L’Angolo de la Wanda – Maggio 1998 – “EL CRISTO IMPITURÀ CO’ L’ERBA”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“EL CRISTO IMPITURÀ CO’ L’ERBA”

Una tra le più bele e antiche cése veronesi l’è sens’altro quela de S. Giorgio Magior, mèio conossù come S. Giorgio in Braida. La se trova a du passi dal ponte Piera e dal Teatro romano, su la riva de l’Adese; davanti ‘na piasseta e la porta S. Giorgio. A le spale un mantel de albari e giardini con in meso un capitel dove ani fa era stà messa ‘na splendida Madona, subito sgranfignada da mane sacrileghe (ma mi ghe ne conservo el modelin in gesso, regaladome da l’autor) .
Tanti i è i tesori d’arte che ‘sta splendida césa la se struca nei forti brassi de piera indoradi dai secoli ma de uno in particolare val la pena de ocuparse; un Cristo Portacroçe impiturà co’ l’erba.
Atualmente el se trova incornisà sóra l’altar de ‘na capeléta, de drio ‘na porta che se verse, scura e sconta, a la sinistra de l’interno del tempio. El sol spiansàndola apena de luce sbiéssa, da ‘na vedrada in alto, el fà aparir sofusa de ombrie la figura verda, inçercolà de incanto e de mistero.
A giudicar dai tanti antichi ex voto, testimoniansa de grassie che la fede, traverso çentenara de man sconossude à racontà su le taoléte de legno ben aliniade su la parete de destra, El Cristo Portacroçe el dovéa avérghene fati gran tanti de miracoli e ‘vérghe quindi ‘na çerta qual importansa nel cor dei veronesi.
La storia de ‘stó curioso afresco l’è gran bela e la meritaria de no’ finir, cusì, come tante altre perle del nostro color locale, nel più profondo de la càneva polvarosa del “desmentegon”.
A dàrmene par primo notissia l’è stà un grande storico veronese scomparso qualche ano fa e, anca lu, ormai messo da banda dai imemori me concitadini; Romeo Regazzini, vecio, carissimo amico, autor de diverse publicassioni su la nostra storia e le nostre tradissioni, una de le quali m’è capità de recente de védar in svendita in ‘na libraria, mucià sul paimento, a la miseria de 5000 franchi. Pòro Romeo… par scrivar quel libro, ‘ndó l’à parlà del “Cristo impiturà co’ l’erba”, el g’avéa messo ani e anori, fasendo ricerche a tapeto, tante da consumar ‘na fabrica de scarpe.
Beh… tornando a ‘stó  nostro “Cristo”; l’è opera de’n rùstego  soldà mercenario al soldo de la Signoria e la data de “fabrica” la gà da èssar stà, apunto, intorno al periodo scaligero.
‘Stó “pitor inprovisado”, a l’ombra de le mura che serava a nord la çità, spetando de trovarse facia a facia co’ la morte, serà-su ne la toréta; un  ocio al laoro e n’altro “de guardia” a la campagna de soto, servendose de ‘n impasto de aqua e ciufi de varie erbe, l’à impiturà el Cristo Portacroçe su un muro gréso.
Finì la figura, gh’è da pensar che lu, par primo, amirando quel che l’avéa fato, el s’abia maraveià par quela so arte che fin a quel momento no’ la s’èra mai cusì manifestà.
Eco; sicuramente l’è stà questo el primo de la serie infinida de miracoli che po’ ‘stó Cristo l’à seità a snoselar ‘torno-‘torno, come i grani de’n pressioso rosario, par quasi 300 ani.
L’à resistì ai restauri dei venessiani e, ansi, la toréta ‘ndó l’èra impiturà l’è stà serà nel scrigno de ‘na ceseta fata propio in so onor; ‘na ceséta ‘torno a la qual s’à streto la confraternita dei “Flagelanti”, dita anca “dei batudi neri”, a bàtarse e a pregàr par el parmenimento dei pecati soi e del mondo.
I è stadi po’ i austriaci a cavar da le spese el tempiéto del Cristo Portacroçe, durà, paraltro, quasi 300 ani, dal 1520 al 1836.
L’imagine però l’è stà salvada e portada ne la cesa de S. Giorgio in Braida dove tut’ora la se trova e l’è possibile anca visitarla, previo apuntamento con un prete giovane e interessà, oltre a la fede, anca a la storia che ghe fa corona; don Gaetano.
I  veronesi de stó Cristo, paraltro, no i sà gnente, tanto è vero che ani fa durante ‘na visita guidada a le cése de la çità, quando drento a S. Giorgio ghe n’ò dimandà notissia al “Ciceron” (notissimo storico veronese… quel, tra le altre, che a S. Zén, davanti a la ruda “de la fortuna”; el roson del Briolotto, el g’à vù el coràio de dir che no’ se saveva ben parché i la ciamasse cusì)
me son sentì rispóndar che no’l ghe ne saveva gnente e che, de conseguensa, no’ l’esisteva. No comment!
La ceséta del Cristo la se trovava a l’interno de la cinta de S. Giorgio, fora de la porta omonima e l’è stà demolida, come che se diseva, dai cruchi, durante i lavori del 1835-1840.
Motivo: nel 1832-33 la difesa del setor de la cinta de S. Giorgio l’è risultà inadeguada e da trasformar; la cortina l’è stà cusì completamente demolida e con ela, quindi, la ceséta del Cristo impiturà co’ l’erba, colocà a l’interno.
De la cinta è stà conservà solo l’ultima tore scaligera su l’Adese, dimesà in altessa e trasformà in casamata par l’artilieria.
In finis, çerte stampe (vedi quela del Bonassuti, datada tra el 700 e l’800) le ne mostra l’antica, modesta capeléta scomparsa.
Anca nel dipinto del Vanvitelli, in ‘na bela panoramica de la Campagnola, fine XVll sec., se vede la ceséta e el so campanileto vansar-su dai merli de le mura.

Wanda Girardi Castellani