L’Angolo de la Wanda – Marzo 2003 – “LA “GIORNADA” DE LA DONA”

…a cura di Graziano M. Cobelli

gcobelli05@gmail.com

Quatro Ciàcoe: da Verona

LA “GIORNADA” DE LA DONA

S’à fato de tuto, in sti ultimi ani, par trasformàr anca la giornada de la dona in ‘na sagra del consumismo e intanto ghe n’è andà quasi in desmentegón la sostansa e ‘l vero significato. In Italia s’à scominçià a celebràr ‘sta ricorensa nel 1945 par inissiativa de le done de l’UDI, de ispirassión social-comunista, che giusto l’8 marso de quel’ano le s’à riunì nela sala del Museo Visconti a Roma co’ le catoliche del Centro Italiàn Feminile, vedove de caduti, partigiane e sindacaliste, par compilàr un ordine del giorno che le à mandà pò’ a Londra dove la rapresentansa de 20 nassioni riunide a la Albert Hall l’à firmà una “carta de la dona” par el sacrossanto dirito al lavoro, a la parità de stipendio, la possibilità de rivàr ai posti diretivi e de partecipàr in tuto a la vita nassionàl e internassionàl, fianco a fianco dei òmeni. Paraltro, solo un ano dopo ‘sta giornada l’è stà celebrà con tuti i crismi e propio alora, in te ‘na riunion a Roma, è nata l’idea de mètarse indosso un fior che’l podesse caraterisàr la festa, come el garofolo rosso pa’l 1° magio. Ghe volèa dunque un fior marsolìn che, pur umile, el fusse significativo e che’l g’avesse da costàr poco; s’à dunque pensà a la mimosa che, oltretuto, la simbolegia el passagio da la morte a un stato de luce; rinassita e vitoria sul scuro! In America, el primo “Woman’s Day” el risàl al 3 magio 1908 e ‘l s’à tegnù a Chicago. Nel 1910, pò’, le socialiste americane i è partì par Copenaghen par propór anca là sta giornada internassional de la dona; ‘n afàr però che lì no’ l’à miga tacà. Invesse, Clara Zetchin, delegada del partito socialdemocratico tedesco, portandola sul só giornàl la g’à ‘vù ‘na barca de consensi, tanto che l’ano dopo, el 19 de marso la giornada l’à podù svòlgiarse. Miga tuti i paesi europei, però, i à acetà sta data, preferendo, ci el 1° magio, ci el 13 de marso, ci el 9. L’è stà pò’ la rivolussión russa à impór l’8 de marso, in ricordo de la prima manifestassión de le operaie de Pietroburgo contro el zarismo. Falsa l’è la storia che la giornada de la dona la vegna dal ricordo de le 129 operaie che in quel 8 marso del 1908 le saria morte brusà ne l’incendio de la fabrica americana ando’ le se sarìa asseralià, in siopero, par çercàr de otegnér dele condissioni de laoro più giuste. Infondà l’è anca la legenda secondo la quàl la data la ricordaria el siopero de le operaie tessili de New Jork, represso brutalmente da la polissia. Probabilmente ai inissi dei ani 50 nei nostri paesi i à sentì l’esigensa de destacàr l’8 marso da la storia sovietica. Par quel che concerne l’Italia, tuto quel che è stado otegnù da le done ghe lo dovemo ai sforsi de l’UDI. Associàr l’8 marso al martirio de le done operaie americane significava però vèrsar l’orisonte de la celebrassión a un mondo non comunista, atribuéndoghe anca, de chéla via, un caratere sacro. In quanto a la mimosa, “fior umile” che i fioristi par l’ocasióni fa rivàr co’l presso a le stele, da simbolo de la dona l’è deventà ‘n’altra maniera par far spèndar schei.

Wanda Girardi Castellani