L’Angolo de la Wanda – Giugno 2008 – “…el MONDO de … EDMONDO”
…a cura di Graziano M. Cobelli
gcobelli05@gmail.com
Quatro Ciàcoe: da Verona
…el MONDO de … EDMONDO
Come g’ò ‘vu zà modo de dirve, da butina, a la dimanda : “Come te ciàmito?”, me mama la m’avéa insegnà de rispóndar, fasendo un grassioso inchino: Wanda Girardi ai suoi comandi!
Se i me ofriva ‘na caramela, un biscotìn o altro, dovevo dir: “grassie… non si disturbi!”
…e se par caso i ripetéa l’oferta: “Grassie, si, ma una sola!” Capitava po’ che no’ i fasesse insistensa cusì restavo a boca suta.
In casa dei altri no’ se dovea andar in olta a curiosàr pa’i locali ne tocàr roba che no fusse nostra. I te ripetea come litanie: “Guardare e non toccare è una cosa da imparare”. Tra le regole de la bona educassión gh’èra anca quela de no’ infilarse mai nei discorsi dei grandi, de no’ mètarse i dei nel naso, gratarse e, soratuto, de star sentà composte e no’ co’ le cótole parària a mostràr le “vergogne”.
A tola, specialmente a la dominica quando gh’èra anca el papà, prima de tor-su el cuciàr se dovéa co’ le manine giunte ringrassiàr el Signor par el dono del pan che, ben comodà su la toàia bianca de lissia el mandava intorno un profumo che no ghe n’èra de meio. A spartìr el magnàr l’era la mama e el primo servì l’èra el papà… overo el capo de casa. No’ se doveva mètar le mane nel piato grando e no se dovéa doparàr i dei ma le possade.
‘Pena svei la matina el primo pensiér l’èra par nostro Signor e l’orassión la scominçiava: “Te ringrassio par la bona note che te m’è da”. A ora po’ de andàr in leto gh’èra un cambiamento: “Te ringrassio par el bon giorno che te m’è da” e el ringrassiamento l’èra anca par tuto el parentame… compreso gato, can e canarìn. Picà sul muro de l’ingresso gh’èra inmancabilmente el Crocifisso. Su quel de la càmara, ‘na Madona co’l só butìn e qua e la qualche Santo. In casa Girardi inperava Sant’Antonio, in forma de quadreti, statuine e santini. El gh’èra parfìn tacà al manubrio de l’adorada motocicletta de me papà; la DKV (cronpà co’ ‘na barca de canbiali), con ligà davanti un masseto de fiori de ceruloide.
I buteleti ai me tempi i era ben contenti de dar ‘na man in casa. Le fémene le lavava o le sugava i piati, le pelava le patate, le sgranava i bisi, le andava far la spesa e soratuto le se destrigava e le netava la camara, nel mentre i mas-ci i andava in cantina a tor la legna e ‘l carbón, i jutava el papà ne le faturete de casa ecc. Insoma, imparàimo tuti, co’ le bele maniere e el rispeto par i veci, anca a rèndarse utili! Miga come i fioi de ancó che ‘péna i entra in casa i mola tuto sul paimento, pò’ sensa gnanca dirte ciao, i verse el frigo e, a mane e boca piene i se senta al computer. Ti… te gh’è a ‘sto punto l’inpressión de èssar trasparente o un mobile de casa bon de ciapàr consistensa solo quando i g’à da bàtarte cassa. De solito i se cambia maie, maiete e mudande sbatendo quele sporche in t’un cantón. Quando po’ no’ gh’è più gnente de neto nei calti i va a crompàrsene de nove… dato che i soi i ghe passa pura ‘na sostansiosa, manceta. Quanto al “galateo”; qualche domenica fa, invitada a ‘na festa de compleano, par averghe fato n’osservassión a ùn de 6 ani, me son ciapà ‘na pessatada ne la caùcia con la zonta de un: “vaffan…”. El belo l’è che só pàre el va a contarlo in giro come ‘na braùra!
De ‘sti ciari, quando se anuncia la visita de qualche amiga con al seguito fioi al de soto de i dies’ani, vien voia de métarse le mane nei cavei. Par regola se mete via tuto quel che podarìa andar roto e se tól preventivamente ‘na Cibalgina. El fato l’è che mentre i tati de ‘na olta i zugava co’ i so trapèi in corte, co’ i amiçi, a l’aria e al sol, quei del “domila” inveçe i è a tute le ore col dedrio incolà a ‘na carega… a scola come a casa. Davanti a la TV o a un computer. Tra telefonini, tivufonini, CD, DWD no’ i va mai fóra a ciapàr ‘na nina de ossigeno e te li vedi palidoti, nutridi solo de marendine de ciocolata, un s-ciantìn nevrastenici e sempre da par lori!
