L’Angolo de la Wanda – Luglio 2009 – “EGIDIO MENEGHETTI (Antenore Foresta) El poeta che in dialeto veronese l’à cantado la libertà”

…a cura di Graziano M. Cobelli

gcobelli05@gmail.com

Quatro Ciàcoe: da Verona

EGIDIO MENEGHETTI (Antenore Foresta)
El poeta che in dialeto veronese l’à cantado la libertà.

Nato a Verona il 14 novembre 1892
morto a Padova il 4 marzo 1961
Docente di farmacologia. Fu Rettore dell’ateneo padovano, Capo della Resistenza Veneta scienziato e combattente. Poeta nel nostro dialetto con il quale cantò la libertà.

***

De idee republicane e socialiste, fiol e neodo de dotori, con la passión par la siensa la fameia la g’à trasmesso l’amor de Patria. El bisnono con altri so parenti l’èra stà fusilado dai austriaci a Castelnovo del Garda ne l’ecidio de l’11 aprìl del 1848. Du só zii i à indossà la camisa rossa dei garibaldini e i so nomi i è ne l’elenco dei “mile” de MARSALA.
Nato el 14 novembre 1892, a disissete ani l’è rivado a la maturità classica al Maffei e ‘l s’à iscrito a medissina a l’università de Padova.
Quando è scopià la grande guera, 1915/18 el nostro Egidio l’è andà volontario e el s’à distinto in tanti conbatimenti. L’è stà ferido dó volte e ‘l s’à merità quatro decorassioni dó de le quali d’argento. Da senplice fante l’è stà inoltre promosso uficiàl dei alpini sul canpo.
Durante el servissio militàr, el primo de aprìl 1916 el s’à laureado co’l massimo dei onori. Po’ finida la guera l’à frequentà l’Ist. de farmacologia. In quel tenpo l’à fondà a Padova, con altri republicani antifassisti e assumendoghene la Presidensa, l’Ass. Italia libera, con ‘na gemela a Verona.
Dal 1922 l’è stado libero docente de Farmacologia Sperimentale e fin al 1926 l’à stanpà e direto, senpre ne la çità del Santo, el giornàl “Non mollare”.
Nei ani ch’è vegnù, dopo la catedra de Camerino e quela de Palermo. nel 1932 l’è ritornado a Padova dove, con la só scola el s’à butà anima e corpo nela ricerca su “Assion Emolitica e Assión Fissativa dei Metali e Serie Elettrochimica dei Elementi”. In seguito el docente veronese l’à sconto prigionieri ebrei e perseguitadi politici, l’à preparado assioni partigiane, missioni segrete e lanci paracadutadi de armi e munissioni.
L’è stado po’ nel magio del 1952, con la publicassión del “De sera” che Egidio Meneghetti el s’à rivelà ai amiçi, oltre che siensiato de livèl internassionàl, poeta da la vena originale, delicata e forte.
A detarghe i versi a la só Musa i è stà’ oltre a la só profonda umanità, le tante soferense e le dure esperiense. I só versi par i quai l’à doparà non l’italiàn del quàl, paraltro, el savéa servirse in maniera inpecabile, ma el dialeto materno usà in una forma assolutamente nova, i è stadi racolti (scritti tra el 1950 e ‘l 1954) nel 1955 da Neri Pozza in “Cante in piassa”. Vittore Bocchetta, par só conto, l’à stanpà ‘na picola antologia meneghettiana dal titolo “Rime mirate” par le edissioni “Giustissia e libertà”. Con el rebaltón del fassismo l’università de Padova l’è deventà el só laboratorio politico, Nel 1945, l’èra stado arestà, torturado da la famigerata banda Carità e internado nel lager di Bolzan dal qual el g’à ‘vù la fortuna di averghe salva la vita grassie ad un scambio con prigionieri tedeschi.
Il 16 dicembre 1943 Egidio Meneghetti. detto Antenore Foresta, l’avea perso la moiér Maria e la fiola Lina nel bonbardamento dell’Arcella scadenado dai cosideti “liberatór” e l’à conossudo la desperassion de la solitudine da la quale forse è scaturì la fiamma de la só poesia cusì inovativa.
Dopo la liberassión l’è tornà da novo a Padova dove ghe stà oferto il Rettorato che l’à tegnù fin al 1948. In quei ani el s’à inpegnà ne la ricerca sientifica scrivendo diversi interessanti sagi divulgativi e istituendo un centro studi per la Chemioterapia.

Tra le conposissioni poetiche de Meneghetti… umanissime, epiche: “Lager”, “Bortolo e l’ebreeta”, e soratuto “la partigiana nuda” – Interessante el picolo estrato de Berto Perotti “Poesia e testimoniansa” nele “Cante in piassa” curà da la linotipia veronese Fiorini.

El 18-7-2009 a le 19 in Ferrara de Montebaldo, loc. Albarè, avrà logo l’ìntitolassion de quatro vie dedicade a Berto Barbarani, Egidio Meneghetti, Angelo Sartori e don Giobatta Roncari dei quali vegnarà leto un profìl biografico e poetico.

Wanda Girardi Castellani

***

Foto da Google

***