L’Angolo de la Wanda – Maggio ter 2006 – “QUANDO MORE UN POETA…”

…a cura di Graziano M. Cobelli

gcobelli05@gmail.com

Quatro Ciàcoe: da Verona

QUANDO MORE UN POETA…

“…se fa scuro
se inverna…
e strapiomba la sera.
Gente, piansì…
làgrema el cel con vù’
su la orfana tera.

Nel nùmaro sié de giugno 2004, “Quatro Ciacoe” la dava notissia de n’altra grave perdita nel mondo de la cultura veneta; el siensiato, scritór, sagista, storico, docente universitario, poeta, ideatór de la poesia cosmica e grafica e nostro carissimo amigo, prof. Ugo Sefanutti.
Ugo el n’avéa lassà el mese prima, cioè el 19 de magio de du ani fa, proprio quela matina che avea visto tornàr a uno dei me nìi  sóto la grondara la prima copia de rondenèle e me lo ricordo ben parché, come ogni ano, m’avea segnà l’avenimento sul lunario.
L’avèa conossù in ocasión de uno dei raduni del “Burchielo”, ‘na tradissión nata da la fantasia e da l’entusiasmo dei mai desmentegadi amiçi Checchi Zorzi, Arturo Bogo e &. che par tanti bei ani i à tegnù saldo el timón del “regàl legno” varà da Diego Valeri con i versi: “Che ‘stó nostro Burchielo venessiàn, el vaga piàn, el vaga san, el vaga lontàn!”
Dunque, ogni ano el simbolo el vegnéa tòlto in prèsto da una dele çità venete che in ‘stó periodo la se incaricava de organisàr in casa propia raduni e rècite naturalmente co’ i pié soto la tòla. Gh’è da dir che in Adese, a Verona, el “Burchielo” no’ l’à mai podudo atracàr. Tra i poeti veronesi, paraltro,  sempre con lu in navigassión, gh’èro anca mi con me marì e fioi e i “coleghi” Libio Da Santa Maria e Tano Pimazzoni. Fato el giro, el “natante” el rientrava in Venessia e l’èra festa granda!
L’è stà in una de quele ocasioni che m’è stà presentà el prof. Stefanutti del quàl avevo sentì tanto parlàr. La sèna l’èra quantomai “cinematografica”; el saloto, afrescado dal Tiepolo, sul Canal Grande, ne l’abitassión del Prof. Polichetti, Presidente dela Serenissima (se la memoria no’ la m’à abandonado… causa l’età). A far i onori de casa, a nome del parón, l’è stà’ alora el Prof. Stefanutti intrategnendone da pàr suo… e l’èra un conferensiér come raramente se ghe ne pól incontràr. Scoltarlo l’èra un tal piasér che se perdèa el senso del tempo e parfìn del lógo. Me lo ricordo, elegantissimo, signorile, gentilissimo e, par certi versi, a la man, tanto che quando i m’à dito ci l’èra e po’… cosa che l’èra, ghe son restà… e da quel dì, par ‘sta conossensa, quasi-quasi son montà anca in superbia.
Par documentarme un fiantìn mèio su la só opera e i só tanti meriti, in ‘sti giorni ho interogà internet sul me computer ma quando che’l m’à dà la risposta me s’à ingropà el sarvél (o… ”le sinapsi”, come l’avarìa dito “lu”) in quanto ò constatado che solo l’elenco de le só publicassioni el ciapa dó pagine fisse-fisse, par no’ parlàr de le riviste, i notissiari, le mostre, le scole ecc… fondade e coordinade da quando, nel 1951, laureado in  medissina co’ ‘na tesi su “Cossiensa morale e psicopatologia” l’à tacà a viajàr su e zo par l’Europa nei più importanti Istituti sientifici e umanistici perfessionando la só formassión e fasendo conossensa con ilustri personagi. Insoma, par elencar tuto quel che l’èra e che l’à fato, no’ bastarìa tuto un nùmaro de Q.C.!
A parte el grandissimo aporto ne le siense, nel campo de la poesia l’è stà el fondadór e el caposcola dela poesia “Cosmica” (l’omo de fronte ai ritmi de l’universo) e de la poesia grafica (le parole drento al disegno). L’è stà Presidente de importanti giurie e premi leterari; membro titolare de l’Ateneo Veneto, de l’Unión Mondiale Medici Scritori (Unesco) e de ‘n saco de altre robe importanti. De lu à parlado entusiasticamente critici, siensiati, scritori, Omeni co’ la maiuscola de tuto el mondo e voi citàrghene almanco uno; A. Tonelli che dei versi del “nostro” el dise: “Poesia proietada incontro al cel; nel futuro… con luminosità propia, quasi stelare, che pàr che la tóga dai spassi eterni ‘na forsa misteriosa che no’ g’à la tera!”
Mi g’ò avudo al “Cosmo d’oro”, un concorso da Lu organisà, la sodisfassión del premio par la poesia “Supernova”, cioè… la nassita de ‘na stela.
Tacà al muro nel me saloto g’ò un regàl  che’l prof. Stefanutti el m’à fato in ocasión de ‘na só visita a Verona, par averghe fato da “Cicerón”; l’è un só disegno de Venessia “çità dondolante” (come in n’altra lirica el l’à ciamada), con scriti sóra i versi:
“Negli spazi stellari/ emerge la marea delle gondole/attonite infittiscono le meteore/ inglobano, proteggono/la città galassia.
In biblioteca g’ò anca diversi dei só libri… e nela mente, vivo, g’ò pure el só ricordo co’ l’eterna riconossensa a la sorte par el grande privilegio de averlo conossudo e de averghe ‘vu, soratuto, a iluminàr un bon trato de la me strada, la gran luce de la só stima e de la só amicissia.

Wanda Girardi Castellani