L’Angolo de la Wanda – Luglio 1998 – “A Carlo Bergonzi… la 5° edizione del premio “G. Lugo””.

…a cura di Graziano M. Cobelli

gcobelli05@gmail.com

Quatro Ciàcoe: da Verona

“A Carlo Bergonzi… la 5° edizione del premio “G. Lugo””.

La sera del 19 agosto 1998, sul palcossenico de l’anfiteatro Arena ne l’interval tra el 1° e el 2° ato dela Tosca, vegnarà consegnado al grande tenor CARLO BERGONZI el trofeo “Giuseppe Lugo”; prestigioso riconossimento che dal 1994 premia i tenori che magiormente i à onorà la lirica, specialmente quela italiana, nel mondo.
CARLO BERGONZI, nato el13 lujo 1924 a Vidalenzo de Polesine Parmense, poco distante da i paesi de Verdi e Toscanini, l’à scominçià a cantar da giovanissimo ne la so cesa. L’à po’ ciapà lession dal Maestro Edmondo Grandini che, da prinçipio, el I’à clasificà “baritono”. Durante la guera l’à dovù però sospendar tuto, tanto più che l’è stà’ fato prigionier e deportà in Germania.
Tornà a casa, stuà el tenporal,el s’à iscrito al conservatorio “Arigo Boito” de Parma. Lì, anca el so Maestro, el celebre Ettore Campogalliani, e el diretor d’orchestra, l’altretanto grande Tullio Serafin (con el quàl el g’à ‘vù ‘n’audission a la Scala nel 1947), i l’à confermà “baritono”.
El debuto, apunto come baritono, l’è stà’ a Lecce nel 1948 nel Barbier de Siviglia, ‘ndo l’à sostituido Tito Gobbi. Anca nei tri ani sucessivi, viçin a Tagliavini, Schipa, e Gigli, l’à seità a ricoprir ruoli da baritono ma grassie a la scola, a l’inteligensa, a la qualità de la tecnica vocal e a l’aiuto de le registrassioni de grandi come Pertile e Caruso, ben presto l’è rivà al DO acuto, passando al registro de tenor. In ‘sta nova vesta l’à debutà el 12 genar 1951 in Andrea Chenier al Teatro Petruzzelli de Bari par po’ ciapar el volo verso tuti i altri grandi teatri del mondo.
La critica, oltre che tenor lirico verdiano, la lo considera uno tra i più grandi tenori de tute le epoche. El so repertorio l’è sior de ben 71 opere, 25 incisioni complete de altretante opere, ‘na infinità de incisioni de concerti nei quai l’è stà direto da famosi diretori d’orchestra come: Serafin, Karajan, Gavazzeni e altri. L’à cantà con ilustri coleghe come la Olivero, la Callas, la Tebaldi, la Price e ancora: la Stella, la Simionato, la Lazzarini, la Cossotto ecc…
A l’Arena de Verona l’à esordì a cariera za avanti, el 27 lujo 1958 in Aida che l’à po’ da novo ripresentà nel 1960, 61, 66, 69, 71, 74. Nel 1959 e nel 1975 l’à cantà “La Forza del destino” e nel 1960 “I pagliacci”. “Un batlo in maschera” nel 1962, “Gioconda” nel 1963 e 1973, “Mefistofele” nel 1964, “La Messa da Requiem” de Verdi nel 1966 e “Trovatore” neI 1968. Po’: “La traviata” nel 1970, “Cavalleria rusticana” nel 1972 e “Tosca” nel 1974.
Nel 1990 l’à cantà al “Concerto dei Tenori” in onor de Beniamino Gigli.
Ultimamente Carlo Bergonzi l’è riussì a coronar el so desiderio de riaparir, in una serie de concerti, in tuti i più grandi teatri del mondo dove l’avea cantà durante la so longa e prestigiosa cariera.
EI premio el ghe vegnarà consegnado dal Sovrintendente de I’ente lirico, dr.Gianfranco De Bosio contornà da tuto el Comitato Giuseppe Lugo, primo fra tuti l’ideator e I’ instancabile organisador de tute le manifestassioni comemorative relative al nostro grande Giuseppe Lugo: el Maestro Luciano Pollini.

Wanda Girardi Castellani