L’Angolo de la Wanda – Giugno 2016 – “L’“Ercole” del Tiepolo”

…a cura di Graziano M. Cobelli

gcobelli05@gmail.com

Quatro Ciàcoe: da Verona

L’“Ercole” del Tiepolo

Quando el 24 April del ’45 i tedeschi i è scapà da Verona, come ultimo “ricordin” i n’à fato saltar tuti i ponti, sensa gnanca averghe pietà par quei storici come el “Ponte Piera” o quel de Castelvecio. Quel che fa rabia l’è che i l’à fato più par la solita precision tedesca che par altri motivi… parché proprio no ghe i vedo i cararmati americani passar su quei ponti lì! Comunque quando è saltà par aria el ponte de Castelvecio, el spostamento d’aria l’è stà così violento da interessar anca i palassi nobiliari lì vissin. Uno in particolare l’era el “Canossa”, disegnà da Michele Sanmicheli nel 1527 par quela antica fameja che gavéa ’vù tra le so file anca Matilde nel XI secolo e Maddalena ne l’800: santa e fondatrice de le “fiole de la carità”.

Nel salon principal del palasso el scosson l’è stà cussì forte da far destacar dal sofito un gigantesco afresco de Giambattista Tiepolo, opera che l’era lì a far bela mostra fin dal 1761. L’afresco, de ben 14 metri par 8 e rapresentante el “Trionfo di Ercole”, l’è ’ndà in mile frégole sul paimento, dopo un volo da çinque metri de altessa. Passà la guera, quando s’à fato la conta de i dani, se s’à acorti anca de lu. Ciaro che ghera problemi più grossi da risòlvar: el 40 % de i edifici l’era lesionà, i ponti no i ghera più, le stassioni feroviarie i era un disastro…

Comunque tra ’na roba e l’altra s’à trovà anca el tempo par dedicarse a l’“Ercole” del Tiepolo: con infinita passiensa s’à catà sù i vari tòchi (grandi da mèso metro a pìcoli come un francobol) e, dopo averli contrassegnà come posission, se i l’à messi via dentro tante casse de legno. Alora no ghera né el tenpo né i schèi né la tecnologia par rimétarlo insieme: gnanca ’n esercito de certosini l’avarìa podù farlo. Çinquant’ani dopo però, col teremoto del 1997 è sucessa ’na roba simile: ne la basilica de Assisi la scossa, oltre che far quatro pòre vìtime, l’à fato anca s-ciantar in tera parte de la volta, opera de Giotto. Par restaurarla è stà creà aposta ’na tecnologia in grado de farghe far al computer el laoro de far combaciar le mejara de tochetini che s’avéa catà sù. El risultato l’è stà un capolavoro su un capolavoro!
Tornando al nostro “Ercole”, come che el fusse se lo sa ben: prima de la guera, proprio in prevision de bonbardamenti, l’afresco l’era stà prima fotografà (con ’na serie de foto, precise ma purtropo in bianco e nero) e dopo se l’avéa scominçià a “destacar”, partendo da la “cornisa” che girava atorno al salon. Però i costi alti e le longàgini burocratiche le avéa fato prima ralentar e a la fine fermar i laori.

Rivemo cossì a i nostri giorni: nel 2011 è stà tentà un primo restauro “virtuale”… è stà verto le casse par far ’na ricognission fotografica e, avéndoghe finalmente i “colori”, s’à podù “colorar” al conputer le foto in bianco e nero scatà nel ’40. El risultato l’è stà presentà in Gran Guardia qualche ano fà. Par el restauro “vero” resta da catar sù i schèi… Adesso che la tecnologia la ghè e che scominçia a rinàssar l’interesse de la gente, ghè speransa anca par el nostro pòro ”Ercole”. El recente furto al museo de Castelvecio l’à fato ciapar cossiensa a tanti veronesi del fato che, se gavemo un patrimonio artistico, l’è parché tanti prima da noialtri i s’à dà da far par salvarlo, e che l’è compito anca nostro curarlo e conservarlo par ci vegnarà dopo.

Wanda Girardi Castellani
Mirco Castellani