I vestiti “grifadi” i era de-la-da-végnar. De solito noialtri se portava quei “scapadi” ai fradei più grandi che, da só parte, i vestiva quei del papà… roersadi e ridoti a misura.
I libri de scola i costava poco e a la fine de l’ano scolastico, cavado-via el foio de carta da giornal messo a protessión de la copertina, se li vendeva a metà presso par po’ crompàr, sempre a metà presso, quei de l’ano in corso… E come i era bei i “remigini” col so grembialin nero o bianco e la càpola azura o rosa… tuti precisi, siori e poareti, co’ la “busta” de cartón “finta pele” in man! La marendina che la mama ne dava drio la consisteva quasi sempre in un pomo. Ma mi, ‘na olta ogni tanto g’avéa la banana, invidiatissima da le compagne. Corneti de ciocolata, brioche e consimili i era robe che gnanca se saveva come che i era fati.
Ieri, destrigando la montagna de libri che imbuga fin ai sofiti la me casa, ò ritrovado quel più leto e amà da le elementari ani trenta/quaranta; “Cuore” de Edmondo De Amicis e m’è vegnù la sghia de rilésarlo. Ma èrele robe vere… robe possibili o rosarie, anca alora, come le de par ai nostri di? Garrone, Coretti, Precossi, el “picolo scrivàn fiorentìn”, “la picola vedeta lombarda”, el muradoreto, la maestrina da la pena rossa, el maestro Perboni e tuto quel mondo fato de bontà e de gentilessa ‘pena sfrisà da un Franti che a paragón dei scolari del 2000 l’è ‘n angeleto… èreli esistidi o èreli personagi de fantasia?
‘Ah… “mondo de Edmondo”, dove che a casa e a scola i ne insegnava quai che i era i valori de la vita, l’amor par el Signor, par la fameia, par la Patria! Quando che ‘l tricolor el sventolava da le finestre miga solo par ‘na vitoria in ‘na partia de balon!
Me le ricordo ancora quele pagine de De Amicis che la me maestra la n‘à insegnà co’ i oci che ghe brilava come stele, umidi d’emossión… parole che le me canta ancora ‘dèsso nel cor, luminose e indelebili come quele del Padre Nostro e de l’ Ave Maria:
“Italia, patria mia, nobile e cara terra dove mio padre e mia madre nacquero e saranno sepolti, dove io spero di vivere e di morire, dove i miei figli cresceranno e morranno; Bella Italia, grande e gloriosa da molti secoli, unita e libera da pochi anni, che spargesti tanta luce d’intelletti divini sul mondo e per cui tanti valorosi moriron sui campi e tanti eroi sui patiboli; madre augusta di trecento città e di trenta milioni di figli; io, fanciullo che ancora non ti comprendo e non ti conosco intera, ti venero e t’amo con tutta l’anima mia e sono altero d’esser nato da te e di chiamami figlio tuo!”
Dov’ èlo andà a finìr a l’alba de ‘sto 2008 l’orgoglio de Patria?
L’è restà serado tra ‘ste pagine ingialide con ancora tanti bechi piegadi a segnàr le più entusiasmanti.
Càpita de raro che ‘sta nostra pora Italia la vegna nominà. De solito, sia sui giornài che par radio e TV se ghe fa riferimento con el termine generico de “paese”! Pàr che tuti i s’abia desmentegà la storia gloriosa de la nostra nassión, cuna de grandissimi geni. No, ‘sta qua, in man de “capi” boni solo de begarse tra lori par la sola rasón de conservarse la carega… ‘sta qua, sepelì da le sgaùie, no’ l’è de çerto più l’Italia che à conossù quei come mi; el mondo… de Edmondo che nel ricordo el ne dà un un strucacor de nostalgia da farne mal.
Wanda Girardi Castellani
NOTA: Edmondo De Amicis, autor del libro “Cuore”, el più leto e amà dai buteleti de la me generassion, l’è nato a Oneglia el 21 otobre 1846 e l’è morto sent’ai fa a Bordighera l’11 marso del 1908.
