L’Angolo de la Wanda – Luglio 2007 – “INIQUI VIRI DIABOLICI Ezzelino terso da Romano … un “cao de roba” in casa nostra”

…a cura di Graziano M. Cobelli

gcobelli05@gmail.com

Quatro Ciàcoe: da Verona

INIQUI VIRI DIABOLICI

Ezzelino terso da Romano … un “cao de roba” in casa nostra

“e quela fronte ch’a il pel così nero” (Dante, “Divina commedia” inferno, Canto XII) “hic plus quam diabolus timebatur” (Fra Salimbene da Adam)

El papà de la lengua italiana; Dante, ne la só “Comedia” l’à messo quel “cao de roba” de Ezzelino terso da Romano nel più profondo de l’inferno e, par soramarcà, pociado nel sangue infìn a le rece.
Da parte sua, el cronista Fra Salimbene el lo ciama sensa mese misure “gran massacradór de omeni… adiritura un demonio.
‘Ste caratteristiche, paraltro, i è stà argomento de discussioni tra i storici, tuti dacordo solo nel considerarlo un genio militàr e politico.
Ezzelino, fiol de ‘na soca calà da la Germania tra el X e l’ XI secolo, l’èra nato a Romano, un borgo da le parti de Bassan del Grapa, el 25 de april del 1194 e l’à incontrà la “siora de la rengaia” a Soncino el 27 setembre (o el 7 otobre) del 1259. L’èra el primogenito de Ezzelino II, deto “el Monaco”, fradèl de Alberico da Romano e de Cunizza. Za da buteloto l’aveva dimostrà ‘na viva inclinassión par la guera. Fisicamente l’èra forte come un róaro e bon de afrontàr qualsiasi fadiga o pericolo. Ahimè… l’èra però anca assolutamente insensibile a la pietà tanto da tràr granda sodisfassión al spettacolo de i teribili patimenti provocà, ai pòri Cristi che ghe cascava soto le sgrinfie, da le rafinade torture che’l se inventava.
L’aveva ereditado da só papà i teritori de Bassan e Marostega, oltre i castei de i monti Euganei ma, par só conto po’, l’avéa in poco tempo slargà el dominio a Trento, Bellun, Vicenza, Verona, Padova e Brescia, creando ‘na specie de Signoria.
Dal 1225 al 1230, l’è stado podestà e capitano de Verona. In prinçipio l’avea sinpatisà con la Lega Lombarda ma in seguito, da questa deluso, el s’avéa schierà co’ l’inperadór Federico II de Svevia guadagnandoghe la nomina a vicario Inperiàl in Lonbardia e, segno de la massima considerassión del monarca, anca la man de ‘na só fiola naturàl; Selvaggia.
El matrimonio l’è stà’ celebrà ne la cesa de san Zen el 22 de magio 1238, giorno de Pentecoste e i festeggiamenti i è andà avanti par diversi giorni par la feliçità dei sanzenati che i à podù, almanco quela olta, inpenirse a “maca” la pansa. Ezzelino el g’à vossù ben a quela só prima sposa morta giovanissima (el ghe n’à po’’ sposà altre dó) tanto che no’ l’à mai smesso de onorarghene la memoria.
Co’ la potente aleansa del suocero, Ezzelino l’è tacà a passàr de conquista in conquista ma, a someiansa de Atila, a drio de lu no’ ghe restava che erbà brusada… morte e macerie. Nel 1233 l’à demolì el castèl de Caldiero che’l troneggiava sul monte Tenda e el ‘stesso ano Federico II l’à messo a fero e fógo Vicensa dandoghene po’ el governo al só Vicario el quàl, nel 1237 el s’à fato pura consegnàr Padova. Par domàr ‘sta forte, siora e potente çità l’à dovù però far métar in cadene tuti quei che par cultura, nobiltà e meriti i aveva aquistà stima presso la popolassión, inoltre, secondo l’usansa dei tempi, el g’avea anca demolì le “avite dimore”.
Sempre co’ l’aiuto e la protessión de l’Imperadór, l’èra a la fine rivà a deventàr Vicario imperiale de tuti i paesi tra le Alpi de Trento e el fiume Oglio.
