L’Angolo de la Wanda – Giugno 2007 – “E ‘DESSO… PARLEMO de GATI”

…a cura di Graziano M. Cobelli

gcobelli05@gmail.com

Quatro Ciàcoe: da Verona

E ‘DESSO… PARLEMO de GATI

Tra le creature che el bon Dio l’à messo a popolàr la tera mi penso che la più libera, per çerti versi la più inteligente e de çerto la manco in pericolo de estinsión, la sia el gato.
Dove che son nata e cressuda ghe n’era un esercito, bastardi de tute le misure e i colori, anca parché l‘è assè difficile par ci g’à in casa ‘na gata de rassa, de quele, par intèndarse, con tanto de pedigree, tegnerla a la larga dai mas-ci plebei, boni de passàr dapartuto piassè de l’aqua e ‘l vento, ‘Na me amiga, tanto par far n’esempio, la s’à catà la só pressiosa miceta persiana che, specialmente quando che la andava in calda la tegnéa serà-su a riparo nel só apartamento al quinto pian… incinta. La m’à telefonà par contàrmela, fóra da la grassia de Dio! Scartando la possibilità de ‘n altro intervento divìn, la se dimandava come podéa essar sucesso el fato nefando. Beh… ‘na sera l’à imbrocà propio el “sedutór”… overo un suriàn, più svelto de n’ acrobata del circo Togni, che l’èra riuscì a rivàrghe in casa saltanto da ‘na gronda a un pontesèl, da un pontesèl a ‘na finestra e passando a la fin dal speretón si e no largo ‘na spana del finestrìn del cesso.
La me amiga (vendeta, tremenda vendeta) l’à lustrà e caricà el s-ciopo da cacia de só poro marì e la m’à giurà che se la intivava a pescàr n’altra olta quel fiol d’un can (se fa par dir) de gato la l’avarìa inbalinà de bruto. Ma intanto la nobile micia la g’à fato 5 gatini, tuti de pura rassa bastarda!
Ma tornando a via Cantarane, teatro de la me infanzia, g’aveimo, specialmente ne le càntine e nei granari, de quele pantegane da esposissión e l’unico rimedio i era i gati, in batùa giorno e note.
‘Desso, tra “polpetine”, crocantini, kite-kat, ton in scatola e altri boconçini publicisadi a la TV con spot da milioni, i gati, ben passudi sensa spendàr fadiga, dopo aver fato anca el “rutìn”, i passa le ore a ronfàr e a lecarse el pél, sdravacadi su ‘n sofà. De corarghe drio ai rati o ai usèi i ghe n’à poca voia. In altri tenpi si che i lo savea far el só servissio, tanto è vero che quando i vesentini i g’à ‘vu l’invasión dei rati i s’à rivolto a Venessia che de gati su e zo par cali e canpièi la ghe n’avéa un sterminio, e la Serenissima la ghe n’à spedì un bel pochi de quei tipo “marines” d’assalto. ‘Na òlta despestà i rati, po’, i vesentini i s’à inacorto che quei gatoni venessiani grassi come fighi-butieri, messi a sguassseto no’ i era gnente mal. Eco come che è vegnù fora el deto “vesentini magna gati”. Me ricordo, a ‘sto proposito, che in ‘na spece de alegra contesa de la qual ho parlà pura su Q.C., noialtri veronesi emo portà notetenpo ne la piassa principàl de Vicensa un gatón de cartapesta… semenando contemporaneamente qualche çentenàr de pele de gato tarmade (crompà sul marcà de Milan) par tuta la çità.
In tante case, specie in campagna, gh’è na sportela che se verse e se sèra tipo “far-west” par far passar el micio de casa. ‘Sta sportela la se ciama “gatara” e ne la nostra provincia gh’è adiritura un paese che’l d’è fornì al punto che i l’à nominà “Valgatara”
