L’Angolo de la Wanda – Luglio 2005 – “AMIGHE RONDENE”

…a cura di Graziano M. Cobelli

gcobelli05@gmail.com

Quatro Ciàcoe: da Verona

AMIGHE RONDENE

Ben çinque i è i nidi che le róndene à costruì a péna tri metri sóra el pontesèl del saloto e de la finestra de la camara, ‘na quarantina de ani fa. Me fiol Flavio el dise, un fià preocupado, che gh’è pericolo che uno de sti giorni (erudide da Forum), fasendo apelo a l’usucapión, le finissa col darne ‘na scarpà nel c… paràndone via de casa nostra!
Me ricordo che le à scominçià i laori  zà qualche mese dopo che èmuli del sór Pampurio del vecio “Coriere dei pìcoli”, èrimo aprodà, al quinto Samartìn, in quel de via M. Pasti nel nóvo quartièr Trieste; ‘n aquitrìn da farghe invidia a le paludi Pontine prima che Mussolini el ghe metesse rimedio. Me ricordo che, stufa de le pòce e del paltàn che me costringea a ‘ndar fóra co’ i “calaiù” (stivaloni da pesca), avea fotografà l’amigo Silvio Caliari, apassionà pescadór,  sentà sul la porta del casamento co’ la cana da pesca in man, la pipa in boca e la bareta de traverso. ‘Sta foto “protestataria” l’è stà stampà su l’Arena co’ la scrita: “In via Mateo Pasti se pesca le trote!”
Beh… tornando a le me amighe róndene, da quel zà lontàn 1964, i è tornà, sempre, puntualmente, ogni ano e mi ogni ano le speto co’ un poca de aprensión se le ritarda. G’ò ‘na paura viliaca che un colpo o l’altro le perda la strada. Intanto, soto ai nidi g’ò messo ‘na banda fodrà de carta de giornàl parchè quando le spassa i locali no’ le me inpenissa el pontesèl  de cachete, paie e oveti andà de mal. Qualche ano fa ho conbatù ‘na guera miga da poco con quei de sóto che i volea tiràr zò i me nidi in quanto i riussia a sporcar anca da lori. Tanto par podèr firmàr ‘n armistissio, g’ò parmesso a la fine de butàrghene zó uno, el quinto, cioè quel che più dei altri ghe stava sui co-cò… e ancora ‘dèsso, quando guardo parària, me se struca el cor a védar quei pòri “ruderi” restà sul muro. Me dimando sempre cosa le avarà provà de dispiasér le parone de casa quando, rivade puntuali in primavera, le s’à catade al scuerto… Forsi la stessa desperassión de tanti, ‘ne le noti del “43”, tornando dal rifugio!
Comunque, ‘dèsso no’ se pol più far de ‘ste brute assióni, in spece qua a Verona dove el Comune l’à emanà n’ordinansa che proibisse de abàtar o de danegiàr i nidi.
Mi a le me róndenele ghe voi propio ben. Lóre le s’à ‘bituade a védarme e le sèita a andàr avanti e indrio un metro sóra la me testa, come gnanca ghe fusse, prima rinfrescando e pareciando l’anbiente, po’ rifornendo de pape i picenini, che, inpassienti, spetando el papà e la mama, i fa un concerto da frastornàr le réce. A dìrvela tuta, quando propio no’ ghe ne posso più, vago fóra a sigàr: BASTA!! …e par qualche secondo i tase. Pò i taca pèso de prima.
In ‘sti quarant’ani, le me amighe róndene ò çercà de fotografarle un careto de volte e mai che ghe sia riussida! Ecole… i è lì, tacà al nido, co’ le ale de pingolón e mi svelta-svelta scato! Pò, sistematicamente, quando svilupo la foto nó ghe vedo che’l nido udo. I è sempre più veloci de la me machineta e, a ocio, le ghe tièn da mati a la só “privaçi”. Fato sta che, malgrado tuti i tròsi che ò fato par “fregarle”, le à finì senpre lóre col fregarme mi!
