L’Angolo de la Wanda – Maggio 1996 – “Fantasia… ugual a fobìa”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Fantasia… ugual a fobìa”

“La fobìa l’è ‘na forma de paura decisamente irassional, de caratere patologico, provocà da ‘n ecesso de fantasia un fià morbosa”. Questa l’è la definission de ‘sta rogna come che, più o manco, se la cata in tuti i dissionari.
De fobìe ghe n’è diverse ma le più conossude i è:
L’ AEGORAFOBIA -la paura de i spassi verti.
La CLAUSTROFOBIA -la paura de quei serà.
La PATOFOBIA -la paura de le malatie.
La FOTOFOBIA -la paura de la luce.
L’ARACNOFOBIA -la paura de i ragni e so vari parenti a più sate.
L’ABSCURUSFOBIA -la paura del scuro.
Ma penso che se possa tuti imaginarsene de le altre:
SESSOFOBIA, POLITICOFOBIA, TASSEFOBIA, AFITOFOBIA, TIVUFOBIA ecc… Personalmente, in fato da fobìe son n’enciclopedìa anbulante in quanto oltre a quele che sò de ‘verghe, me ne scopro ogni giorno qualche duna de più. Ècove alora qualche esenpio de in quali casini tragicomici me son catà a causa de queste:
CLAUSTROFOBIA: Ne l’istà del 1978 son ‘n dà in crociera sul Mediteraneo. Quando che ‘l camarier de bordo el m’à menà in gabina, è scominçià i dolori. Zo da ‘na scaleta e po’ da n’ altra: m’à parso de andarme a infilar in te ‘na tonba egissiana e ò tacà a sudar fredo. Me marì l’à çercà de chietarme fasendome vedar che g’aveimo l’oblò. Senonché… da l’oblò ò visto passar i pessi parché a momenti l’èra soto al livel de navigassion. Verso sera, nel tentativo de respirar son andà sul ponte dove che, vedendo solo aqua in tute le diression, è scatà anca l’AGORAFOBIA.
Manco a farlo aposta, el mar l’à scominçià a agitarse fin a rivar a forsa 7. Tuti i regatava de bruto, parfin el personal de bordo. Mi, su consilio de’n marinar, son andà a popa dove, tacàndome a ‘na murata, ò vardà fisso davanti: tuto mar, tuto cel, tuto mar, tuto ciel e… fòra anca el figà (fegato)!
Qualche ano dopo, in partensa par la Grecia, mèmore de la passà “nera” esperiensa, ò incaricà me fiol de prenotarme ‘na gabina sul ponte, “costi quel che costi”, ma “l’infame” I’à tolto la più bassa, par risparmiar. Vedendo el nùmaro de prenotassion, me fiol più vecio I’à sentensià: “Mama, me sa che qua i te metarà a cavaI del motor a pedalar par far andar ‘vanti la nave!”. Infati, la gabina I’èra propio I’ultima, zo ne la busa, tacà a la sala motori e cussita streta che se  uno g’avea da lavarse i denti, st’altro I’èra costreto a star ransignà in leto. Come se no’ bastasse, a Verona, I’amigo Angelo jutandone a caricar la “127” el n’avea stivà drento el baul parfin el saco de le sgaùie, saco che ‘l camarier, ‘na òlta sul tragheto, el n’ avea infilà col resto soto al leto a castel, lassandone cusÌ, oltre al bordel de le machine, a la spussa. Quela note, dopo aver scaraventà in Adriatico, a la sconta come un ladro, le sgaùie veronesi, I’ò passà sul ponte, fata-sù in te ‘na coerta, al lume de le stele.
Sere fa, ne la cesa de Santa ‘Nastasia piena come un ovo, quando el popolino dal fondo I’à sfondà le transene, roersàndose come ‘na mandria de bufali nei posti “stampa”… mi, lassando lì la borseta e I’inpermeabile, son corsa, spensendo mèjo de’n bo verso I’altar ando’ che el Maestro Scimone el stava alsando la bacheta par inviar i so “solisti veneti”. Ò spelegà quel de i tanburi e, ripresa co’ l’inissio del concerto da un brol de “cameraman”, son riussida in qualche modo a rivar a la porta dove finalmente, sentà sul basamento de ‘na colona gotica, ò podù scoltar (pur sensa vedar) el concerto.
ARACNOFOBIA -Du ani fa ò lassà de corsa l’apartamentin in montagna (rimetendoghe anca i schei de l’afito) quela òlta che ò catà soto al leto un ragno che ai me oci el g’avea le dimensioni del folpo de “Vintimila leghe soto i mari” de Verne.
LA FOBIA DEL SCURO -Normalmente vago in volta con almanco do pile e un acendin in borseta; no’ se sa mai!
No ve starò a contar la triste istoria de le do volte che son restà serà ne l’assensor; roba da incubo!
Quando che ò viajà in arioplan, dopo la prima catastrofica esperiensa (m’èro messa a sigar: “Voi desmontar!” a 4000 metri de altessa) me son inboti de tranquilanti, ma anca con quei ò ris-cià de dar i numari. Par calmarme, me son andà a serar nel WC (no se trata de le me inissiali) dove che, tanto par far qualcosa, ò macà botoni de qua e de là fasendo cascar par tera ‘na barca de mini-saonete, buste de profumo e altro (inboscà ne la sporta).
Sul canpanil de San Marco a Venessia ghe son andà a pie… idem a Roma, su la cupola de San Piero. A Parigi invçe ò ris-cià l’assensor de la tore “Eifel”, ma a mèsa predica me marì, co’ ‘na terapia d’urto discutibile, par metarme chieta el m’à ciapà a sberle. Gh’è da zontarghe che se de note me va la coerta sul muso, taco a sigar! E po’ pensève che son riussì a farme vegnar ‘n ataco de AGORAFOBIA parfin vardando el cel pien de stele, da ‘na montagna: el massimo!
Insoma, sarà parché de fantasie ghe n’ò a treni, ma ghe n’ò a treni anca de fobìe.
In finis… par quel che riguarda la PATOFOBIA; guai a contarme ‘na qualche magagna parché “seduta stante” (o anca in pie o butà) me la sento, pari-pari, anca mi! Cure? Valium a cariolade, a tir, a treni, a petroliere e, prima de tuto, pregar Dio de no’ catarse in çerte situassioni.
Amiçi, dopo che avarò tirà i sgherleti, buteme in mar (ma sensa saco… ve racomando)!

Wanda Girardi Castellani