L’Angolo de la Wanda – Luglio bis 2005 – “NOTISSIARIO: ‘N’ORIGINAL “VIA CRUCIS””

…a cura di Graziano M. Cobelli

gcobelli05@gmail.com

Quatro Ciàcoe: da Verona

NOTISSIARIO: ‘N’ORIGINAL “VIA CRUCIS”

Sabato 11 giugno, ne la bela sede de I’emitente televisiva “Telepace” in quel de Cerna (Boscocesanova – VR), destesa soto el bareto Dogal del corno D’Aquilio, gh’è stà I’inaugurassion, a la presensa de Padre Flavio Roberto Carraro, vescovo de Verona e altre autorità, de la splèndida “Via Crucis” dedicà al Santo Padre, Giovanni Paolo Il, e realisà ne l’ano scolàstico 2004-2005 da i aluni de le classi terse e del laboratorio artistico-manual de la Scola Secondaria de Primo grado “G. A. Dalla Bona” de Sant’Anna d’Alfaedo. Ne la realisassion de I’inportante òpera i giovani artisti, guidadi da i so maestri, i ga ‘vu la supervision e la regia de ‘n grande de l’arte veronese, el prof. Gianfranco Minelli, I’ideator de la tècnica “Pruntekne” che la consente de piturar ne la piera, rendendo indelèbili i segni. EI material ‘doparà l’è stado la piera de la Lessinia cavà da uno de i setanta e più strati de la “scaia rossa” presente ne le cave del teritorio. Fati i bosseti de le 15 sène de la Passion del Signor e po’ trasferì su la piera, s’à colorà i vari disegni con colori terosi a ojo e poliuretano. Con ‘sta tècnica, brevetà dal prof. Minelli, se evidensia I’imàgine, impenindo i pori de la piera, in equilibrio e in armonìa con la piera stessa. L’inaugurassion de sto capolavoro, svolta in ‘na giornada benedida dal sol, I’à visto la partecipassion de çentenara de òspiti, tra i quai ‘n esèrcito de buteleti. EI tuto mandà più olte in onda da “Telepace”. Dopo i vari interventi de le autorità e la benedission del vescovo, I’emitente la ga oferto un abondante pranso a tuti, in un salon bon de darghe posto a mèso meiar de persone.

Wanda Girardi Castellanl

GIANFRANCO MINELLI

L’avevo sentì spesso nominar ma no’ gavevo mai avudo el piaser e I’onor de conossarlo de persona fin a ‘na domìnica de sto ùltimo magio, quando, par tirarme sù el morale che quel giorno parea l’avesse ciapà residensa definitiva soto ai tachi, el me massagiator, bravo “colega” poeta e bon amigo, Giancarlo Cattapan, el m’à cargà-sù de forsa su la so màchina e ‘l m’à menà a Ceredo (uno de i paesini de le nostre montagne dove ‘sto santo omo el va a far anca del Volontariato) a ciapar ‘na sventajà de aria bona, destanàndome, quasi de prepotensa, da casa. A Ceredo gavemo fato vìsita a ‘na simpàtica amiga comune, la Giuliana, e l’è ‘stà propio in casa sua che ghemo catà el prof. Minelli co’ la so Signora.
Come al sòlito la Giuliana I’à volù farme recitar qualche poesìa e se vede che le me robe le ghè piasù al Profe, tanto che I’à volù regalarme ‘ na so monografìa a l’interno de la qual el m’à anca fato el ritrato a “biro” con, soto, ‘na assè lusinghiera dèdica. lnsoma, malgrado i ani e le malore, i me versi e fame de recitassion i riesse a far ancora efeto (Diograsssia!).
Gianfranco Minelli, un omo simpàtico, gentile e a l’antica… de quei che ancora usa farte, in ‘sta epoca oramai uda de elegansa e de romanticismo el basaman, el pitura in una maniera originalìssima, fasendo penetrar el color ne la piera e qua el color, grassie a I’assion de solventi uretanici, e! resta solidificà, quasi piera ne la piera, busaràndosene de i atachi del’aqua, de l’aria, del caldo e del fredo. La piera de Minelli no’ l’è ‘na piera qualunque, ma l’è la scaja rossa de i monti Lessini, ciamada “piera de Prun”, sedimentassion marina de filoni basàltici, veda de otanta milioni de ani fà (ano più, mese manco). La tècnica j’è quela che v’ò spiegà parlando de la Via Crucis. Se trata sempre de pitura, ma de ‘na pitura impressa ne le vene de la tera; pitura de ancò, fata deventar antichìssima da le cadene de la piera! Ne la piassa grande del capologo; sant’Anna d’A!faedo, se poi amirar una de le òpere del prof. Minelli. Se trata de ‘na lastra che da ‘na parte la mostra I’imàgine de personagi de la Lessinia, recenti e passadi, da i artigiani de la piera fin a don Alberto Benedetti, el prete siensiato studioso e cultor de la Lessinia, e da l’altra I’imàgine del vedo abitado tìpico de ‘sti monti, tuto fato de piera; un monumento che nasse da I’union de I’ànima rociosa e el deventa ànima de la storia de ‘ste popolassioni. Moltissime altre òpere de l’artista le fa parte de colessioni private in Italia, Francia, svissera, Belgio, Germania, Austria, Norvegia, Gran Bretagna, Grecia, Spagna, Olanda, Lussemburgo, Stati Uniti… !nsoma, Minelli no’ l’è solo ‘na gloria de Verona, ma del mondo! Parlando de la so arte, lu I’à dito: “Mi no çerco de esprìmar la forma estètica fissà , su un schema astrato e platònico, ma la forma come fine de svilupo de ‘n interior, processo evolutivo, dove la realtà, trasferì ne l’io, la possa èssar restituì ne I’òpera su un piano uman e no’ concetual.” Come dire… “la memoria de I’omo ne le vene de la tera”.

Wanda Girardi Castellani