L’Angolo de la Wanda – Maggio 2004 – “Poesia vèneta a Pescantina – Storia de i 27 ani del concorso de poesia in dialeto”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Poesia vèneta a Pescantina
Storia de i 27 ani del concorso de poesia in dialeto

EI “Premio” de Pescantina l’è nato par l’idea mia, del com. Antonio Beltrami e del Presidente Bruno Sartori, nel lontan 1977.
Oltre a la session “A” rivolta ai poeti trivèneti, emo pensà de rivòlgerghe una session (la “B”) anca ai buteleti de le scole medie, ‘na inissiativa nova par quei tempi, che la g’à ‘vù sùbito un vero sucesso se se pensa che za al primo esperimento i concorenti i è stadi oltre un çentenàr.
Caraterìstica del concorso: el tema fisso che però miga sempre l’è stà ‘stesso par i grandi come par i buteleti!
EI primo proposto, in onor de la “Madonina” de la qual el Comitato promotor el porta el nome, l’è stado quel religioso e el premio el gh’è andà al veronese Albano Bertoni.
L’ano dopo emo proposto el tema “Ricordemose”; 1° premio l’è stà Federico Mimiola da Feltre.
Nel 1979: “Na persona che no’ desmentegarò mai”; 1° premio a Giuseppe Caprara da Ala de Trento.
EI tema del 1980 l’è stà: “EI mondo el ga fame”; 1° premio el l’à guadagnà Gianni Recchi da Verona. Nel 1981 con “Parlar d’amor in versi” s’à piassà a primo posto el veronese Armando Vezzelli e nel 1982 con el tema “EI bupà”, la roveretana Silvana Gottardi. Po’, nel 1983 Pietro Mantovani e nel 1984 Mario Meneghini da Schio. Nel 1985 al prima posto è rivà la trentina Lilia Slomp Ferrari. AI decennale (1986) emo riproposto el tema religioso e el premio el gh’è andà a Dario Bruni da S. Giovanni Ilarion.
Par un ano emo tirà el fià… ma l’ano dopo, nel 1988, con el tema “Saòr de la vita”, el traguardo l’è stà tajà da Emilio Gallina da Treviso.
Ano 1989: el momento de “Maria… in bianco e nero”. La medaia oferta da S. Santità el Papa, la gh’è andà ancora ‘na òlta al poeta Albano Bertoni che l’era stà el primo premià nel 1977.
E passemo al 1990, tema” Ancò i pitochi”. Premio al com. Piero Mantovani da Legnago e l’ano dopo, al 14° concorso, ancora el premio a Piero Mantovani. Nel 1992 inveçe el premio al concorso “La pace” el gh’è andà a un prete: don Giovanni Rossin da Thiene. 1993 premio a Giovanni Benaglio da S. Giovani Lupatoto. Nel 1994 su la pedana più alta è montà la roveretana Bruna Zenatti e nel 1995 la rovigota Angioletta Masiero. Nel 1996 emo premià el veronese Piero Sartori e nel 1997, al premio del ventenal, el “colega Q.C.” Gianni Sparapan da Rovigo. L’ano dopo, 1998, e pure nel 1999, el premio la se I’à portà a Cerro Veronese Nerina Poggese. E semo rivà al 2000: ripetù ancora ‘na olta el tema religioso, è stà premià co’ ‘na splèndida targa del vescovo de Verona, Grazia Binelli da Trento, mentre nel 2001 l’alloro el gh’è andà ancora a n’altro gloria veronese: Giovanni Benaglio.
Nel 2002, premio a Nedda Lonardi Sterzi del Cenacolo Veronese e nel 2003 a Diana Maimeri Lugo, altra bela voçe de poesia de casa nostra.
St’ano el tema l’è “Buteleti se nasse e se resta” (l’infansia nei ricordi personali. L’infansia che va proteta da le tante minace del mondo. EI spirito de I’infansia che ne resta drento).
A la session “B” gh’emo dà inveçe el tema: “Castèi par aria”.
La cerimonia de premiassion la se svolge sempre ne la bela ceseta de la Madonina dal caraterìstico campanileto a “sèola”, in via Madonna a Pescantina.
In finis, ogni ano, dal 1977 in qua, è stà stampà un bel volume che contien tute le poesie premiade e segnalade ne le do sessoni: quela de i grandi e quela de i buteleti.

Premio Lorenzo Calabrese

L’ormai prestigioso, “ambito premio”, dedicà a ‘na personalità de la cultura vèneta, l’è nato, in sen al premio de Pescantina, nel 1979, oferto da la prof. AIda Calabrese in memoria del marì, prof. Lorenzo Calabrese, assessor a la cultura par la provincia e primo Presidente de la giurìa del nostro concorso.
EI premio l’è costituì da una bela pergamena in argento e oro, splèndido lavoro artigianal che ogni ano rinasse da le man del nostro maestro òrafo Angelo Antoniazzi.
Tra i premiadi ilustri: el com. Toni Beltrami, el prof. Dino Coltro, el prof. Giuseppe Faccincani, el dot. Andrea Cason del SIL, el com. Piero Mantovani, el senator Paride Piasenti, Gino Cadamuro Morgante del Burchielo venessian, la Enrica Gorgeri, pres. de la Panoda de Schio, el poeta Tolo Da Re, el dot. Pier Paolo Brugnoli, el dom. Giorgio Gioco, el dot. Bartolomeo Vaona, el Presidente del premio, Bruno Sartori e… mi.

Wanda Girardi Castellani