L’Angolo de la Wanda – Maggio 2008 – “I va a messa a San Bastian…”

…a cura di Graziano M. Cobelli

gcobelli05@gmail.com

Quatro Ciàcoe: da Verona

I va a messa a San Bastian…

L’è la maniera de definìr quei che a messa no’ i ghe va mai dato che la cesa de san Bastian, in via Capèl, da tenpo sconsacrada, par çinquant’ani l’è stà un cinematografo.

Tra le cese scomparse la più importante l’è stà sicuramente quela de San Sebastiàno (confidensialmente dito Bastiàn) che fin al 1945 la g’à dado lustro a una tra le più bele e celebri strade de Verona: la via Capèl andó se trova anca la casa de Giulieta co’l só ponteseleto, calamita de i morosi de tuto el mondo!
Li, in origine fin dal 932, in grassia del lassito del diacono Dagiberto, gh’èra un oratorio con un ospedàl par i poareti e i pelegrini che in seguito po’ l’è deventà cesa parochiàl.
Çinqueçento ani dopo con decreto 8 febràr 1578 el Vescovo Agostino Valerio el g’à dà cesa e relativi possedimenti ai Padri Gesuiti. A quel tempo no’ era stà gnancora completà i laori, mancava la fassàda e altre parti parchè i gesuiti a causa de l’interdeto del Papa Paolo V contro la republica Veneta del 1606, i avea dovù ’bandonàr tuto. Provisoriamente rientradi nel 1656, nel 1774 i à alsà da novo i tachi molando, oltre la cesa, tuta la só dota de beni ne le man del demanio.
Vendua, crompada, ciapà e molada, San Bastiàn l’è finì, soto le sate de la “Santa libertà”, co l’èssar ancora ‘na òlta sconsacrada e trasformà, secondo le esigense del momento, in scola, biblioteca, sala convegni ecc.
Dopo la rivolussión francese, però, la bela cesa, capità‘ a l’ombria de le ale de l’aquila a do teste, l’è stà riconsacrada e nel 1830, in seguito al testamento de Alberto Alberini, l’architeto Giuseppe Barbieri l’à finalmente finì la fassada conpletandola con un meàl contornà da un scalìn a tuta la larghessa.
Ma San Bastiàn no’ l’èra bon de catàr pace. Ancora consacrà soto i Gesuiti, nel sfoiàr de i lunari l’è sta sconsacà e usà in diverse maniere… parfìn, dopo l’invension dei fradèi Lumiere, da cinematografo. Infati, nel 1907 l’è deventà el primo cine stabile de Verona, gestido dal bressiàn Calzoni (el stesso che el ghe n’à verto sempre a só nome, ‘n altro in via Stela). Al tempo, quando i film i era muti, a compagnàr la mimica dei protagonisti gh’èra un pianista come nei “saloon” del Far West. Al Calzoni era stà proietàdi i capolavori del tenpo: “Quo vadis?”, “I dieci comandamenti” “Cabiria” e “Maciste”
El 4 genàr 1945, un graspo de le meiara de bombe che i “liberatori” i à sgancià a ”tapeto” (e no, come che i à dichiarà, sui obietivi militari) su la nostra martire Verona l’à distrutto co’ la biblioteca civica, anca l’ex cesa lassando intiero solo el bel campanìl co’ l só Santo ancora ne la nicia.
Pena finì la guera, san Bastiàn l’è tornà par qualche ano cinematografo, ’sta òlta a l’aperto (visto che no’ ghèra più gnanca el coèrciolo). A far la “strapilografa” (insoma, a sbregàr i bilieti) i aveva assunto me cusina Wilma… cusì, fin che l’è durà in servissio, noialtri de faméia semo passà tuti a la “portoghese”.
Tuto ben fin che’l paròn no’l l’à licensià d’un boto a causa del fato che soto el so naso ‘na sera, un ladro sicuramente dotà de superpoteri, el g’avéa portà via tranquilamente do’ file de careghe!
Da quel tempo è restà el modo de dir, quando che qualchedun el va poco in cesa : “El va a messa a San Bastian”
Intanto, la soprintendenza ai monumenti rinunciando a ricostruìr la cesa l’à deciso inveçe de smontarghene la fassada neoclassica par rimontarla a conpletàr la cesa baroca de s.Nicolò. El delicato incarico l’è stà afidado a l’impresa Giuseppe Ferrari e a l’architeto Libero Cecchini. Partidi nel 1951 ‘sti laori i è stà portà in fine el 31 agosto 1954. Soltanto in tri ani… quanto ‘dèsso i ghe mete a stupàr un par de busi su ‘na strada.
La spesa: 34 milioni; come a dir “quatro palanche”!
Ma ‘ndove èla mai finida ‘sta gente onesta?? Mi digo che se ghe n’à perso el stanpo.

Desso, andó gh’èra la cesa de san Bastiàn gh’è la nova biblioteca civica comunàl… subito batesà dai soliti caustici veronesi “la Caaba” in quanto come quela celebre de la Mecca l’è nera, quadrata, sensa un pél de grassia. .
Là in cantón, el Santo miracolosamente intato e ancora incassà nel só nicia in quel scanpolo de canpanìl… par che’l diga sconsolado, col brasso rivolto a insegnàr quel cubo nero a la só sinistra: “D’ela… si o no… un pugno in te n’ocio?

Wanda Girardi Castellani