L’Angolo de la Wanda – Luglio bis 1998 – “SU LE REGASTE DE SAN ZEN” …uno dei ultimi baluardi de l’antica arte orafa”.

…a cura di Graziano M. Cobelli

gcobelli05@gmail.com

Quatro Ciàcoe: da Verona

SU LE REGASTE DE SAN ZEN

 …uno dei ultimi baluardi de l’antica arte orafa”.

El Maestro ANGELO ANTONIAZZI l’è un omo a la bona, amante de la compagnia, generoso anca massa, umile e schivo, par quel che concerne la so pur grande arte, e, malgrado la carga de scarogne che par tuta la vita gh’è piovú ‘dosso, alegro, co’ la batuda pronta, e sempre in vena de schersi. Par questo, a védarlo cusì, no’ te’l diressi che l’è un artista, bon de realisar gioièi de ‘na tal belessa e perfession, da lassar a boca vèrta anca el più esigente dei intendidori. Paraltro, dato che l’è anca l’onestà fata persona, le palanche che qualchedun ghe atribuisse, no’l se l’à çerto fate, anca se a Verona l’è conossù più de la ‘Réna e tanti che, nel setor orafo, ancó i va par la magior, e, a difarensa de lú, i nàvega in ‘na barca de schei, i à scominçià propio a la so scola.
ANGELO  l’è fiol d’arte! El nono, dal qual l’à eredità el nome, oltre che la braùra e el gusto par le robe bele, l’èra un noto scultor. Soi, i è diversi inportanti  monumenti; obelischi, possi, frontoni ecc…, ancora amiradi sia nela provincia che nel resto de l’Italia e parfin a l’èstaro. Nono Angelo, stimatissimo, l’à laorà, fin a la morte (1916; un ano prima che nassesse el neodo) tanto che el Comune de Verona, a quei tenpi,  el g’à oferto la ciave de la çità, restà come un cimelio ne la faméia.  Anca i zii Antoniazzi i à lassà segni fondi; l’è del zio Benvenuto, par esenpio, la realisassion de l’ultimo tòco del canpanil del nostro Domo, la copia del progeto del qual l’è pura restà tra i tesori de casa.
Ma ‘dèsso passemo a ocuparse esclusivamente del “nostro” Angelo; (“mio”, in particolar, dato che g’ò la fortuna de avérghelo arènte da quasi 16 ani), ben conossù e stimà anca ne l’ambiente de “Quatro ciacoe”.
L’à scominçià l’atività nel 1933 presso el  celebre laboratorio de Alberto Modena, soto la guida del Maestro Natale Martinelli, pur seitando a frequentar la scola d’arte “Nanni” nei corsi serali. Po’ l’à fato vari altri corsi de perfessionamento sia a Verona che a Venessia. Nel 1935 l’à partecipà a do gare de mestier, vinsendole tute do. Nel 1937, in un concorso nel laboratorio Weingrill l’à ricevù ‘n altro 1° premio e el laoro premià l’è stà selto par la partecipassion a le gare de mestier che dovéa svòlgerse a Roma. Anca ne la capital, pur essendo el più giovane concorente (20 ani) e par de più forsi el manco equipagià de atressi moderni, el s’à classificà ai primi posti, tanto da ‘vérghe ‘vú le congratulassioni de l’alora Ministro de l’Artigianato, on.le Buronzo, seguito conpreso.
Altre sodisfassioni i è rivà a cariolade fin al 1940 quando, richiamà a le armi, l’à dovù sospendar l’atività.
E rivemo al dopoguera;1946! Eco da novo in pista el nostro Angelo; primo in Verona a partecipar a fiere e mostre, con gioièi fati da lu e da coleghi, in Italia e a l’èstaro. Da la Camara de Comercio l’è stà incaricà de selessionar i laori da espor ne le più importanti esposissioni a Monaco, a Lipsia ecc… e par ben tri ani l’à podù presentar le so opere a la mostra permanente de l’artigianato de Palazzo Brembo, a Venessia.
L’è stà “pionier” de varie inissiative; un merito che g’à riconossudo publicamente e più òlte,  l’alora presidente de la Camara de comercio, dr.Cavagnari. In seguito el g’à vù l’incarico de curar la mostra orafa a la fiera d’Oltremar a Napoli. Ancora primo in Italia, l’à esportà so laori de orificeria, in Svissera, Austria, Germania, Lussemburgo, New York, Tripoli, Lipsia, Santo Domingo e San Salvador. S’à adornà da laori fati da le so man, anca qualche diva, (vedi la Anna Magnani) e s’à rivolto a la so arte parfin i noti Cartier. Come se no’ bastasse, l’è opera de Angelo pura qualche bela corona  de la Madona; insoma, el g’à inportanti clienti anca in “alto loco”!
A la grande inventiva artistica e capacità lavorativa, la vita la g’à contraposto ‘na straordinaria carga de sfortuna. Penso che pochi orèvesi i abia subì le busarade e i furti che’l g’à ‘vú Angelo Antoniazzi, bon ultimo la rapina a man armada del 1985; ‘na massada che g’à  portà via 50 ani de laoro, tanto più se pensémo che, trasferì de botega da poco, no’ l’avèa gnancóra spostà l’assicurassion. Ma Angelo, za alora sula setantina, l’è stà bon, ripartendo da zero, de farse-su da novo le màneghe, afiancà dai fioi; Giuseppe, erede de l’arte paterna e Paola e Grazia, so ative colaboratrici, nela bela botega in via Regaste san Zén n.23/a.
Avanti sempre!  ‘Dèsso, a 80 ani sonà, anca se in pension, dopo averghe lassà el canpo ai fioi, no’l sta fermo un minuto e, magari solo par hobby, el sèita a strolicar e a trapelar. El lassa che a laorar i sia i altri ma un consilio, fruto de la so longa  esperiensa, el pól èssar senpre un valido aiuto. Si, parché lú, che’l fa ‘na fadiga cagna a star co’ le mane in man,  el sarìa ancora bon de far dei capolavori, magari con un par de boni ociai e la so vecia visiera, piegà sóra el bancheto de legno che tanti ani fa g’àvea regalà el so vecio. Intanto, par le letrici de Q.C. el m’à inpromesso che prossimamente el me darà un saco de picoli consigli su come preservar e curar, perle, piere pressiose e quanto de altro serve a farle più bele.

Wanda Girardi Castellani