L’Angolo de la Wanda – Luglio 2004 – “UN GENOCIDIO QUASI DESMENTEGÀ”

…a cura di Graziano M. Cobelli

gcobelli05@gmail.com

Quatro Ciàcoe: da Verona

UN GENOCIDIO QUASI DESMENTEGÀ

La g’avèa un nome insolito, Sima, e l’èra ‘na doneta za avanti co’i ani, de’n metro e meso, si e no, sempre de corsa! La mastegava-su un fià de veronese smissià a l’italiàn e a l’armeno, la só lengua natìa. Scapà ci-sa-come al massacro de la só gente, da parte dei turchi, l’èra riparà a Verona dove l’avéa catà casa e amor. Pura tante òlte l’ò vista co’ la testa bassa e i oci mori, lustri de pianto e quando qualchedùn la interogava, la scurlàa la testa e la risposta, sotovoçe, l’èra sempre quela: “ah… robe teribilissime!”
L’Armenia, el cui popolo, rivà da la Frisia, el fonda le radise zà nel 1°milenio a.C., l’è costituì da un grande altopiano fra el Mar Nero, el Mar Caspio e ‘l Mediteraneo e el conprende la metà orientale de la Turchia, l’atuàl Republica Armena e altri teritori a nord-ovest de l’Iran, de l’Azerbaigian e nel sud de la Georgia. El monte principale l’è l’Ararat (5156 metri) andove che, finìo el diluvio universàl, l’à atracà l’arca de Noè.
Quel del popolo armeno l’è stà el primo genocidio del XX sec., un secolo che’l g’à ‘vu, in ‘stó canpo, un ben triste primato nela storia del mondo. El termine “genocidio” el g’à radise greche (“stirpe” e “ucisión”) ma l’è stà conià, novo, nel 1944 da Raphael Lemkin. El “genocidio”, come l’è stà definì a le Nassioni Unite nel 1948, l’è el pèso dei crimini contro l’umanità parché l’è direto a la distrussión totale de’n grupo nassionàl, etnico, rassiàl o religioso.
Da l’Anatolia nel 1915 par la prima olta, dunque, s’à inescà, da parte dei turchi, el proposito de scancelàr un intiero popolo colpevole solo de esìstar. ‘Na “solussión finale”, perpetrà pò’ sui ebrei dai nasisti durante la seconda guera mondiàl (definì “shoah”) e, anca da recenti e recentissime cronache, su altra pora gente.
L’operassión portà a conpimento dai fioi de la mèsa luna, soratuto dal moimento nassionalista dei “Giovani turchi”, in Asia minor, l’à visto la sparissión de un milion e meso de persone su ‘na popolassión de gnanca du milioni de etnia armena residenti alora ne l’impero otomàn; un vero sucesso dato che ancó no’ se cata, in quel cantón de mondo, più gnanca un armeno; destrigadi tuti co’ ‘na velocità e ‘na crudeltà da farghe invidia, no’ solo ai nasisti ma parfìn a le orde de Atila! Tanto par far ‘n esempio; i omeni i vegnea subito isoladi e deportadi (ma in realtà tolti da le spese). A Trebisonda in particolàr i omeni forti e giovani i vegnéa ligadi tra de lori su dele barche apesantide con dele piere, pò’ urtade al largo del mar Nero e lì fate segno de’n futìo de tiri a bersalio fin a farle andàr zó. Ancora ‘dèsso sul fondo de ‘stó mar, de fronte a Trebisonda, gh’è pién de ossi.
I armeni i à ciamà el só genocidio “Metz Yeghèrn”, cioè “grande male” e no’ gh’è dubio che grande el de sia stà!
Del meso milion scarso che s’à salvà, in parte grassie a l’avansada da est de l’esercito russo, e in parte parchè residenti a Istanbul e inisialmente anca a Smirne; çità viçine a sedi diplomatiche straniere, un pochi i è restà ne l’Union Sovietica, altri i s’à sparpaià pa’l mondo, America conpresa; ‘na diaspora che à tirà drento anca l’Italia e in particolàr el nostro Veneto, con speciàl riferimento a Venessia. Ma ne la çità lagunare i armeni i gh’era zà de casa fin dai primi albori tanto che diversi antichi documenti veneti i parla de ‘sto popolo come “benemerita e prediletta nassión”. A testimoniàr i boni raporti tra Venessia e i armeni gh’è ancora, tra l’altro, la splendida isola de san Lazaro dei armeni concessa da la Serenissima nel 1717. A Venessia inoltre è stà stampà el primo libro in armeno nel 1512.
El nome uficiàl de la só cesa l’è “Cesa Apostolica Armena” dato che el cristianesimo el ghe stà portà dai du apostoli Taddeo e Bartolomeo, propio li martirisadi. Ma l’è stà pò’ grassie a la predicassión de San Gregorio che nel 301 d.C. el cristianesimo in Armenia l’è deventà religion de Stato.
El genocidio dei armeni, cristiani ortodossi e cattolici, no’ l’è stà ‘na guera santa, come che i l’avéa proclamà i turchi, ma i “organizadori” i ghe l’à lassà credar ala só popolassión, quasi tuta analfabeta e da sempre nemiga de i “infedeli”. In realtà, come sempre, la rasòn l’è stà quela de poderse inpadronìr, atraverso ‘na crudelissima pulissia etnica, de le tere e de le richesse armene.
La fine del regime turco, seguì a la fine de la prima grande guera e l’avento al comando de Kemal Ataturk no’ la cambià la situassión, e tra el 1920 e el 1922 con l’ataco a la Cilicia armena e el massacro de Smirne el novo governo l’à tentà de perfessionàr el genocidio. Dopo, no’ è restà più un sol armeno vivo in Turchia.
Gh’è da zontàrghe che ‘sto genocidio non solo l’è restà sensa castigo, ma el g’à ‘vù pura un bon tornaconto, infati, la magior parte del teritorio armeno ancò el fa parte de la Turchia e l’armeno el vive ancora ‘desso, e da quasi un secolo, nela più granda diaspora conossù da l’evo moderno.

Wanda Girardi Castellani