L’Angolo de la Wanda – Giugno 1999 – “Al mesosoprano ADRIANA LAZZARINI EL XlV° PREMIO ZENATELLO 1999 “‘NA VITA PAR LA LIRICA””

…a cura di Graziano M. Cobelli

gcobelli05@gmail.com

Quatro Ciàcoe: da Verona

Al mesosoprano ADRIANA LAZZARINI EL XlV° PREMIO ZENATELLO 1999 “‘NA VITA PAR LA LIRICA”

Dominica, 11 aprìl 1999, nel bel salon del circolo Uficiài in Castelvecio, g.c., davanti a un publico fisso, fato de apassionadi melomani, è stà consegnà el prestigioso premio “‘Na vita par la lirica” al mesosoprano ADRIANA LAZZARINI.
A vèrsar la manifestassion del circolo “Amiçi de la lirica Giovanni Zenatello” piturando con coloride penelade la figura e la cariera de la nostra Adriana (nostra, soratuto parché l’è vissuda quasi sempre a Verona) l’è stà’ el giornalista e critico musicale dott. Gianni Villani; competente e valido orator.
El premio; un artistico trofeo, opera del maestro orafo Angelo Antoniazzi, l’è stado po’ consegnà dal dott. Renzo Giacchieri, sovraintendente de la Fondassion Arena-Teatro Filarmonico.
L’amiga carissima Adriana Lazzarini; una gentile, elegante e bela signora, me coetanea, l’è anca (come daltronde el dott. Villani) un attivo membro del comitato Giuseppe Lugo e ne l’ultima edission l’è stada ela a consegnar sul palco de la ‘Réna, a nome del Comitato, el premio al colega; tenor Carlo Bergonzi.
Ma vedemo de farghe anca noialtri ‘na sintesi biografica:
Prima de tuto me interessa dìr che l’à cantà in ‘Réna par 10 stagioni e par óndese a la Scala de Milan. El grande maestro Ettore Campogalliani el g’à ‘vudo par ela parole de altissima stima rendéndoghe onor a la so statura artistica e morale.
Scórendo el curriculum vitae de ‘sta grande artista se vien a saver che la g’à ‘vu 41 opere in repertorio, che l’à cantà ‘rènte a calibri come Mario Del Monaco, Tito Gobbi, Maria Callas, Renata Tebaldi, Magda Olivero, Franco Corelli, Ettore Bastianini ecc… soto la diression dei Maestri: Tullio Serafin, Gianandrea Gavazzeni, Herbert von Karaian (tanto par citarghene qualchedùn).
L’è stada la più celebre e valida Azucena, parte ne la qual l’à debutà, nel 1953, a soli 22 ani, al “Bellini” de Catania, dopo i studi al Conservatorio de Verona e el periodo de perfessionamento con el grande soprano veronese Gilda Dalla Rizza (cantante preferida da Puccini, Zandonai e Toscanini).
Nel 1955 la g’à ‘vu el debuto in Arena interpretando Amneris ne l’Aida. L’ultima so presensa areniana l’è stà’ pò’ nel 1972 ne la parte de Ulrica nel “Balo in màscara” de Verdi, ‘rènte a Luciano Pavarotti, mentre el definitivo congedo da le sène l’è rivà nel 1975 ne l’Adriana Lecouvrer con Magda Olivero.
Tanti i è stà’ i riconossimenti, specialmente ne la musica classica; ricordemo i du dischi d’oro vinti con “La Betulia Liberata” de Mozart e “La morte de Abele” de Leonard Leo.
Vintiçinque ani de luminosa cariera che g’à merità ‘na fama mondial, no’ g’à tolto a l’Adriana Lazzarini (par la qual anca el tempo l’è stà straordinariamente generoso) la gentilessa e l’umiltà dei veri grandi artisti
Dopo la premiassion, s’à svolto, in onor de la festegiada, un importante concerto. Tri i cantanti che s’à alternà sul palco, compagnadi al pianoforte, da la brava e bela prof. Michela Forgione, sempre squisitamente elegante: el soprano Yolanda Auyanart, el baritono Silvano Carroli e el basso Bonaldo Giaiotti, uno più bravo de l’altro!
El publico l’à premià l’esibission dei tre artisti con aplausi tali da métar in pericolo veri e lanpadari e l’à dimandà un bis a ogni brano, otegnéndolo el più de le volte.
A presentar l’è stà, dopo el saludo del presidente Nando Tavoso, l’inmancabile, simpatico prof. Franco Gianfranceschi.

Wanda Girardi Castellani