L’Angolo de la Wanda – Giugno 1997 – “Quando Verona la s’à propio inrabia’… (le Pasque veronesi)”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Quando Verona la s’à propio inrabia’… (le Pasque veronesi)”

“se San Marco èsse volesto despiegar la so bandiera
i francesi, trati a tera, tuti morti i sarìa stà!”

L’insuression de Verona contro i “fradéi latini” francesi (quei stessi che çentoçinquant’ani dopo i à scadenà in centro Italia le so trupe d’assalto marochine, dàndoghe çinque giorni de “carta bianca”; la pagina piassè nera de la storia, tale da bàtar parfìn quela del “saco de Roma” ) l’è scopià lùni 17 april 1797, secondo dì de Pasqua, in n’ostaria de via Mazzanti e l’è durà ‘na setimana.

Par la so posission strategica, Verona l’è stà’ conquistà un futio de volte da ‘na brìgola de eserciti de tute le rasse, partanto, a mi, quando che sento dir “son veronese puro sangue”, me scapa da rìdar parché, a parte le inumerevoli invasioni de la çità del passato remoto, basta pensar al “tira e mola” tra venessiani, francesi e austriaci; ‘na giostra ch’è durà quasi 500 ani, e al fato che tuti i eserciti invasori, da che l’è mondo, la prima roba che i fa quando che i riva l’è quela de darse da far co’ le done, volenti o no.
“veronesi puri”? Bah!
E dopo ‘sta sconsolada considerassion, passemo a l’argomento in tòla, “le pasque veronesi”  e ai avenimenti che l’à precedude e seguide.
Verona, i francesi no’ i la  vedeva de bon ocio parché g’avéimo dà ospitalità a l’albergo “Due Torri” e pò’ ne la vila Gazzola (ne l’atual via del Pontiere) al conte de Provenza (o conte di Lilla), uno dei pretendenti al trono de Francia, tanto che’l Bonaparte el lo ciamava “Re de Verona”.
El 1° giugno 1796, nel giorno stabilì dal generàl Napoleon, i francesi, dopo averghe dà la supa ai kruchi a Borghetto sul Mincio, i è entrà nela çità scaligera in 12.000  sensa colpo ferir.
El primo provedimento dei nóvi paroni l’è stà quelo de castigàrne inponendone  imediade e dure contribussion; requisission de bestie, robe e abitassion. Come l’à scrito un cronista de l’epoca: “I soldà francesi i è entrà dapartuto portando via tute le done (e te paréa!) e tuto quanto piaséa a lori”.
Napoleon inveçe l’è rivà scortado da 500 cavalieri, el 3 giugno, ocupando l’atual palasso Forti (alora del conte Emilei).
El 30 luio, dopo che i francesi, de note e a la chetichela i avea fato féte, è entrà po’ i austriaci saludà con entusiasmo da la çità che la se iludea de poder restaurar con lóri el governo venessian.
Ma se contro el “grande Còrso” alegramente i veronesi i avéa cantà: “Bonaparte nó’ vol parte/ ma el vol tuto par so parte/ e nel mondo nó gh’è parte/ che no’ voia el Bonaparte”, ben presto i à dovù cambiar cusì la  sonada: “Co’ san Marco dominava/ se disnava e se senava./ co’ la santa libertà/ s’à disnà e no’ s’à senà/ co’ la croçe de Lorena/ no’ se disna e no’ se sena”.
La sera del 6 agosto el general Massena, “Duca de Rivoli”, ciamà da Napoleon “el fiol predileto de la vitoria”, l’èra za rivado a Peschiera e a le do de note eco da nóvo i francesi passar la porta de San Zen dopo averla sfondà con diese canonade… Ancora ‘na òlta Verona, sbandonà dai austriaci e dai venessiani, l’è ne le sgrinfie  dele slandronade, afamade e ancora più incativide  trupe del Bonaparte. I sacheggi e le violense i è stà talmente tanti e bruti che’l stesso Napoleon l’à afermà che i so soldà i s’avarìa meritadi tuti la fusilassion!  Paraltro, ‘stó  esercito in 20 mesi de guera l’avea lassà ne la sola Verona 4000 morti, sensa contar quei de Rivoli, Caldier, Arcole e zone limitrofe.
In quel periodo quasi tute le cese, palassi e conventi i è stà trasformà in ospedai; prima fra tute la cesa de santa Eufemia, dopo averla spoià de quadri e aredi e distruto el resto, tonbe conprese (parfin quela de la Anzolina Lonardi, protagonista de la “triste istoria” contà da l’abate Caliari. Vedi “Quatro ciacoe”  otobre 1989). ‘Stessa sorte gh’è tocà ai conventi de san Bernardin, santa Anastasia, san Tomaso ecc… No’ i à lassà in paçe gnanca Cagrande de la Scala, tiràndolo-zo  dal portal de santa Maria Antica par portarghe via la spada (recuperà pò’ ‘bastanza de recente) e forsi un pressioso anel.
Come ‘na carica de cavalete i francesi, in passar, i s’à sempre lassà drio solo desperassion e macerie!
Dopo alterne vicende militari e non, al sóno de la fanfara Napoleon l’è rientrà par la tersa volta in Verona par po’, lassandola poco dopo, métarghela in man a qualche guarnigion che l’à seità, par so conto, a farne più dàno che l’à podù… Ma la popolassion, sobilà dal clero, za da’n tòco l’avéa tacà a mugugnar contro i giacobini (francesi e nostrani), “regicidi e anticristo”, nonché ladri e profitadori (e qua ghe sémo!) e la rivolussión l’èra ne l’aria come a Milan, Brescia, Bergamo ecc…
