tirasse sù le bòte a le màchine: a quel tempo i carossieri i giustava e i rivernisava le carosse a cavài. L’era un lavoro che no ghe piaseva e che l’à pensà ben de cambiar, versendo un’ostarìa: sarìa stà mèjo continuar a rivernisar le carosse, parché la nòva atività la s’à dimostrà un falimento e la fameja Dall’Oca la s’à trovà presto in miseria. Così el pìcolo Angelo l’è cressù sbandà par i vicoli intorno a piassa Erbe, diverténdose a disegnar Verona su i tòchi de carta. Nel 1873 el s’à trovà anca orfano e l’à dovù scominsiar a lavorar come murador e imbianchin… però nel tempo libero (poco) el s’à messo a studiar (tanto e da solo) e piturar. Par fortuna l’è stà notà dal scultor Zannoni, che el l’à iutà a entrar ne l’Academia de arte Cignaroli dova el s’à rivelà subito un artista de talento, tanto che solo qualche ano dopo l’esponéa za le prime tele a la Bienale de bele arti de Verona.
Visto che come artista el cognome “Dall’Oca” el faséa un po’ rìdar, par darse prestigio el s’à messo a firmarse “Dall’Oca Bianca”. Dal 1880 l’à scominsià a espor le so òpere anche a Milan e a Roma e a èssar ’bastanza quotado. A Roma l’à conossù Carducci e D’Annunzio, l’è entrà nel bel mondo, vegnendo presentà parfin a corte a la regina Margherita. El se fa valer anca come fotografo, tanto che quando nel 1882 Verona la vien invasa da la piena de l’Adese, Angelo Dall’Oca el se precìpita da Firenze, dove l’era, par documentar con la so màchina fotografica la çità vecia che stava sparendo.
El periodo fin a caval del secolo el vede una serie de esposissioni de le so òpere ne le mostre de tuto el mondo: Vienna, Barcellona, Parigi, Chicago… e mentre i so coleghi impressionisti francesi i faséa spesso la fame, i so quadri i vegnéa sempre più richiesti e quotadi. Sicuramente ghera bravura, ma ghera anca la capacità de èssar nel posto giusto al momento giusto e quela de “saverse vèndar”… un po’ come Dalì, Picasso, Monet e altri (sempre pochi nel panorama de la pitura) che i è riussì a deventar siori semplicemente vendendo i so quadri.

Ormai ne i primi ani del ’900 Angelo Dall’Oca Bianca l’era una figura dominante nel panorama artistico de Verona… Legendaria l’era l’amicissia con el poeta Berto Barbarani (nato nel 1872) e con el giornalista e scritor Renato Simoni (nato nel 1875), tanto che i tre i vegnarà ciamadi ani dopo la “trimurti” de l’arte veronese. Ogni tanto i tre i se vedéa sentà zo in qualche ostarìa del centro, in compagnia de ’na bela botilia de recioto, o passegiar sul lungolago de Garda o de Malcesine.
Ne i ani prima de la guera ’15-18, Angelo Dall’Oca Bianca l’à sperimentà varie tecniche e vari temi; la so pitura la deventa più moderna anche se questi i è i ani dove el crea de le splendide vedute del lago de Garda o de Piassa Erbe: l’era facile trovarlo con cavaleto piantà par tera e capel in testa, circondà da un fraco de curiosi, a l’inissio de Piassa Erbe vissin a dove adesso ghè la statua del so amigo Berto Barbarani.
Dopo la guera ’15-18 la so atività a Verona l’è andà più a spostarse su la salvaguardia del patrimonio architetonico: i era ani dove se voleva butar zo el vecio par crear el novo…

Dovemo a lu se gavemo ancora piassa Erbe col so bel stile medioevale e se gavemo ancora alcune porte de la çità così come i era da secoli: Angelo Dall’Oca l’era sempre pronto a difendar la Verona antica da la voja de rimodernar de quei ani… Ricordémose che a caval tra le du guere èrimo in epoca fassista, dove el stile l’era quel “Romano”, ma non romanico… e manco ancora trecentesco.
Oltre a la protession de la çità vecia, Dall’Oca l’andava sempre de più interessàndose de i poareti… Anca se ’desso l’era sior no el s’avéa mia desmentegà cosa voléa dir èssar senza un schèo in scarsela: la miseria el l’aveva conossuda de persona!
Perciò, senténdose vecio e solo, nel 1941 l’à fato testamento, lassàndoghe tuti i so averi, tute le so òpere ancora nel studio e tuto quel che el gavéa al Comune de Verona (quanti altri veronesi i pol dir de aver fato altretanto?). Nel testamento l’à disposto che con parte de i schei vegnesse creà de le borse de studio in Academia Cignaroli e che vegnesse creà una galerìa con alcuni de i so quadri. Par finir l’à disposto che i ultimi so averi i vegnesse vendù e che con el ricavato vegnesse costruì un intero quartier, par darghe gratuitamente la casa a chi no ghe l’avesse.

Purtropo el pitor filàntropo dal so monumento l’à podù védar che l’dea l’era bona ma la realizazion no: i poareti de Verona una volta che i ga ’vù la casa (mobilià) i s’à vendù fora tuto par magnar, fora che la taola che l’era tacà al paimento. El quartier un po’ a la ’olta l’è degenerà, tanto che a Verona, ne i ani ’60, dir “villaggio Dall’Oca” l’era come dir “Forcella” a Napoli. Dopo par fortuna è inissià el recupero… È nata na nova cesa, è stà demolì e rifato alcune case, è cambià la gente che ghe abitava e par ultimo è stà parfin restaurà el monumento. Verona la s’à ricordà de lu e è stà scominsià a far de le mostre, de le conferense, a rivalutar i so quadri.
Adesso Angelo Dall’Oca Bianca quando el se guarda in giro con i so oci de bronzo el pol védarse atorno un bel quartier, con bei àlbari e bele case abità da gente che sa ci l’è… El monumento el resta bruto, ma par fortuna quelo lu no el le vede mia.

Wanda Girardi Castellani