L’Angolo de la Wanda – Marzo 1996 – “LA SPISSIARIA DE CHECHETO”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“LA SPISSIARIA DE CHECHETO”

De vece boteghe, a Verona, se ghe ne trova diverse, specie ne l’itinerario da Sant’Anastasia, via Capel, Corso Porta Borsàri, via San Fermo, via San Paolo, via XX Setenbre e Porta Vescovo, dove gh’è parfìn “El Trezza”; un fotografo che l’è stà’ forsi el primo de la çità e par fàrsene ‘n’idea, basta andar védar çerti ritrati “epoca Matìo-Cópo” esposti ancora ne le vetrinete.
Ma quela de la qual ‘dèsso se ocupemo la se cata in via San Paolo, lato sinistro andando verso el ponte de le Navi, tra un fiorar e ‘n salon de biciclete.
L’è ‘na drogheria, overo l’ultima vera “spissiarìa” e l’è lì a spiar da drìo el canton el ponte su l’Adese, dal lontan 1880.
A quei tempi se ghe vendeva prodoti coloniali ma la botega l’era anca atressà co’ ‘na torefassion de cafè, propia.
Pena drento se pol amirar un autentico cimelio: un gran pestel de fero del 1800 che’l servìva a polverisar le spessie.
Salvo el mobile de sinistra, tuto el resto l’è restà come che l’era al prinçipio: scafài, baratoli, banconi. Sul davanti de quel principal core ancora, da ‘nçima a ‘nfondo, un passaman de oton con tanto de pòmoli ai lati, che l’è tuti i me ricordi!
Da buteleta, quando con me mama se andava a crompar el cafè, la camamila, la cassia in cana, l’erbassena, la teracatù ecc…, mi ghe faséa sora el bassìsego faséndo finta de no’ védar le ocià de bruto che me tirava quel bon omo de “paron Checheto” al qual, po’, a la fine, regolarmente scrocavo un sucarin.
Come che ‘l se ciamasse veramente, no’ l’ò mai savù de preciso.
L’èra un’istitussion come Colussi par i gelati, el Trezza par le foto, Buìcio par le strasse, Melegati par i pandori, la Zocca par i gelati e el “cao-de-late”, e a casa mia, come in bona parte de le case veronesi, no’ gh’èra giorno che no’ se lo nominasse.
Ieri, dopo ‘na barca de ani, passando davanti a la vecia spissiaria m’è vegnù la voja de entrar in quel mondo fermo in un periodo sicuramente mejo de questo… cusì, co’ la scusa de crompar qualcosa e, con la più granda maravéia, me son trovà, sul serio, tuto d’un colpo, tornà ‘ndrìo de 60 ani!
Ne le vece vetrine, mai rimodernà e sempre, ancora, un poco incasinà, gh’èra in bela mostra, drento un vaso de vero, el stranbo bouquet de le nere cane de cassia con ai pié un fagotìn de ducamara. Gh’èra ancora el karkadè, sfuso nel saco, la carobola, la rigolissia dura, in toco, la “teracatù” e le çento altre robe che credéa d’èssarme desmentegà.
Vardando el passaman de oton tacà sul davanti del banco… m’è vegnù ‘na smania che no’ ve digo e, no’ podendo più farghe sora el bassisego, a scanso de far franar la baraca che, pura, l’èra riussì a sfidar incolume (oltre a quela de l’Adese del 1882) la piena del tenpo, me son contentà de caressarlo pian a pian, come che se fa co”n vecio nono, bon de contarne ancora le rosarie.
Da Checheto, mi e i mei ghe andavimo specialmente el 2 de novembre, ai morti, a crompar i lumineti parché da Checheto, anca quei, come tuto el resto, i èra a bon marcà. Po’, de ritorno da l’albergo “Ai Du Leoni” (el cimitero monumental de Verona, ciamà cusì par via dei du leoni sdravacà, un de qua e un de là, ‘nçima al scalon d’ingresso) me papà, par darghe un tàjo a la malinconia, el faséa el sbrego de pagarne el “cao-de-late” ne la lataria de la Zocca che l’èra gombio a gombio de la drogheria, andove dèsso gh’è ‘na botega de biciclete.
Ah …el “cao-de-late” de quei tenpi, come che l’era bon!
El savéa da late …de “mucca-mucca”, come che i sentensia in ‘na publicità televisiva. Ancò se ghe ciama “panamontata”; el nome el sona ben ma el gusto el me ricorda solo la ciara de ovo sbatù.
La drogheria de San Paolo i è in pochi a ricordarsela come “la spissiaria de Checheto”. Anca ela, almanco nel nome, la s’à rifato el “luc”. L’è la drogheria Emaldi e l’atual gestor l’è riussì anca a estèndar la tabela merceologica a l’erboristeria.
Adesso, se ghe cata anca robe publicisà in radio e TV ma, “diograssia” quei come mi che i vive a l’80% de ricordi e nostalgia, i pol ancora andarseghe a crompar la ducamara o la rigolissia in tòco …magari po’ contentandose (par via de la dentiera) de ciuciarle.

Wanda Girardi Castellani