L’Angolo de la Wanda – Giugno 2017 – “Fra Giovanni Giocondo”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Fra Giovanni Giocondo

Se a i veronesi ghe domandì de la “Loggia del Consiglio”, tanti i cascarà da le nuvole… ma se ghe domandì de la Loggia de “Fra Giocondo”, quasi tuti i ve spedirà con sicuressa in Piassa de i Signori a védar ’n edificio gialo, su la sinistra, posà legero su colonine strete come grissini. Però a Verona Fra Giocondo el resta conossù solo par la “Loggia”… che tra l’altro l’è n’atribussion (probabilmente gnanca giusta) fata ne l’800. Ma ci èrelo Fra Giocondo? Cusì adesso, dopo aver parlà nel nùmaro de genar 2016 de Michele Sanmicheli, staòlta ve fasso conóssar ’n altro grande architeto veronese: Giovanni Giocondo. Partemo da l’inissio. Giovanni Monsignori el nasse ne la nostra çità intorno a l’ano 1433, cioè çinquant’ani prima de Sanmicheli. De i so primi ani de vita se sa poco, a parte che ancora zóane l’entra in convento da i Domenicani, ciapando el nome de “Fra Giocondo”. Nel ’400 le biblioteche “capitolari” i era el posto giusto par farse ’na cultura e Giocondo, dopo aver inparà greco e latin cusì ben da poderli insegnar, lesendo de tuto, el scopre che quel che ghe piase de più l’è l’architetura. Cusì, ’pena che el pol, el parte par Roma par ’ndar a studiarse le rovine antiche. Del so periodo romano resta solo un ponderoso libro su le epigrafi, che Fra Giocondo el dèdica a Lorenzo de Medici (so contemporaneo) e che dubito forte che el “Magnifico” l’abia mai leto. Comunque, a 56 ani (quando intanto Michele Sanmicheli de ani el ghe n’avéa solo 5) Fra Giocondo el vien ciamà a Napoli da i Aragonesi par ristruturar le fortificassioni.
Nela çità partenopea el se intratien fin al 1495, cioè fin quando el vien ciamà a Parigi da Luigi XII par ciapar el prestigioso incarico de “architeto de corte”. El periodo francese l’è uno de i più prolifici… Suo l’è el Ponte su la Senna, de fronte a Notre Dame, sói i è anca el “Petit-pont”, ’n’ala del Parlamento, dó famosi castèi e tanto altro ancora. In Francia el ghe resta fin al 1506 quando, a la veneranda età de 73 ani, el se trasferisse a Venezia a far l’ingegner militar (carica che vint’ani dopo la sarà del Sanmicheli). I laori che el fa par la Serenissima no se i conta… I le spedisse a Monselice, Treviso, Legnago, Padova… L’è cusì famoso che ’l papa Giulio II el ghe domanda un progeto par la nova basilica de San Piero. El disegno che Fra Giocondo el ghe invia podemo ancora védarlo, e ghè mancà poco che la cesa più inportante de la cristianità la vegnesse costruì su progeto de un veronese.
Intanto el nostro Giocondo, a quasi otant’ani sonà e tra mile laori, el trova anca el tenpo de realizar n’idea che el gavéa ne la testa fin da gióane: stampar el “De Architetura” de Vitruvio. L’opera che vien fora l’è un capolavoro: 136 tavole xilografade (sue) e ’na precision de testo e de disegno che solo ’na vita intiera dedicà a l’architetura la pol dar. Ma profitando de l’alta qualità de le stamperìe veneziane (Manuzio, Tacuino) el nostro frate el taca a sfornar libri a ruda libera… Parfin ’na tradussion del “Mondus Novus” de Amerigo Vespucci.
Nel 1514 la Serenissima la lancia el bando par rifar el ponte de Rialto (ancora in legno) e oviamente Fra Giocondo el manda un so progeto, sicuro de vìnsar. Quando el progeto el vien rifiutà, Giocondo el mola tuto e el se fionda par la seconda òlta a Roma: era ’pena morto Bramante e la diression del cantier de San Piero l’era passà a Raffaello… che a sorpresa l’avéa domandà ’na man proprio al nostro vecio frate. La costrussion l’era cusì in alto mar che ghera ancora speransa de resussitar el progeto fato par Giulio II. Ma un viajo del genere a 82 ani el sarìa pesante parfin a i nostri giorni… Fra Giocondo a Roma e ghe riva, ma solo par morirghe.
Coreva l’ano 1515. No se sa ben dove el sia stà sepelì… probabilmente l’è finì in ’na fossa comune come Mozart e Vivaldi. Ma ’l cantier de San Piero el portarà sfortuna anca a Raffaello: el morirà da lì a 5 ani, e a la verde età de 37 ani. Nel 1527 la Serenissima, orfana del so architeto, l’assumarà ’n altro veronese: Michele Sanmicheli.

 

A Verona nel 1493 vegnèa inaugurà la “Loggia del Consiglio”. I laori i era inissià quasi vint’ani prima su un progeto talmente tirà par le longhe (sucedèa anca alora) che ormai nissuno se ricordava più de ci el fusse. In un angolo de la “Loggia” ghè ’n bassorilievo che mostra un frate con un libro in man… quelo, l’epoca de costrussion, el stile… fatostà che ne l’800 s’à uficializà quel che el “popolino” el diséa da secoli: el progeto l’è de Fra Giocondo. (Che po’ el sarìa el frate del bassorilievo). No se sa altro… però me piase pensar che la storia la sia vera, cusì che a Verona se possa averghe almanco qualcosa de suo, de “Fra Giocondo”, uno che à costruì ponti in Francia e cese a Napoli, uno che poco ghè mancà che el fasesse San Piero a Roma e che qua, ne la so çità, no’ ’l ga manco ’na statua.

 

Wanda Girardi Castellani
Mirco Castellani