L’Angolo de la Wanda – Giugno 2005 – “EL MORO DE THIENE”

…a cura di Graziano M. Cobelli

gcobelli05@gmail.com

Quatro Ciàcoe: da Verona

EL MORO DE THIENE

Arturo Ferrarin, uno tra i più grandi assi de l’aviassión italiana tra la prima e la seconda guera mondiàl, i lo ciamava “el Moro” par via de la só pèl pitosto scura.
Grande acrobata celeste, el g’à ’vù sempre ‘na vera passión par el volo, ‘na passión che g’à consentì de realisàr memorabili inprese sportive svolgendo contenporaneamente l’atività de colaudatór de diverse aziende costrutrici de arioplani. L’èra nato a Thiene el 13 febràr del 1895 da  ‘na fameia de “lanieri” e l’avéa guadagnà el breveto de pilota durante la guera “15-18” conbatendo ne l’82° squadrilia e meritandose dó croci al merito e ‘na medaia d’argento al valór militare.
Però la só inpresa più famosa, quela che g’à dà la celebrità, l’è stà’ el raid Roma-Tokio. Scopo de l’inpresa, ideà al prinçipio da Gabriele D’Annunzio col poeta giaponese Haru-Kichi Shimoi, l’èra quel de dimostràr la possibilità de l’aereo come mèso de trasporto e de colegamento par grandi distanse, ma pò’ el “Vate” l’àvea finì col rinunciàr al raid par deventàr inveçe protagonista de Fiume.

Dei tanti piloti che avea catà-su el guanto de sfida, solo i tenenti Arturo Ferrarin e Guido Masiero, con i motoristi Capannini e Maretto, i è riussì a rivàr. Partidi el 14 febràr 1920, i è ateradi in Giapón el 31 de magio dopo un volo a tape pièn de aventure e grosse dificoltà. Solo el ”Moro”, però l’è stà’ considerà el vinçitór del volo in quanto Masiero l’èra stà costreto da un incidente a far un trato de strada in nave.
Tornà in Patria, però, dopo le manifestassioni e i festegiamenti grandiosi che i g’avea fato ai aviatori italiani in Oriente (tanto par dir; i era stà ricevudi da l’Imperatrice giaponese dala quàl i avéa ricevù la più alta onorificensa niponica, la spada da Samurai, ‘n evento mai sucesso prima), i conassionali no’ i g’à çerto riservà le acogliense che l’America la g’avéa riservà al só Lindbergh. Ferrarin, paraltro, l’è stà’ in parte ripagà da l’entusiasmo dei só concitadini de Thiene.

In seguito, el nome del nostro “asso” l’è andà a la ribalta diverse volte nei ani “vinti” par missioni aviatorie a l’estaro, la Gran Coppa d’Italia nel 1922, la crociera europea nel 1925, la Coppa Schneider e la gara de velocità par idrovolanti nel 1926-27.
Nel 1928 gh’è stà’ la seconda grande inpresa del “Moro”: el raid in Brasìl fato col magg. Carlo Del Prete. Dopo el superamento del primato de durata e distansa in circuito serà, i du amiçi i à fato la traversada de l’Atlantico sensa scali intermedi, un ano dopo l’inpresa de Lindbergh. Purtropo l’aventura l’è però finì mal, infati Del Prete l’è morto in un incidente in Brasìl. Grande l’è stà’ el dolor par la perdita de l’amigo, na morte che l’à segnà forsi la fine del periodo d’oro de la vita de Ferrarin che nei dies’ani ch’è vegnù dopo l’è cambià, soratuto a causa de la maniera diversa de concepìr l’aviassión. Pò’, con Italo Balbo a ministro de l’Areonautica, i “assi” i è stà’ eliminà da la sèna in quanto l‘aviassión l’è stà’ valutà nel só insieme, sensa predilessioni par nissuno.

Come se no’ bastasse, nel  febràr del 1930 el “Moro” l’à ricevù da Balbo la letera che lo meteva, sensa tanti preanboli, in congedo, ‘n assión ingiusta e inspiegabile che lo umiliava e lo ofendeva. Epùr nel 1931 Ferrarin l’à  invità ’stesso Balbo a le só nosse .
Nei ani trenta el “Moro” l’à seità n’atività sensa più grandi inprese fin che’l destìn no’l g’à taià le ale.
Nel 1935 sul so idrovolante, un S.80, dopo un volo a Forte dei Marmi a Genova, è morto, par un incidente in fase de amaragio, Edoardo, el fiól del senatór Giovanni Agnelli diretór generàl de la FIAT e el  “Moro” che l’aéa colaudà l’aparechio, no’ l’è riussì a descolparse tantopiù che i g’à inpedì de publicàr o mostràr in qualche maniera el resoconto de l’inchiesta tecnica fata sul relito, inchiesta che diseva ciaramente che le norme de sicuressa del regolamento italiàn i era al de soto de quele dei altri paesi. Dopo sto grave incidente che g’à tolto a Ferrarin la possibilità de continuàr la só atività de colaudadór, non solo de le linie de Agnelli ma anca de tute le altre sul teritorio italiàn, el”Moro” dopo averghe dimandà aiuto, no’ se sa ben con quàl risultato, a Mussolini, l’è tornà, durante l’ultima guera, a la só atività de colaudadór in altre dite areonautiche italiane e proprio durante el colaudo de un prototipo del SAI 107 (che zà l’avéa fato altre vitime), Ferrarin l’è morto a Guidonia lassando moiér e dù butini ancora picoli.
L’èra el 18 luio 1941.
La çità de Thiene la ga dedicà a Ferrarin el so Aereoclub.

Wanda Girardi Castellani