L’Angolo de la Wanda – Marzo 1998 – “Le Maranteghe de Santa Toscana”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Le Maranteghe de Santa Toscana”

El dissionario etimologico, veneto-italiano, de l’amigo Dino Durante el spiega cusì el termine “maràntega”: “el vièn da “maràntola”, da l’alto tedesco “mara”= incubo, cubià a “àntola” dal venessian “pesantola” che pura vol dir incubo.
Noialtri, comunque, usemo ‘stó termine par descrivar ‘na dona bruta, vecia e pura cativa come el tòssego.
A Veroneta, ancora drénto la porta del Vescovo da la qual parte el “meiar” de san Michel, overosia: Vial Venessia; la strada che va verso Vicensa, Padova, Venessia, in ‘na bela piasseta che ogni vènare la fa marcà, se trova la ceseta de santa Toscana, dei cavalieri del santo Sepolcro; ordine gerosolomitano de Malta.
Da l’ingresso, a sinistra, gh’è la cela dove la santa l’è morta e ne ‘sta cela se trova un famoso grupo ligneo, opera de Giovanni da Zebellana (fine XlV sec). ‘Sta carateristica opera la consiste in ‘na deposission con 7 figure. De ‘ste qua, propio le “pie donne” le s’à guadagnà el titolo de “marànteghe” a causa de la so poca avenensa e i è ancora tirà in bal da le mame de ‘ste parte come un “babàu” par spaentar i buteleti quando che i fa i dìscoli.
El grupo, però, drio i laóri a la cesa, recentemente l’è andà in restauro. Na olta tornà da la casa de cura… dal 16 settembre 2006 al 14 gennaio 2007 l’è stado esposto ala mostra del Mantegna, alla Gran Guardia”…
La ceseta la se merita però ‘n’ ocià generale parché l’è ‘na bonboniera, tanto l’è bela col so arco de ingresso e col so giardineto tondo, recintà.
Lì, personalmente, son andà a farme benedir quando son tornà in circolassion dopo aver partorì. ‘Na òlta gh’èra sta discutibile usansa: quela de andar co’ la mama o ‘n’altra dona de casa, su la porta de ‘na cesa da ‘andove el prete el vegnéa a prelevarte meténdote ‘na stola benedìa sul brasso. Con tanto de mòcolo in man el te menava a l’altar de la Madona dove che avegnéa la “purificassion”… dopo de ché, tornà “neta”, te podéi ancora avicinarte ai Sacramenti. Oviamente el marì, che’l s’èra divertì sensa pagar bilieto, no’l g’avéa obligo de farse purificar.
Fóra de la ceseta, ‘na òlta in piassa (i veronesi i la ciama piassa Santa Toscana ma el so vero nome l’è piassa XVl otobre), alsè i oci sui copi; in testa al Palasso de la Meridiana gh’è el celebre “camin” dove, su la porta de’n casteleto, un armigero in parfeta armadura, el minacia ci ghe stà de soto, pronto davanti a ‘n canon!
Piassa Santa Toscana l’è celebre anca par le so vecie ostarìe ancora in servissio: l’ostaria “ai usèi”, quela “Da Morandini” ecc… dove ‘na òlta se andava a incontrar “el paste” co’ la sestèla dei “pessi duri”, dei “pearini” e de le “ofèle” e el sacheto dei numari da pescar, fidando ne la fortuna, dopo la rituale remenada.
La festa de santa Toscana la scadéa in origine al 14 de lujo e la se svolgéa quindi soto la massa del solleon. Forsi propio par questo a ci se lamentava, in inverno, de le buganse se usava dirghe: le te passarà co’ la pólvar de santa Toscana”, come a dir “col caldo de l’istà”.
Durante i festegiamenti de la Santa, molto amada dai veronesi, tra bancheti, canti, bali, sóni e foghi artificiai, gh’èra anualmente la gara del “pal de la cucagna” che riciamava i “specialisti” da ogni dove.
E ‘dèsso, do parole su la “titolare” de la bela ceseta.
Toscana, originaria da Zevio veronese, (no’ se sà ben se l’è vissù nel Xll o nel XlV sec.) l’avéa sposa un sior; Alberto dagli Occhi di Cane, ma no’ la g’à ‘vù fioi. Da Zevio l’è vegnù a vìvar a Verona, da le parte de San Nazar e qua l’à seità a far opere pie. Restà vedova, pochi giorni dopo tri lasaróni i se g’à infilà in casa co’ l’intension de ‘profitarse de ela ma i è morti tuti tri, fulminadi prima de poderla tocar. I papà de sti butèi, vedendo che no’ i tornava, i è andà a çercarli fin da la Santa dove che, vedendo quel che era sucesso i à suplicà Toscana de resussitarli al ché, Toscana, mossa a compassion, l’à pregà el Signor che’l l’à esaudida. Tornà in vita, oviamente, quei i s’à po’ convertì. Dopo ‘stó episodio la Santa la s’à trasferì ne la celeta de la cesa del santo Sepolcro, vivendo in povertà e preghiera. Un giorno però, fin che l’andava a pregar ne la cesa dei SS.Apostoli l’è stà assalì anca dai banditi che i g’à sbregà-via el mantel par dividarselo a scortelade… ma èco che par intervento divin ghe sà secà le mane. Anca lori paraltro, grassie a le preghiere dela Santa, i è tornà po’ sani e convertidi!
Dopo morta, l’à vossù èssar sepelì soto el meal de la cesa parché tuti i ghe caminasse sóra. La traslassion a l’interno l’è avegnù par ordine del Vescovo, el 14 lujo (ma qualchedùn dise el 29 setembre) del 1343 o 1344.
Infine, ne la ceseta de Santa Toscana, dove che gh’è un’acustica splendida, ogni tanto gh’è cori e concerti.

Le Marànteghe de Santa Toscana

Brute come el pecato!
‘Na pansa da pelagra
el muso sbiésso,
labri tirà e stirà come ‘na crapa.
Al lume in angonìa
de quela cèla
dai muri sfati,
le fa quasi scaresse,
la peldòca..!
e quel Cristo là in mèso
tribulado
co’ le còste che sburta par de fóra
e n’espression da mato,
fin da butina, alora,
me ricordo
el me faséa pecà …tanto pecà
che g’ò molà ‘na òlta
mèso franco
sacrificando un mese de gelato.

Wanda Girardi Castellani