L’Angolo de la Wanda – Maggio 1997 – “RICORDO DE IGNAZIO BUTTITTA – L’Italia l’à perso ‘n altro grande Dialetàl”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“RICORDO DE IGNAZIO BUTTITTA”
L’Italia l’à perso ‘n altro grande Dialetàl

L’ò conossudo nel 1975. In quei ani la Tv nassional la trasmetéa un programa tuto suo: “Italia bella, mostrati gentile”.
Mi gò senpre avù ‘na gran sinpatia par la Sicilia, patria del me adorado Luigi Pirandello, partanto, quando l’amigo poeta mantoan Enzo Lui el m’à proposto de far parte, con lu, del trio de poeti che dovéa rapresentar el Veneto, la Lonbardia e la Sicilia, ò dito de si con gran entusiasmo!
Enzo, dunque (un altro splendido poeta dialetàl; ‘na vera gloria Lonbarda), el gà fato a Buttitta el me nome ma quelo prima de “acetarme” l’à vossù, giustamente, conossarme.
Ecolo dunque, scortà dal colega, amigo, mantoan, in casa mia.
L’è entrà co’ ‘na facia da malfidente che no ve digo! La testa incorciolà da l’inmancabile papalina, come a dir: “muso duro e bareta fracà”! Prima de vardarme in facia l’à passà in rivista la me biblioteca con granda atension dopo de ché, finalmente el s’à girà verso de mi e l’à sentensià: “Si, reciterò con questa signora!” Evidentemente l’è stà d’acordo co’ le me leture.
La prima esperiensa l’émo fata soto l’egita dele “Case serene d’Italia”, a san Michel e l’è stà ‘na roba memorabile. Gh’è da dir che el modo de far poesia l’èra, da uno a l’altro, de ‘na distansa oceanica; Enzo, un poeta da la piega socialista, con ‘na lirica quindi a sfondo netamente sociale. Buttitta, comunista, con tuti i anessi e conessi e mi… co’ ‘na poesia da “dona”, moderna, si, e spesso a sfondo social, ma distante assè da la politica par la qual gò senpre avù pitosto schifo.
Avéimo anca fato un libreto insieme; un libreto dal qual se pol ben constatar quanto sóra!
Dopo l’esperiensa a le “case serene”, emo fato quela, piassè importante a l’Academico del Bibiena de Mantoa, el 15 dicembre, senpre del 1975.
El teatro l’èra pien macà, specie de giovani de sinistra, vegnudi con tuti i mèsi e da tute le parti. Posso dir con orgolio (legitimo) che anca mi gò avùdo el me sucesso. In quel’ocasion ò conossù un butelòto, rivà con la bici e col zaino, adiritura da Regio Emilia. El m’avéa dimandà uno dei me libri ma quando che l’è stà par pagarmelo el s’à inacorto che, salvo pochi franchi, dal so tacuin vegnéa fora le tarme co’ le lagrime ai oci. Alora ghe l’ò regalà! Da quel momento e par 8 ani, l’à seità a scrivarme. El se firmava “el giovane zìngaro”. L’ultima òlta che ghe n’ò avù notissia l’è stà quando, sposà da un ano, l’èra deventà papà.
Ma tornando a Buttitta; l’Arena de dominica 6 april l’à dà notissia de la so morte. Nato nel 1899 a Bagheria, un picolo comune viçin a Palermo, el g’avéa quindi 98 ani. De lu, Pier Paolo Pasolini, che de poesia dialetal el se ne intendéa, l’à scrito: “‘Stó umile omo de Bagheria, estroverso, ingenuo, tormentà da ‘na mancansa de amor materno che el l’à reso orfano e ossesso, l’è quel che se dise “un bon poeta”!” Tra le tante e inportanti publicassioni, nel 1973 con el libro “Il poeta in piazza” l’à vinto el premio Viareggio.
Mi, modestamente, la penso come Pasolini; el d’èra, si, un grande poeta e soratuto un “dialetàl” come noialtri.
Quando ò savù la bruta notissia, ò provà dispiaser e subito m’è saltà ‘dosso tanti bei ricordi. Ma che stranbo che l’è el nostro sarvel: come un conputer, el g’à tanti file, ben catalogadi de qua e de là e basta tocar un çerto boton… che, èco el ricordo el torna fora, dopo ‘n mar de ani, linpido e detalià come se se tratasse de ‘na roba sucessa ieri.
Adio, Ignazio e grassie par averme onorà de la to stima.

Wanda Girardi Castellani