L’Angolo de la Wanda – Luglio / Agosto 2011 – “Cesare, un can da l’òstrega”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Cesare, un can da l’òstrega

L’era na sera de novembre, freda e nebiosa, ma così nebiosa da dar l’impression de èssar soto ’na cuerta de nùvole de pana.
A le diese me fiol Flavio l’è tornà a casa, portàndose drio du amiçi. Uno de i du l’à tirà fora da ’na saca un cucioleto de can che el tremava come che l’andasse a motor: “L’ò catà drento una sésa, lo vorla? Se no la lo vol, vao a rimétarlo dove che l’era.” Intanto l’ò sugà e fato sù in ’na cuertina. Go dà ’na scudeleta de late caldo, po’ me lo son tolto su i zenoci e lu subito el m’à ringrassià co’ ’na pissada che m’à trapassà la vestalia, la camisa e parfin le mudande. Par cambiarme l’ò messo in tera e quelo l’è andà de corsa a infilarse soto la cardensa andò l’à deposità el “resto”. Finì la tremarela e fati i so bisogni l’è andà a comodarse sul tapeto del saloto. El corajo de mandarlo a “surgelarse” in giardin, no ghe l’ò proprio avudo e, rimandando le decisioni al giorno dopo, l’ò lassà sul tapeto coerzéndolo co’ un vecio majon de lana. È scominsià cusì una de le pèso note de la me vita. Ogni mesora ò impissà la luce par védar dove che l’era andà a cassarse quela figura vaca de can.
A le una de note, svejà de soprassalto, ò scoperto che nel tentativo de rangiar un scartosseto con do fete de salame desmentegà da Flavio sul taolo del saloto, l’aveva tirà zo co i denti la toaja.
A le tre me son sveja da novo… e ò catà la sgaujara rebaltà in coridor con tuto quel che ghera drento sparpajà par casa.
A ’sto punto ò brincà quel teramoto a quatro sate e l’ò serà nel destriga-roba. Da quel momento l’à tacà a scainar e a raspar co’ le sate el legno de la porta. Me fiol a un serto momento, desmentegàndose che stemo al quinto pian, l’à sigà: “Bùtelo in strada!”
El cagneto (bianco e nero, sate curte e rece in bandiera, batezà, a vista, “Cesare”) el n’à tegnù svéi fin a le çinque, po’ l’è croà in un sòno de pionbo che ’l paréa morto.
A la matina, me fiol l’è andà a scola, e mi, dovendo andar in uficio, go avù la bela pensada de sistemar “Cesare” (che al momento el seitava a dormir) ne la vasca da bagno, con ’na scudela de aqua e beni de conforto. Avarìa volù tegnérmelo, ma, védova da óndese mesi, sensa schei e con un fiol de quindes’ani, reduce da pochi mesi da un incidente col motorin, no’ l’era proprio el caso de tòrse ’na rogna in più, partanto ò deciso che prima de sera l’avarìa portà al canile.
Intanto, dovendo lassarlo a casa, ò messo in pratica el piano de batalia studià par ore. A le una, tornà a casa par la “pausa pranso”, quando son entrà in bagno ò trovà la vasca in condissioni che avarìa podù esporla con sucesso a la mostra d’arte moderna de Venessia!
La caca l’era sparpajà dapartuto, missià ai avansi de pan, late e tocheti de bóndola. Ne i tentativi de végnar fora, Cesare l’aveva impiturà tute le pareti a satade. Naturalmente el s’aveva inpiturà anca lu, ma così ben che par netarlo go messo un’ora. Go telefonà al me capouficio, domandàndoghe se podeva tardigar a tornar al laoro. Po’ con un sacheto de pan vecio, e tre carte da mile (tuto quel che gavéa in scarsela) son andà a depositar la “peste canina” al canil de San Martin. Però go pianto drio ’na setimana… e se no fusse stà par me fiol che l’aveva minacià la terza guera mondiale se no l’avesse sbolognà, Cesare in “via Pasti” el gavarìa messo le tende a vita!

 Wanda Girardi Castellani