L’Angolo de la Wanda – Gennaio 2016 – “Michele Sanmicheli”
…a cura di Graziano M. Cobelli
gcobelli05@gmail.com
Quatro Ciàcoe: da Verona
Michele Sanmicheli
A Verona tra el stradon de Porta Nova e via Valverde ghè un giardin. In ponta al giardin, tra i àlbari, da fine ’800 se vede el monumento a un omo in vestiti rinassimentali: con ’na man el se caressa la longa barba bianca e con chel’altra el se tien postà a un mureto. Par saver ci l’è bisogna andar a lésar la scrita (picola e mèza scancelà) che el ga soto i pié: Michele Sanmicheli. El più inportante architeto veronese del 1500.
L’era nato a San Michele Extra nel 1484 in ’na famosa fameja de scalpelini, come alora i se ciamava quei che costruiva case, cese o altro. Oltre a lu, ne la “premiata ditta Sanmicheli” laorava so fradel Jacopo, so cusin Matteo, el papà Giovanni e el zio Bartolomeo. Quela però l’era ’n’epoca dove se moriva presto e sfortuna à volù che a solo vint’ani anca el nostro Michele el se trovasse orfano e sensa più nissun parente… a parte du altri fradèi che invesse de tajar piére i era andà a far i preti a Roma. Così el decide de serar botega e de trasferirse anca lu ne l’Urbe par studiar i monumenti classici! Sicome l’è brào però, el vien subito notà e “assunto” da Antonio da Sangallo, famoso specialista de fortificassioni militari. I primi ani del 1500 i era ani rivolussionari par l’architetura civile, religiosa e in particolar in quela militare le moderne artilierìe più potenti, le stava portando tute le çità a rifarse mura, bastioni e difese. Comunque Michele, dopo èssarse fato un po’ de esperiensa a Roma, el riesse averghe el primo laoro inportante: capomastro del cantier al Domo de Orvieto. Penso che tuti conossì che maraveja che l’è el Domo de Orvieto… Ben, el nostro el ga laorà par vint’ani. Ciaro che no l’è tuta opera sua… El Domo i l’avéa scominçià nel ’200 e i laori (dopo de lu) i continuarà ancora par almanco ’n altro secolo. Oltre al Domo, Michele el segue anca altri progeti a Montefiascone, Spello, Rieti e, oviamente, Roma. Dopo trent’ani via da casa però el scominçia a ’verghe nostalgia; ormai el s’avéa fato un nome e, cònplice n’interessante proposta da parte de la Repùblica de Venezia, nel 1527 el ciàpa sù le so robe e el se ne torna a Verona. Mai momento l’è stà più propissio, parché proprio nel stesso ano riva ne la “çità eterna” i lanzichenechi de Carlo V a far quel famoso disastro che passarà a la storia come “Sacco di Roma”.
Michele intanto da la so çità nadal el se sposta un po’ a Padova, un po’ a Treviso e un po’ a Legnago. De sicuro el vien a conóssar un so prometente “collega”… un vesentin de vint’ani che de nome el faséa Andrea della Gondola, ma che el passarà a la storia col pseudonimo de “Palladio”. Andrea Palladio el stimava Sanmicheli, de 24 ani più vecio de lu, e la so passion par le colone classiche probabilmente el l’à ciapà dal colega veronese. Un po’ a la volta, però, i du architeti i vegnarà a svilupar du stili completamente diversi e facilmente riconossibili… In più el Palladio el se specializarà ne le vile venete e inveçe el Sanmicheli el continuarà con l’architetura militare. Venezia intanto la çercava qualchedun esperto de fortificassioni e Michele (con quel che l’avéa inparà a Roma dal Sangallo) l’era proprio l’omo giusto. Così el primo grande incarico che la Serenissima la ghe dà l’è proprio a Verona: rifar i bastioni e le porte de la çità. In pochi ani el ridisegna completamente Porta Nova (motivo par el qual ne l’800 la so statua l’è stà messa lì), Porta Palio e Porta San Zen. Contenporaneamente el rifà el Ponte Novo e la capela Pellegrini a San Bernardin. El modifica radicalmente la forma de i bastioni: prima i era un misto de scaligero e visconteo, epoche dove se conbateva co’ le spade… ma ormai però se usava i canoni. La so fama l’è così grande che Francesco Sforza, sior de Milan, el ghe le domanda in prestito al Doge par ’na perissia a le so fortificassioni. Anca Carlo V el fa la stessa richiesta, ma Michele el stava massa ben in Italia e comunque la Serenissima la se le tegnéa streto. Nel 1530, in pieni laori a le mura de Verona, el ciapa anca l’incarico par du palassi nobiliari: Palasso Canossa e Palasso Bevilacqua, messi in pié dal gnente nel giro de du ani. Nel 1534 ’pena messa la bandiera su i novi bastioni de Verona (e dopo un breve incarico a Zara), Venezia la ghe dà el massimo de i onori: rivédar le fortificassioni de la çità. De quei ani, par esenpio, l’è el Forte Sant’Andrea (su l’isola dal stesso nome). Fin al 1540 come “ingegnere capo” de la Repùblica el se sposta su e zo par tuto el dominio veneto, senpre ocupà a far opere de manutension al sistema difensivo, rivando a laorar parfin a Corfù, Creta e Cipro. Sue, e de quei ani, i è par esenpio le mura che a Famagosta le permetarà nel 1571 a Marcantonio Bragadin de resìstar a i turchi par quasi un ano, prima de lassarghe la pèle. Però, dopo tuto quel periodo intenso, el çerca el modo de tornar a Verona: ormai l’andava par i sessanta e in quanto a viagiar, ormai l’avéa viagià in bisogno.
No’ che el volesse andar in pension… quei i è i ani de i laori a la cesa de San Giorgio in Braida (l’unica a Verona con la cupola e in stile venessian), Palasso Pompei (che atualmente l’ospita el museo de siense naturali) e Santa Maria in Organo. Venezia però la le vol ancora: così el va a progetar el Palasso Mocenigo in campo San Polo e el Palasso Grimani. Verso el 1555, a 70 ani, el se dedica a uno de i so ultimi laori, nel posto dove l’è nato: la cesa rotonda de Madonna di Campagna a San Michele Extra. ’Na strana costrussion, dove cupola e cesa i è tutuno. Nel 1559 el scominçia la ristruturassion de San Tomaso Cantauriense, su l’“Isolo” de Verona. No el le finirà mai: in agosto ’na febre la se le porta via a 75 ani. I l’à sepelì proprio lì, a San Tomaso, ne la so ultima fadiga. El più grande architeto veronese del Rinassimento, l’è sepelì in una de le cese manco “rinassimentali” de tuta Verona.
Wanda Girardi Castellani
Mirco Castellani
