L’Angolo de la Wanda – Gennaio bis 1996 – Un poeta de l’antico Egito: “Akhnaton, el faraon monoteista che à alsà la dona al so level”.

…a cura di Graziano M. Cobelli

gcobelli05@gmail.com

Quatro Ciàcoe: da Verona

Un poeta de l’antico Egito: “Akhnaton, el faraon monoteista che à alsà la dona al so level”.

Mi penso che tuti gabia, o almanco gabia ‘vu, un idolo al qual ispirarse; ci un divo del cine o de la musica, ci un canpion del sport, ci un personagio politico o altro. Mi, fin da butina, ò amà ci à lassado ‘na pesta fonda ne la storia de l’umanità. Uno de questi l’è el “Faraone erètico” Amenhotep IV, o Akhnaton, el cui particolarissimo viso, scolpì ne la piera, ani fa son ‘n dà a amirar al Louvre de Parigi.
Postà a un muro, vardando quei enigmatici oci a màndola che i parea parlare dal mare de i sècoli, ò çercà, rumando ne la memoria de pagine e pagine inmagasinade par ani ne l’archivio del çervel, de ricostruirghene el ritrato, traverso la so antica viçenda umana.
Sul trono d’Egito el gh’era rivà a 11 ani, sucedendo a Amenhotep III, “el Magnifico”, intorno al 1375 a.C., durante un periodo tra i più dificili de la storia del so Paese.
Sicuramente el papà, grande guerier e omo politico, l’avea sperà che’l so sucessor el seguitasse la stessa strada, ma, sto qua, più che de guera e de politica el se interessava de teologia e de poesia. I egissiani i è senpre stà un popolo religioso. Politeisti, i gavea dèi e dèe par tuti i gusti e le circostanse; el pantheon piassè grande de la tera! Naturalmente, ogniuna de ‘ste divinità la gavea i so preti e i so tenpli che i andava mantegnù el mèjo possibile. El capo de ‘sto caos teologico l’era Ra e ogni faraone l’era automaticamente “fiol de Ra”. Po’, in ordine de inportansa, vegneva Amon; el Dio che ghe dava la vitoria a l’esercito egissian e che, par questo, el riceveva ‘na bona parte del botin de le armade vitoriose. Amenhotep, significa “Amon l’è sodisfato”, ma Amenhotep IV no’ ‘l d’era par gnente. Alla el Dio vèro el s’avea rivelà col nome de Aton, tanto che’l s’avea subito canbià el nome in Akhnaton (Spirito de Aton). Le preghiere che’l g’à dedicà, rivade fortunosamente fin a noialtri, i è tra i brani poetici più bei de tuta la leteratura mondiale.
Se resta maraveiadi scoprendo l’anticonformismo, la senplicità, l’apertura e la diritura moral de ‘sto grande Faraone, el primo a credar in un Dio unico par tuti, siori e poareti e questo quasi 1400 ani prima de Cristo e 7/8 secoli prima de i profeti de l’antico testamento. Nei so versi se lese che «Dio l’è el pare e la mare de tuto quel che l’à creado», «un Dio che l’à fato cel e tera, con tuta la gente che ghe abita; tuti uguali nel so imenso amor». Verso la fine de la vita, adiritura l’era rivà a capir che quel Dio che l’avea volù rapresentar come el disco del sol, l’era de più, infinitamente de più; un puro spirito del qual el sol no’ l’era altro che un palido riflesso de l’amor e la potensa.
‘Sta nova fede, oviamente, l’à urtà de bruto contro i potenti intaressi costituidi, particolarmente, dal clero tebano. Come se no’ bastasse, essendo contrario a la guera; un “mestier” dal qual l’Egito el traeva in bona parte le so richesse, l’à finì col portar el Paese su l’orlo del disastro. A ‘sto punto, no’ se sa come, dopo 20 ani de regno, “I’Orisonte de Aton” l’à visto un brusco e forsi tragico tramonto, s’era nel 1358 a.C.
Dopo la morte de Akhnaton, l’Egito l’è ripiombà pèso de prima nel politeismo. La capitale de Aton, Akhetaton, l’è stà distruta come tuti i “segni” de l’unico Dio, par tanti pericoloso e soratuto scomodo. Akhnaton no’l g’aveva ‘vù fioi mas-ci ma el mari de una de so fiole, Tutankhamen, in seguito l’à portà la mumia del grande suocero ne la tonba de la nona, la regina Tiy, dove che l’à riposà indisturbada fin al 1907 quando un grupo de archeologi i l’à ritrovà, 15 ani prima che Carter el scoprisse la splendida sepoltura del zènero.
De Akhnaton resta le sculture; opere del tuto difarenti da quele precedenti e sucessive. El “Faraone eretico” ne la so grande umiltà l’à volù che i le rapresentasse come che l’era; fisicamente pitosto malcunà. Primo fra i òmeni del so tenpo e fra quei che l’à seguì par secoli-seculorum, l’à volù anca che i rapresentasse la so regina (la splendida Nefertiti che tuti conossemo e a la qual tenpo fa a Roma è stà dedicà ‘ na mostra, inportante anca par via de la “realtà virtual”, non lilipussiana come l’era uso, ma grande come lu, volendoghe cusì dar la so stessa inportansa.
Ne l’ano dedicà a la dona, me par giusto averghe dà ato anca de ‘ sta rivolussionaria inovassion che, dopo de lu, par catar riscontro l’à dovù spetar più de tremila ani.

Wanda Girardi Castellani