L’Angolo de la Wanda – Gennaio 2015 – “Altri zughi da ricordar”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Altri zughi da ricordar

Oltre quei che ve go contà altre volte, de zughi ghe ne sarà stà de i altri, ma oramai me ’i son desmentegà; i ani i passa e la memoria la scominsia a scantinar. Se volì voi catàrghene de i altri, ricordàndoli, tornemo ancora ’na s-cianta buteleti!

A RUDA
A “ruda, ruda… quala piena e quala uda…” o “Tien la fava / tiènla streta. Tien l’anel / tiènlo ben”.
El capogrupo co’ le man serà in “orassion”, ripetendo ogni òlta la filastroca, el passava da tuti i buteleti sentà con le man ne la stessa posission e a uno “segreto” el ghe depositava drento l’anel (un sasseto o altro ogeto) e el zugador el dovéa indovinar andó l’èra, ’pena la solita penitensa.

TUTI NEL BUSO… TUTI NEL SUO
Tuti i zugadori in çércolo i dovéa tegner l’indice in un (çercoleto che i gavéa disegnà davanti. El capogrupo l’ordinava: “Tuti nel buso” (cioè nel çércolo centrale). Po’: “Tuti nel suo!” cioè, ritornar al proprio, e ci sbaliava: pegno!

LE CUCUCE
Ogni zugador el vegnéa numarà. El “cucuciaro” el tacava: “Son ‘ndà al marcà, ò cronpà (par esenpio) 5 cucuce“. El “ciamà” el dovéa rispóndar veloce: “Come çinque cucuce?” E st’altro: “Quante ne pòi?” De rimando (par esenpio) : “8 cucuce!” e via cusì. Se uno no ‘l rispondeva svelto el pagava el pegno.
El stesso zugo el gavéa però ’n’altra sàgoma: “Ci è stò?” “Ti!” “Chi, mi?” “Ci èlo stà?”

A FILETA
Senpre a le pice messe in fila; ’na spece de bouling.

A SASSETI
Un zugo da butine. Se sparpajava ’na smanà de sasseti par tera e po’ se ghe ne tirava par aria uno, çercando de ciaparlo al volo, dopo avérghene però catà sù ’n altro da tera (uno, po’ du, po’ tri e via).

A COTO
O scondicuco o a scóndarse: zugo predileto da i adolessenti che i ’profitava par inboscarse a copie in te qualche canton. Uno el “piava”, contando fin a diese, nel mentre che quei altri i andaséa a scóndarse.

A DÀRSELA
’Stó zugo el se rifà a un edìto de la Serenissima che, par premiar Verona de aver inalsà in piassa Erbe la colona co ’l Leon de San Marco, ghe parmeteva a i debitori de salvarse da i creditori a pato che i stesse tacà a la sudeta colona. I zugadori i coréa intorno fin che uno el çercava de dàrghela cioè de darghe ’na paca . Quando se se la vedéa bruta, bisognava tocar el muro, sigando “mare” e s’èra in salvo. Oviamente, quel “tocà” el dovéa çercar de “dàrghela” a so volta a qualchedun altro.

A LA STORIA
Altro bel zugo da far in grupo intorno a ’na tola. Ocoreva: de le strìcole de carta de 30 cm; tante quanti che i èra i zugadori che i dovéa ’verghe anca ’na matita. El capozugo el tacava: “Ci èla éla?” E tuti dovéa scrìvar un nome de dona. Po’ se faséa ’na piegheta a la carta parché la scrita la dovéa èssar segreta e se “passava” a quel viçin. Altra domanda: “E ci èlo lu?” Altra piegheta e altro passagio. Le domande le podéa èssar tante, fin che ghèra carta par scrìvar: “Quando se sposarài?” “Come se vestirài par le nosse?” “Dove andarài in viajo de nosse?” “Con che mèso?” e via cusì.
A la fine el capo-zugo el ritirava i bilieti e el li leseva. Oviamente, visto che tuti i avéa seguità a contar la so storia, pur semenàndola fra tuti i bilieti, ghèra da sganassar… e ben!

Wanda Girardi Castellani