L’Angolo de la Wanda – Giugno 2001 – “Cerro: el Santuario sul Monte Croce”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Cerro: el Santuario sul Monte Croce

Del paese de Cerro Veronese go avù modo de parlar su “Q.C.” aImanco un par de volte contando la storia, fini in gloria come in tute le rosarie che se rispeta, de I’ormai cèlebre tenor argentin Josè Cura, “fiòl adotivo” del bel paeseto de la Lessinia dove che I’èra rivà co’ la fameia; le scarsele ude ma ‘na speransa da le aIe grande come quele de’n condor.
Cerro el ciapa el nome da la maestosa pianta secolare che destende i so larghi e fissi rami su la piasseta del paese. L’è la vilegiatura de i vecioti, anca perché l’è a mes’ora de strada da Verona. Çinquçento metri de altitùdine, ben servida de alberghi, bar e ostarie… l’ideale par “parchegiarghe” ne i mesi de istà i veci noni fin che se va in giro pa’l mondo!
A adornar el paese se inalsa, come ‘na corona postà su la çima del monte Croce, la bela ceseta del Redentor, da poco, in occasion del Giubilèo, restaurada.
A volerla I’èra stà el pàroco Domenico Massalla, come voto par over otegnù la fine de l’epidemia de colera che avea colpi el paese a la metà del I’otoçento. L’inaugurassion s’à podù farla però solo dopo çinquant’ani in ocasion del Giubilèo par I’Ano Santo 1900, indeto da Papa Leone XIII.
El progeto I’à ciapà el via par inissiativa del pàroco don Silvio Padovani, su disegno de I’architeto Mangano e I’è stà incaricada de i lavori la dita Emanuele Cunego, ma i è stadi però tuti i abitanti de Cerro e dintorni a farse-sù le màneghe, trasportando ogniun la so piera da la cava in località Tenda.
“La eresse il popolo rendendo grazie a Cristo Redentore nell’anno 1900“, dise un’iscrission in latinorum.
La costrussion l’è a pianta otagonal e, come diseimo, la sveta da la çima del monte Croçe dove par che passasse la linia de confin fra le popolassioni de lingua italiana e tedesca, dopo la colonisassion de i cimbri. Ma i dise che ben da prima la spartisse el contado che gravidava su la çità da la “Silva Alferia”, come vegnea ciamado el paese de Cerro nel diploma de Ottone I° deI 969. El primo restauro l’è stà ordinado nel 1937 dal pàroco don Giuseppe Antolini che, za che’l gh’èra, l’à ‘profità par zontarghe el terassin esterno.
Nel 1964 è stà eseguì el restauro de’na tela del ‘600 robà po’ ne l’82 mentre che, passo-passeto, avansava el degrado de la ceseta scampà quasi miracolosamente anca a un tentativo d’incendio.
Don Tullio Ferrarese, nel restauro del 1984 l’à demolì un granar de legno ricostruendolo po’ in calcestrusso. Sie anni fa è stà po’ realisada la strada’ sfaltada d’acesso a la ceseta.
In ocasion del çentenario el pàroco don Luigi Bertagnoli l’à invià un novo restauro, afidà a l’architeto Giovanni Casadei e’ sta òlta s’à çercà de ridarghe al bel tempieto la so strutura original.
I à anca rinforsà con resine el muro a nord che l’èra a ris-cio, i paimenti e rivestimenti interni de piera, sistemà grondare e pluviài, riverte do porte e do finestre oltre a metar in règola tuti i impianti co’ le normative de sicuressa. A l’esterno è stà curà el parco e el prà e ancora ‘na volta la popolassion l’à risposto in maniera esemplar.
Infine, da là inçima se gode un maraveioso panorama e, soratuto, no’ se sente nissun rumor al de fora del cinguetar de i usèi e de la mùsica de i rami de i pigni soto la diression de la bacheta de “maestro vento”.

Wanda Girardi Castellani