‘Desso ò  sentì che anca ‘ste meraveiose creature, sinbolo de la primavera e protagoniste de meiara de poesie in ogni epoca, i è in via de estinsión a causa dei veleni che i usa par despestàr i inseti che i è el  só magnàr. Insoma, par podér ‘vèrghe su la tòla un pomo sensa bao… che po’ no’l sà da gnente o, al massimo, da patata, se ris-cia de pagarlo co’ l’estinsión de le róndene. Beh… a ‘sto presso mi son da la parte dei pomi co’l “parón de casa”… che’l fa anca alegria, spece quando, dopo el primo morsegón, te ghe ne cati mèso!
De le róndene… da quando ghe convivo da bona coinquilina, ò tacà a interessarmene e ò imparà cusì a conossarle.
A colpo d’ocio le par tute ‘stesse ma i è de oto rasse (disemo cusì): El só nome classico… quel che ‘dòpara i “saoni”  l’è “HIRUNDINIDI”.
La RONDENA, quela de casa mia (19 cm.) la g’à la mascarina rossa, le piume dai riflessi metalici e el petesìn scuro. L’è riconossibile par la coa decisamente a forca. El so nido l’è circolare; ‘na specie de pontesèl che’l tièn fin a 5 rondinòti.
El  TOPINO (12 cm) el ghe someia al Balestrucio ma l’è de color manco scuro. El so nido, scavà ne l’arenaria l’è fato a tùnel.
El  BALESTRUCIO (anca lu 12 cm.) l’è più picenin de la rondine. El g’à la schena candida e el petesìn ciaro, come el topino el g’à la coa da la “forca” apena acenà. Le nidifica su case, ponti e rocce e le colonie le pol èssar anca de 100 nidi de fango a forma tonda, co’ ‘na finetrina de ingresso.
La RONDENA de montagna (15 cm.) scura, co’ la coa sensa ponte, la fa el nido de preferensa in montagna, l’è l’unica rondena che sverna da le nostre bande.
La RONDENA ROSSICIA (18 cm.) la se distingue par la macia sul gropón, la mascarina e el peto ciari. La fa el nido con un ingresso a tùnel.
Pò’ gh’ è i RONDONI (nome Apodidi)
RONDON (16 cm.)  ale a messora e coa curta. El color l’è griso scuro, el fa el nido soto i copi e qualche òlta anca su le ròce.
RONDON PALLIDO (cm.16) forsi l’è un poco anemico. Infati l’è de color ciareto!
RONDON MAGIOR (21 cm.) L’è el gigante tra le ròndene con quasi meso metro de ale, quàn i è vèrte. Panseta e gola ciare divise, con elegansa da premiere in Arena, da ‘na cintura scura.
In finis, se podarìa citàr anca…
le SALANGANE, o ròndene de mar, celebri par via dei só nidi che in Cina i è rinomadi come ‘na specialità gastronomica. Va ben che i cinesi i para-zó de tuto: cavalote, çentogambe, panaròti, scarpioni, formighe e via cusì, tanto è vero che mi, par no’ savèr nè lésar né scrìvar, nei ristoranti cinesi no’ g’ò mai messo pié (pardón :: bóca!)! Comunque el me caro Angelo che ne ‘stó ultimo febràr l’è andà a magnàr el pandoro in paradiso, qualche ano fa i l’à invità a tastàr propio un nido de salangana e quasi-quasi el se strangolava con de le canbrete de fero che, no-se-sà-parcosa, gh’èra tacà drento. Forsi ‘ste róndene le à inparà, par no’ farse fregàr i nidi dai cinesini… a fissarli su le roce con dele broche de fero!
Ma tanto… da quei li no’ se salva gnanca el Padreterno.

Wanda Girardi Castellani