L’Angolo de la Wanda – Luglio 2000 – “El tenpo dei asili”

…a cura di Graziano M. Cobelli

gcobelli05@gmail.com

Quatro Ciàcoe: da Verona

El tenpo dei asili

I me conta che mi son stà assè precoce; croçe e delissia de i mei de casa. A tri ani, al famoso circolo “Bus”, talmente grando da ocupar tuta la piassa Citadela, sbrissiàndoghe via da le man a me papà son andà in mèso a la pista a far le scriòltole co’ i paiassi che sùbito i m’à “adotà”. G’à vossudo “l’autorità” del diretor par costrensarme a tornar al me posto da ‘ndo me papà el se stava sbrassando da parer un mulin a vento.
Quel stesso ano, inamorà de tuti i “botoni lustri” (divise), vedendo passar soto casa un “cana” (vigile), sita-sita son andà fora e me son messa a caminarghe drio fin che, mèso chilometro dopo, finalmente el se n’à inacorto e, dopo èssarse informà de ci ero e da ‘ndo vegneo, el m’à menà a casa. Oviamente, la “filiola prodiga” la s’à guadagnà ‘na carga de sculassoni!
Un’altra de le me passioni: el “Rigoleto” de Verdi. Con un parecio costituì da un vecio capèl de me mama guarnì de piume e un par de calse co’l bordo taià a merli, cantavo “bela filia de l’amore schiavo son dei vessi tuoi / con un “dito” (e sventolavo l’ìndice) sol tu puoi / le mie pene a consolar”. Al tenpo ero in cura par ‘na bronchite cronica dal stimatissimo prof. Pasoli che, apena el me vedeva entrar, el me meteva in pie su la scrivanìa, intimàndome: “Canta!!!”. Lo vedo ancora, co’ i brassi incrosà e la facia seria. Come el riussisse po’ a no’ sciopar dal rìdar, propio no’ lo sò.
A l’asilo, che l’èra de fronte a casa mia, i me g’à messo a poco più de tri ani, per solevarse un fià da tuti i spaènti e subito ò scominçià a far tribular anca le moneghe “capelone” al punto che ‘na òlta le m’à parfin serà in un armaron. In compenso, svelta a imparar tuto, son deventà la “stela” de i sagi.
De quel’asilo g’ò diversi bei ricordi che spartisso con qualche compagno ancora al mondo. Là, più che altro, i te insegnava a pregar ma fora, nel cortil, se zugava a la “peta”, al “s-cianco”, a le “pice”, se fasea el”girotondo”, se cantava le vece filastroche: “Ma che bel castelo, macondirondirondela…”, “Ma quante belle filie madama Dorè”, ecc…
A pranso, i te infilava la scudela in un buso tondo ritaià nel legno de la tòla cusì l’era pressoché inpossìbile roersar l’eterno minestron che costituiva el menù. Dopo pranso, i te fasea far el pisoleto co’ la testa tra i brassi incrosà su la stessa tola e guai ci rebufava!
Nei ani Trenta, se usava far un par de sagi, soto Nadal e Pasqua e uno, el più inportante, a la fine de l’ano. Mi g’avevo un poeta in casa; me papà, che’l me insegnava quel che in’ ste ocasioni g’avea da dir. Me mama, po’, la me cusiva i vestiti de “sèna”.
Al primo sagio (g’avevo tri ani) ò recità anca’ na poesìa, opera de un “papà del gnoco”, re del carneval veronese, del qual no’ me ricordo el nome. Me ricordo ben, in conpenso, i so versi:

EL PORO PITOCO

“Vento che tira / fredo che gela / el pòro pitòco l’è in braghe de tela / e quando el va a spasso/ el vede’ sti siori / sgonfi de cicia / col sìgaro in boca / che i marcia in pelicia. / A la domìnica el va dal becàr / a tor quatro ossi par far un gosso de brodo / ma el becàr che l’ è un omo ingrato / el ghe dà un toco de pegora e un toco de gàto. / Se pò’ el se mala / el va a l’ospedàl / e co’ le cure de sti bravi dotori / e de ste bone sorele / in do tre ore el ghe smena la pele. / Contarghe le rèchie / al pòro can … no’ se usa / Se’l ciapa pa’l cul / drento la cassa e zo ne la busa. / E Dio no’ vòia che anca el nostro bon Padreterno / ‘Sto pòro pitoco no’l te le sbata a I’infento!” (più pitòco de cusì!).

A quatto ani, el sagio l’ò fato con el capolaoro de Fusinato, “Venezia”, che m’avea insegnà papà Aldo con l’aiuto de qualche “papina sul copin”: “È fosco I’aere / il cielo è muto…”.
In quele feste, le butelete le g’avèa in dotassion un çèrcolo fodrà de carta “crep” rosa e con quelo, a fine rècita, se fasea” ‘na specie de baleto. Tuti, mas-ci e femene, rivàimo la matina con la nostra brava sestelina de paia con drento el bavaròl e la marendina generalmente costituì da un pomo o qualche biscotin “Osvego”. Mi, che qualche òlta g’avèa anca ‘na banana, passavo par ‘na siora.
L’ùltimo ano, prima de andar a le elementari, ò fato ‘na seneta, òpara de me papà. Vestida da veceta, con siàl e ociai andavo a crompar i biceri: “El diga, sior… g’alo biceri ?” – EI partner el dovea rispondar: “Mi si che ghe i ò e duri come un sasso!”. A ‘sto punto el “botegar” el dovèa piciar el bicer su la tòla. Beh, naturalmente el gòto I’è andà in mile tochi tra le sganassade del publico. Ogni tanto vegnea el buratinar Nino Pozzo a farne gòdar con Fasolin, Rosaura, Pantalon dei bisognosi ecc… e alora I’èra festa granda. Naturalmente trovavo el modo de romparghe le suste anca al brao Nino portàndoghe via el buratin che me piasea de più; la morte… e cissà po’ parché!
‘Desso, quando passo par borgo Venessia, revedo ancora me mama a spetarme dedrìo al cancel de fero. ‘Pena che, al sóno de ‘na canpanela, i lo versèa, corevo beata ne i so brassi vèrti; un canton de paradiso, tuto par mi.
L’ èra el tempo de i asili, scapà via cusì in pressia, ma inciodà sul muro de i ricordi; quei che, pensàndoghe ben, a rivangarli i fa più mal che altro.

Wanda Girardi Castellani