Propio in quei giorni Verona l’à adotà ‘na cocarda giala e blu; i colori che i è restà ne la só bandiera.
I giacobini veronesi i avéa çercà de ocupar la çità ma la gh’éra andà sbusa. L’èra comunque fatal che tra de noialtri e i francesi se vegnesse a le man, infati, la matina del 17 april 1797, seconda festa de Pasqua, par le strade se leséa: “Semo pronti a la difesa viva san Marco, viva la Republica, viva Verona!” Subito la popolassion, sensa ordinamento e freni la s’à scadenà perseguitando francesi e giacobini, soratuto quei de casa. L’èra la guera civìle, saludà dal Rengo che da la tor Lamberti batendo a martel el galvanisava el popolo, comandà a la mèio da Francesco Emilei.
Da la provincia, eco vegnàr-zo çentenara de contadini armà de forche, baili e rengàie. A quei s’èra unì anca 200 soldà austriaci.
Oto giorni de bombe, canonade, campane a martel, massacri e incendi e po’ la capitolassion, fin che’l popolo el cantava: “Se san Marco èsse volesto/ despiegar la so bandiera/ i francesi, trati a tera/ tuti morti i sarìa stà”.
Ma intanto, Castelvecio l’èra un inferno e tantissimi palassi i era danegià de bruto da le canonade che seitava a fiocar dapartuto. I à centrà anca el palasso “de l’orolojo a aqua” (via Quatro Spade) de proprietà del grande astronomo veronese Antonio Cagnoli che, desperà, l’à visto anca andar in tochi el so telescopio, pò’ in seguito, ripagà personalmente da Napoleon con 5000 franchi. Ma de le canonade de quei giorni se pol ancora védar i segni, par esenpio, sui muri de la cesa de san Giorgio.
El 25 april 1797, co’ la viliaca defession dei du Provedidori venessiani, a Verona finiva el dominio veneto e i francesi i metéa le sate ancora ‘na volta su la tera scaligera castigando, tanto par canbiar, i so abitanti con altre dure requisission e violense a no’ finir. Tanti i è stà i patrioti arestà e inpresonadi in castel san Felice: Francesco Emilei, Augusto Verità, el capucin Luigi Maria Flangini, Agostino Bianchi e altri. Tra questi, è stà’ fusilà el 16 magio nel val dei bastioni de porta Nova: el conte Emilei, el conte Augusto Verità e Luigi Flangini.
In quei giorni el leon de san Marco l’è stà’ scopelà-via da tuti i palassi e le strade e parfin tirà-zo da la colona de piassa Erbe (par tornarghe-su l’à dovù po’ spetar el 17 de april del 1886, aniversario de le pasque veronesi).
El 29 agosto del 1805, po’, par slargar el corso al passagio de i so cariagi  i francesi i à  parfìn demolido l’arco dei Gavi muciando, par fortuna i tochi nei cógoli del’Arena, roba che ghe n’à consentì nel 1932 la ricostrussion.
Co’ le Pasque veronesi  finiva el dominio de la Serenissima. L’èra durà, dal 24 giugno 1405 al 17 giugno 1509 (103 ani, 11 mesi e 24 giorni) e dal 16 genar 1517 al 25 april 1797 (280 ani, 3 mesi e 10 giorni). In tuto quasi 4 secoli”
El 9 luio 1797 nassea la Republica Cisalpina ma el popolo, sempre oco, miga l’avea capì el contegnùdo del tratado de Campoformio. El s’à incorto de l’inbròio solo quando che el comissario de guera Tibeau l’à trasferì l’esercito da ‘na parte a l’altra de la çità che la s’à catà cusì spartia fra francesi e cruchi; mesa de quà e mesa de là! S’erimo al 21 genar 1798.
I francesi i à po’ lassà la so mesa torta a genar del 1814 sostituidi el 4 febrar dai 1800 kruchi guidadi dal general Stefanelli .
I veronesi che, dopo el longo va-e-vièn i avea inparà ormai la lession, no’ i g’à messo tanto a capir de che rassa i fusse i nóvi “liberadori”, tanto che un frutarol che, come tanti altri l’avéa ciapado da ‘sti qua ‘na bona rata de legnade, decantando i so limoni, sotovoçe el ghe zontàva, in bona rima: “È andà via el re de denari e è rivà quel de bastoni!”
El 14 otobre 1866 finalmente è sbarcà  a Porta Nova, che al tenpo l’èra solo ‘na stassion militare, i primi soldà de l’esercito italian; el giorno dopo che da la stassion de Porta Vescovo era slojà el regimento Wimpffen.
De quel lontan 1797 le uniche robe bele che n’è restà i è le indicassioni stradali e i numari civici de le case. Anca le 72 arcade de l’Arena i èra stà numarade parché 33 de queste i era abità. Inoltre ghe dovemo ai francesi l’istitussion de l’ospedal civile e dela biblioteca comunale. La çità l’èra stada divisa in rioni, dei quai, par èssar ciari “furon scritti i nomi sui cantoni”.
Anca dei  morti el  Bonaparte el s’à ocupado trasferendoli, dal teren intorno ale cese, fin alora tute aree cimiteriali, al de fora de le mura de la çità, come che testimonia, rivolgendose al veronese Ippolito Pindemonte, Ugo Foscolo ne “I Sepolcri”.

Wanda Girardi Castellani