L’Angolo de la Wanda – Luglio 2006 – “STEPHEN HAWKING”
…a cura di Graziano M. Cobelli
gcobelli05@gmail.com
Quatro Ciàcoe: da Verona
STEPHEN HAWKING
el fisico più famoso del mondo, erede de Einstein,
el g’à esposto a 4000 studenti padovani la só ultima
teoria su l’origine e la storia de l’universo.
Tra le inissiative promosse da “Padova çità de le stele” con l’università; Dipartimento de Astronomia, l’Aministrassion Comunal l’à invitado a Padova, tra l’8 e el 13 de magio, el prof. Stephen Hawking; el più grande astrofisico del mondo e el scritór de siensa più leto in assoluto, a spiegarghe a 4000 studenti de le scole superiori la só ultima stupefacente teoria: “el presente crea el passato”
‘Sto grande siensiato, nato nel 1942 a Oxford, giusto 300 ani dopo la morte de Galileo, el só idolo, fin da buteleto, laureado nel 1962, l’è stà’ colpì 6 ani dopo da sclerosi laterale amiotrofica. Malgrado però le previsioni mediche che le ló dava morto nel giro de tri ani e malgrado la tracheotomia che nel 1985 la l’à lassado conpletamente muto, gh’è stà assegnà la catedra che l’èra stà’ de Isaac Newton; catedra che l’è ancora sua.
Nel 1988 l’à publicà un bestseller tradoto in 40 lengue: “Dal Bing-Bang ai buchi neri”.
Nel 2005 la malatia la se g’à agravada al punto che ancó, inciodà su ‘na carega a rudele,… el se esprime grassie a un sintetisatór, colegà ai ociai, chel’ lese i moimenti della palpebra, de la ganassa e de l’ocio destro.
L’acoliensa dei studenti padovani l’è stada tuta ‘n esplosión d’entusiasmo quasi che’l fusse stà’ ‘na stela del “rok”, grati prima de tuto del fato che l’à afrontà, par parlarghe a ‘n publico dificile, come lori e ne le só condissioni, un viaio sicuramente assè fadigoso.
Nel Palasseto del sport dove che è avegnù el memorabile incontro, l’interesse manifestà in un silensio assoluto, prima, l’è stà po’’ seguì da l’esplosión de entusiastici aplausi.
Çerto che le teorie espresse dal prof, Hawking no’ i è de facile conprensión, specialmente par i “digiuni” in materia come la sotoscrita… pura ne l’ascoltarlo, nel lésarlo, gh’è da restàr a boca vèrta, afassinadi… o, meio, sconvolti come davanti al vérsarse de ‘na finestra su ‘n mondo infassà ne la più ardita de le fantasiense.
L’ultima teoria de ‘stó fisico ritegnù uno tra i più geniali sarvél del mondo, se pol sintetisarla in 5 parole: “el presente crea el passato”.
Secondo lu… “el passato, da l’origine de l’universo a ‘dèsso, l’è fisicamente determinà dai esperimenti che femo ancó. I è propio le nostre osservassioni atuali a stabilir che storia g’à avudo el cosmo; cosa mai è sucesso da la nassita de l’universo.
L’è comunque, disémosselo ciaro, un conceto che, par digerirlo, no’ bastarìa ‘na scamionà de bicarbonato… specialmente tegnendo presente che semo ‘bituadi a racontàr la storia in avanti, cusì un fato el ghe ne causa un altro e questo ancora ‘n altro, secondo la lege de la termodinamica… insoma, quela dela lege de Murphi che dise che le robe le tende sempre al peso! “Bisogna… (sempre secondo “Hawking) vardar la storia al contrario, partendo dal presente”.
Ai só oci el cosmo l’apàr come un un puzzle ingarbuià del quàl no’ conossemo el disegno!
El “profe” el riesse a farse intèndar con ‘na grande fadiga, pesando e seliendo a piàn, con cura le parole cusì su ognuna chi scolta g’à modo de meditàr.
“No’ sarìa contento (el dise) se i trovasse la teoria definitiva che spiega tuto. Dopo de averla catà la siensa la sarìa come un scaladór che finalmentre l’è rivà su la çima de l’Everest. L’omo el g’à bisogno de sfide a la só inteligensa. Sarìa ‘na barba èssar Dio e no’ averghe più gnente da scoprìr!”
“Mi no’ credo che semo soli ne l’universo ma le altre forme de vita caso mai i è massa distanti parchè se possa incontrarse!”
A la domanda “quala ela la vera storia de l’universo, fra tute quele possibili?”
Hawking el ne dà la risposta che zà n’à dado la filosofia:
“’Na teoria l’è solo un modèl matematico par descrìvar le osservassioni e no’l g’à nessuna pretesa de realtà.”
El ché vol significàr che pól esistar tante teorie difarenti, tute sientificamente valide, par descrìvar le ‘stesse osservassioni. Ogni teoria de l’universo che porta a quel che osservemo nel nostro mondo l’è ugualmente valida.
Esiste più universi possibili; noialtri vivemo in quel che à permesso la nassita de la nostra vita…
Anca se, a vardàr ben (l’à concluso el grande siensiato) avaressimo anca podù sèliar un posto mèio!”
Si… par la çità del “Santo” la presensa e le parole de Stephen Hawking le restarà memorabili ne la storia de la so cultura come el só esempio, malgrado el gravissimo andycap, de corajo e de entusiasmo che ‘l l’à portà in un viajo maraveioso che scavalca ogni più ardita fantasia.
A introdurre il concetto di QUARK (con questo nome si indicano le particelle subatomiche che, secondo la maggior parte dei teorici sarebbero i componenti fondamentali dei protoni e dei neutroni, i componenti dei nuclei di ogni atomo nell’universo, è stato GELL-MANN che li concepì e li battezzò, traendone il nome da un verso del poeta James Joyce: “three quarks for Muster Mark” (da Finnegans Wake).
Wanda Girardi Castellani