De Ezzelino, però, se parlava , sia pur sotovoçe, come de’n demonio scadenà, bon de le più teribili cattiverie. Una volta l’ à fato muràr le porte de le presoni piene fin ai sofiti de i só nemiçi e mentre i sighi dei morenti de fame i terorisava la çità, i conta che inveçe el tirano el se ghe sbogolasse dal piaser. D’altronde, in un giorno solo nel 1239, sempre a Padova, l’avea assistì come a un alegro spettacolo al suplissio de disdoto padovani in Pra de la Val. A altri Signori de ‘sta martoresada çità el s’à contentà de requisirghe i beni. Mentre, ‘rafàndoghe i castei de Agna e de Brenta, l’à mandà a morte tuti quei che i le custodiva. Insoma, spampanando sangue e terór e costruendo presoni dove seràr omeni, done, veci e e butini, l’à otegnù l’ obediensa da tuti i suditi, da quei veci come quei novi. I conta che tra le altre carognate… Ezzelino el g’avéa l’abitudine de cavarghe personalmente i oci ai più picenini.
Dopo la morte del só inperiale protetór avegnuda nel 1250, Ezzelino, acusà de eresia oltre che de tute le pèso vacade, l’è stà’ colpì da la scomunica de Papa Alessandro IV, aversario de la fassión ghibellina. Nel mese de marso, pò’, del 1256, Azzo VII, podestà de Ferrara, l’à ricevù da l’Arcivescovo de Ravenna l’incarico de movarghe contro ‘na “crociata” che l’è stà’ costituida da Venessia, Bologna, Mantova, el conte de san Bonifacio e tanti altri Signori ben intensionadi a liberàr i disgrassiadi teritori soto el só dominio.
Cusì, mentre Ezzelino l’èra ocupà ne la conquista de Brescia i “crociati” de Azzo i à liberà Padova (19 giugno 1256) facilitadi anca dal fato che Ezzelino, difidando dei diesemila soldà padovani aruoladi ne le só milissie, el l’avéa inpresonadi drento l’Arena de Verona par po’, a poco a poco desfarsene. Solo a uno el g’à fato grassia e no’ se sa parcosa.
La guera tra un tira e mola de vitorie e batoste, l’è andà avanti par du ani. A un çerto punto Ezzelino, ciamà dai ghibelini de Milan par contrastàr i guelfi, l’à passà l’ Oglio e l’Adda con un forte esercito par tentàr de ciapàr Monza e Trezzo ma in quela, Oberto Pallavicini a capo dei cremonesi, el marchese d’Este a capo dei ferraresi e dei mantovani i è pionbà su Cassano d’Adda taiandoghe la ritirata.
Dopo un ultimo acanido conbatimento, finalmente, el 27 settenbre 1259, sconfito da la Lega guelfa de Azzo VII d’Este, Ezzelino l’è stà’ caturà e portà in cadene a Soncino, nei pressi de Cremona dove che l’è morto, a 62 ani, par le gravi feride riportade;… morto in coerensa co’l conportamento che in vita el g’avéa ‘vù verso i altri; sbregàndosse da dosso sensa pietà, le fassadure fin a dissanguarse.
Quanto al fradèl Alberico, anca lu caturado nel só castel, a tradimento, dopo un assedio de tre mesi da la Lega conposta dai Camino, dai Estensi, dai padovani, i vicentini e i veronesi, l’è stà’ dai vinçidori ligà con in boca un morso de legno e costreto a assìstar al massacro de la fameia; el taio de la testa dei sete fioi e el falò de la moier e de le fiole. Pò’, portado a Treviso l’è stà a só volta brusà ne la piassa Grande; prova evidente che la barbarie a quel’epoca no’ l’èra solo carateristica de Ezzelino!
‘Na fama sinistra i g’à i ruderi del castèl del massacro!
La gente de Romano la giura che, spece ne le noti sensa luna, ci passa da quele parti ghe càpita spesso de sentìr urli e lamenti da far vègnar la peldòca! Tra quei antichi muri inbonbegà de teribili storie, ancora la, nel paese de Romano, da le parti de Bassan, me ricordo de aver visto murà ‘na targa che riporta, a firma del conposidór Ermanno Wolf Ferrari ‘na frase che invita a meditàr su la miserabile fine de çerti “potenti” croà sóra le macerie de i só reami doradi.
In finis… ‘n’altra storia la conta pure che Ezzelino l’abbia sconto proprio ne ‘sti dintorni el só tesoro; un tesoro çercà par secoli e da tanti ma mai da nissun ritrovado forsi parché a custodirlo gh’è personalmente el diaolo.

Wanda Girardi Castellani