Comunque… se a Roma gh’è ‘na ben nota concentrassión de gati al colosseo, anca la nostra ‘Rena la ghe n’à la só bona parte tanto che durante la rapresentassión de n’opera, sassinà da ‘na senografia del “cucurucù”, compagnà da le sganassade dei quasi vintimila spetadori, à traversà el palco, pian-pianela da drita a sanca un bel gatòn moro co’ la coa drita come ‘na bandiera. La foto che g’ò scatà l’è stà publicà su Q.C. soto el titolo “Da la Rena scapa anca i gati”.(Q.C. 1988- n°11).
Èle po’ che serenade le fa ‘ste bestie quando che le va in amor ! Un strassio par le rece! ‘Na note me papà, sburtonà da me mama, convinta che in strada fusse sucessa ‘na tragedia, l’è andà zó in pigiama a çercàr el” butìn bandonà ne la neve”…!
El gato el spunta fora spesso nel nostro parlàr dialetto in tanti modi de dir.
Quando che s’è in pochi “s’è quatro gati!”, i butini prima de inparàr a caminàr i “gatona” o i va “a gato gnao”. Quando a mesodì no’ gh’è pronto in tola, se usa dir che “gh’è l gata sul fogo” o che “gh’è el gato che zuga co’ la cadena del camin”. Le rosarie veronesi le finisse sempre con “un gato sgonfo e un gato pelà… cóntemela ti che mi te l’ho bela e che contà”. Quando po’ ùn el se ciapa ‘na còta de quele màuche se dise ce “l’è inamorà come un gato” nel mentre de ‘na dona che te varda a oci sbaceto se dise che l’è ‘na “gata morta”. Parfìn pa’l tradimento se scomoda el “mamao” : “tradidór pèso de’n gato”, “ladro come un gato”, “furbo come un gato”, “silensioso come un gato” Quando se se cata ‘na rogna se usa dir “g’ò ‘na bruta gata da pelàr”. In finis, gh’è ci “g’à sete vite come i gati” e “ci casca sempre su le quatro sate come i gati”!
In Veronetta , nei pressi de la stassión de porta Vescovo che ‘na volta l’èra la principale (Porta Nova l’èra solo stassion militare) con partense e arivi de viaiadori fin da la metà del mileotossento, esiste ancora un sotopassagio che colega la stassión con el Porto San Pancrazio; un buèl nero, scuro e streto tanto da meritarse el nome de “Buso del gato”. Nei ani trenta noialtri buteleti de porta Vescovo ghe andaimo a zugàr. ‘-Dèsso… amesso che’l sia ancora accessibile, no’ sarìa miga prudente infilarseghe drento.
Oltre a ‘stó carateristico tùnel, Verona, la g’à dedicà al gato anca un vicolo che se vèrse da via Sotoriva.
Che ‘sta bestia la g’abia inoltre particolari virtù, l’è un fato. Un gatón che’l sta de casa in piano tera quando che’l vol tornàr dentro el se parecia davanti al portón. Al primo che riva el ghe va soto e vardandolo co’la coa drita el ghe rifila un sonoro “miao!!” ’Na olta dentro po’,… el va davanti a la porta de casa sua, el te varda da novo e de “miao” el te ne dise dú.
Quanto al gato in “cusina”, tanti i lo ciama “capòn da copi“ e me risulta che anca da ste parte qualchedùn in pignata el ghe finisse, tanto è vero che el “Re dei coghi”, Giorgio Gioco nel so ricettario “La cusina scaligera”, el ghe ne dà anca la riceta. Personalmente credo che i me l’abia rifilà, ‘na òlta, par “léoro in salmi” e par quel che me ricordo l’èra anca bon!
Par èssar sicuri che no la ve toca anca a voialtri… ricòrdeve de rifiutàr con decisión el cusideto “salmì”; vedì de verghe nel piato qualche costa… cusì: se l’è piata savarì de poderve fidàr che l’è leoro o cunèl… ma se l’è tonda, ocio… che podendo ancora la farìa: miao… miao!!

Wanda Girardi Castellani