L’Angolo de la Wanda – Luglio bis 1997 – “Carlo Gozzi …artista quasi desmentegà rissusitado al teatro de Grezzana”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Carlo Gozzi …artista quasi desmentegà rissusitado al teatro de Grezzana”

Davanti a Carlo Goldoni, me cavo tanto de capel, ma, con tuto el rispeto, le so opere le m’à oramai causado un fiantin de indigestion.
Almanco qua, da le me parte, no’ gh’è conpagnia amatorial (e ghe n’è un bàito) che ‘na òlta a l’ano no’ la meta in sèna ‘na so comedia, calcando a tuta maneta sui vari Arlechin-Batòcio, Balanson e conpagnia bela; eterne marionete mosse a scati drento a storie quantomai incasinà (e domando scusa ai adoratori de Goldoni)! Beh, par farme vègnar in mente che Venessia, in particolar, e el Veneto, in generaI, i g’à ‘vu anca altri inportanti personagi, g’à vossù i buteleti de la seconda “E”, de le medie de Gressana (VR) che sabo 7 giugno, luni 9 e marti 10, i à messo in sèna “La dona serpente” de Carlo Gozzi. L’autor de ‘sta rosaria tragicomica l’è nato a Venessia nel 1720 e el gh’è morto nel 1806. Fradel minor de ‘n altro grande venessian, Gasparo, (1713-1786) scritor e leterato (autor, tra l’altro, de “La difesa de Dante”, scrita in risposta a le letere virgiliane deI Bettinelli), Carlo, tornà a Venessia nel 1744, dopo aver fato el soldà in Dalmassia, l’à podù sfogar la so vocassion leteraria animando l’Academia deI Granelleschi, che sostegnea la lengua classicamente pura. Contrario al Goldoni, so omonimo e contenporaneo, deI qual l’à aversà la riforma teatral l’à composto, ispiràndose a la comedia de l’arte, le fiabe (1761, 1765), diverse trame de comedie a sogeto (L’amor de le tre melarance, Turandot) ecc… AI teatro goldoniano fato de personagi ispiradi a la vita de ogni giorno, Carlo Gozzi l’à contraposto un teatro sior de fantasìa, pur sensa rinunciar a qualche màscara par l’esigensa de movimentar con un pìssigo deI pèar de la comicità, le so storie (vedi Pantalon, Brighèla, Tartàja ecc… ne “La dona serpente” o Ping, Pong e Pang, ne la più celebre “Turandot”). Par Gozzi, tuto podea andar ben, fora che la normalità, sinonimo, par lu, de banalità!
Ingiustamente, forsi, l’unica tra le so opere a darghe la vera imortalità, l’è stà propio la Turandot, che Giacomo Puccini l’à trasformà in opera lirica; el so “canto deI cigno”, restà inconpleto a causa de la morte che g’à sofegà le note in cao a l’ùltimo quadro. Ma tornando a la seconda media “E” de Grezzana; un beI paese pien de vita, ai pie de i Lessini, bisogna propio dir che tanto i buteleti che le butelete i à dà el so mèio! Parfin i costumi i l’à fati lori; i costumi e le sène! Tra el numaroso “cast”, spicava Elena Signorini ne la vesta de Pantalon. Bravi anca tuti i altri, tra i quai me neoda Marta Castellani che l’à inpersonà con inpegno Tartàja e so cusina Lucia Chiavegato, bravissimo Brighèla. Un elogio particolar a le maestre: Luciana, Teresa e Paola e al maestro Davide, che à istruì tuti ‘sti bravi atori in erba!

Wanda Girardi Castellani