L’Angolo de la Wanda – Giugno bis 1998 – “Al baritono Piero Cappuccilli el premio “Una vita per la lirica””

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Al baritono Piero Cappuccilli el premio “Una vita per la lirica””

“L’è stà el basso Bonaldo Giaiotti, ultimo assegnatario del premio, a consegnarghe a l’altretanto famoso colega el premio “G.Zenatello””

Malgrado la giornada quasi estiva, la bela sala del Circolo Uficiài in Castelvecio (Verona), dominica 26 april za un’ora prima l’èra piena come un ovo e se ghe respirava ‘n’aria de entusiastica ‘spetativa. L’avenimento el meritava dal bon de èssar preferì a la gita al lago o in montagna.
La tredicesima edissión, 1998, de l’ormai famoso riconossimento assegnà nel nome de l’indimenticabile tenor Giovanni Zenatello, al qual se ghe deve, tra l’altro, l’idea, nata nel 1913, de usar l’anfiteatro veronese par l’alestimento de opere liriche, l’è stà dedicà ‘stó ano al baritono Piero Cappuccilli che dal 1966 al 1992 l’à cantà quasi ininterotamente in Arena.
Nato a Trieste nel 1929 e da principio invià a l’architetura, l’à po’ seguì la so passion studiando canto soto la guida del maestro L. Donaggio. Dopo aver vinto i concorsi de Spoleto e de Vercelli, el debutto el l’à fato nel 1957 al Teatro Novo de Milan in “Pagliacci”, nela parte de Tonio. Cusì l’à scominçià ‘na brilante cariera che l’à visto e sentì su tuti i più grandi teatri del mondo. El so nome però l’è ligà particolarmente, oltre che a l’Arena, ala Scala dove, a partir dal 1964, el s’à esibido, anca lì in continuassion con successi memorabili come el storico Simon Boccanegra de Abbado-Strehler (1971), el Macbeth ancora con Abbado-Strehler (1975 e Otello de Kleiber-Zeffirelli (1976).
Dotà de ‘na voçe dal timbro caldo, estesa e sostegnù da ‘na coreta emission, Cappuccilli el s’à anca distinto par l’arte teatral interpretativa e par el spirito giovanìl con qual l’à senpre afrontà i so personagi. Con el basso Bonaldo Giaiotti, l’è considerà tra i più grandi e aclamadi interpreti verdiani, subentrà, nel cor dei melomani, a l’altretanto grande Bastianini.
Purtropo, nel 1992, dopo un memorabile Nabucco areniano, nel ritorno da la me çità, in autostrada, el g’à ‘vú un bruto incidente che l’à lassà in come diversi giorni, troncandoghe praticamente la carriera; a Verona, quindi, l’è stà l’ultima volta che s’à podù sentir dal vivo la so splendida voçe.
Ma ‘dèsso parlemo un poco de la cerimonia ‘Na vita par la lirica” e del concerto ch’è seguì, dominica 26 april 1998.
A vèrsar el dopodisnar nel bel salon del circolo Uficiài de Castelvecio, a la presensa del Sindaco dr. Michela Sironi, dell’Assessor dr. Manlio Fichera, del Vicepresidente de l’Ente Lirico, dr. Campanella e altre autorità, l’è stà el giornalista e critico musicale dott. Gianni Villani che, con la so ben nota competensa, el g’à impiturà el ritrato al festegià faséndone anca sentir do splendide incisioni, dal Macbeth e dal Simon Boccanegra. La consegna del bel trofeo realisà dal nostro Angelo Antoniazzi, a Piero Cappuccilli el ghe l’à fata Bonaldo Giaiotti che l’à po’ anca inaugurà, co’ la romansa “non più andrai farfallone amoroso (Mozart) el concerto in onor del colega cantando de seguito altri du brani d’opera. A ‘sto punto, eco ‘na gran bela sopresa; un tenor giovanissimo, alievo de Carlo Bergonzi: Giorgio Casciarri, dotà de ‘na voçe da lassar tuti a boca vèrta! N’estension più unica che rara e tanto de quel sentimento, ne l’interpretassion, che po’ dai aplausi è quasi vegnù-zo el sofito! Tegnèmolo de ocio parchè l’è facile pronosticarghe un gran bel avenir e de sicuro el ghe farà far senpre ‘na figurona al so celebre Maestro, Bergonzi (al qual ‘sto ano consegnaremo el premio Lugo).
La ‘stessa maravèia e el ‘stesso pronostico (facile-facile) anca par el soprano; la bela e simpatica cinesina Lucia Lui che la g’à ‘na voçe d’angelo piena de grassia, oltre che de forsa e temperamento.
Finì el concerto, artisti e fans dei medesimi… tuti a la grépia, dove, ‘na scarica de foto, mi, tanto par cambiar, g’ò rifilà anca a Cappuccili le me poesie; la poetessa maledeta l’à colpìdo ancora!

In finis, complimenti al deux ex machina del circolo Zenatello; el bravo, simpatico, instancabile Nando Tavoso, bon de organisar robe de sta fatessa e al “fotografo de bordo” Maestro Luciano Pollini che me fornisse senpre (e gratis) el material fotografico!

Wanda Girardi Castellani