L’Angolo de la Wanda – Marzo bis 2003 – “Nino Pozzo, el “Noschese” de i buratinài el n’à lassà ormai da vint’ani”.

…a cura di Graziano M. Cobelli

gcobelli05@gmail.com

Quatro Ciàcoe: da Verona

Nino Pozzo, el “Noschese” de i buratinài el n’à lassà ormai da vint’ani.

EI mese passà ò compagnà me neodini, Alice de 6 ani e Alessandro de 1 e meso, a un spetàcolo de buratini: “I tre porseleti”; ‘na vecia rosaria de i tempi mei. Ma a parte el frasario assè poco adato a quel tipo de pùblico, tuto l’insieme l’è stà un pianto! Ah… i è finidi i tempi de Nino Pozzo. Sparì par sempre el so bel “Teatro del mondo piccino” che ‘l divertiva e l’istruiva, oltre i butini, anca i grandi. L’era arte… l’era poesìa; ‘na merce che ancò se cata sempre più de rado.
Quando vago a farghe vìsita a me mari Nino che ‘l dorme el sono eterno arente al me primo neodin Paolo a “l’albergo ai du leoni” (cimitero), drio el sacrario de i morti in guera, me sposto po’ de pochi passi e vao a mandarghe un saludo e un baso a un altro Nino par mi importante: l’amico Nino Pozzo, el buratinar de Verona che ‘l me soride là sù dal so ovale meso sconto da un masseto de fiori de plàstica.
L’à lassà ‘sto mondo l’11 genar 1983, giusti vint’ani fa, in ‘na camareta de l’ospedal de Negrar, assistì fin a l’ùltimo da i amiçi più fedeli: el cantautor lmerio Mariotto, Paolo Zoppi, mi e el so direto colaborador, Toni Bogoni.
A quei tempi tanti i è stà i poeti veronesi, so “veci butini” che l’à cantado, tra questi Berto Rossignolo, una tra le meio voçi de la poesìa dialetal de casa nostra. Nel me caso, dedicarghe de i versi l’è stà particolarmente facile; Nino l’è stà el me più grande amigo d’infansia, ligà a un periodo belo e distante che sèguita, ano dopo ano, sempre più doloroso a tornare ciaro a la mente, tanto più quando con crudel perseveransa, la cossiensa la me bisbija amaramente che anca lu, l’ùltimo vero cantastorie de la me tera, anca lu desmentegado, no ‘l tornarà più… mai più.
L’avevo conossudo ne i ani Trenta, quando, el 13 de dicembre, a Santa Lussia, andavo co i mei a tòrme el “paco” al dopolavoro de l’ Asienda Elètrica, in viale Piave, dove me papà el lavorava.
Par coronar la festa, el cav. Nino Pozzo el ne fasea spetàcolo. E ci, tra noialtri de ‘na çerta età, no’ ricorda “Fasolin nel soteraneo col morto” con tute quele fiame da le quale saltava fora el diaoleto vestì de rosso? E po: “La pianela sperduda ne la neve”, “Barba blu”, “Sandron, re de i mamaluchi”, “Fasolin, dotor par forsa”, “Fasolin e la fata Morgana”, “Fasolin al centro de la tera” e tute le altre maraveiose storie da ‘ndove fasea capolin parfin la comedia de l’arte, la storia patria, i eroi de guera e i personagi de De Amicis.
Nino Pozzo, co’ l’avento de la television, el s’avea guadagnà el nomìgnolo de “Noschese de i buratinài” par quela so particolarità de cambiar voçe a seconda del personagio in sena. ‘Sto eclètico ator, autor, regista, musicista che, oltre a ‘verghe ‘na memoria miracolosa l’era anca colto, in gioventù l’avea fato del bon teatro e se ‘l sentiva!
Mi, da buteleta g’avevo ‘na stramba simpatìa par el buratin de la morte e apena che Nino el voltava i oci, ghe lo andavo a fregar scondendolo po soto la carega. Nino alora el vegneva a tòrselo indrìo con santa passiensa e ma papà regolarmente el me rifilava un scufioto.
Finida la guera, sicome Nino durante el ventenio, come dal resto tuti, l’avea vestì l’orbace, i l’à messo in “castigo” impèdendoghe de laorar fin a quando el prof. Bepi Faccincani (urtado anca da mi) no ‘l g’à dedicà un bel artìcolo su l’Arena, grassie al qual el Comune el g’à dado l’incàrico de intrategnar i butini ne i nassenti campi gioco; laoro che g’à frutà finalmente de che vìvar nel so apartamento-magasin a l’ùltimo pian de ‘n stàbile de via Don Massi n. 2: drio la cesa di Santa Anastasia.
Dal 1923, quando l’à scoperto de averghe la vocassion de dedicarse ai sogni de i butini, l’à scrito quasi 200 testi de sucesso deventando par noialtri fioi veronesi de quel tenpo, più conossù e amado de Topolino, de Bibì e Bibà, de Mandrake, de Cino e Franco e del sior Bonaventura. L’era un divertimento sentirlo passar dal “trombon” de l’orco, al violin de Rosaura, co’ ‘na facilità unica.
Ai so spetàcoli, sempre didàtici, pieni de insegnamenti morali e de vita, se godeva tuti: butini, mame, papà e noni.
El teatrin de Pozzo l’è stado ùnico nel so, genere. El se diferensiava da i altri in quanto el seguiva la scola del grande buratinar-poeta mantovan Francesco Campogalliani, celebre par i geniài spetàcoli. De Campogalliani, Nino l’è stà el più splèndido alievo e continuador. Dopo de lu, nissuno l’à savudo catàrghene-sù onorevolmente l’eredità.
La brava sarta che vestiva lussuosamente i personagi de Nino, l’era so mama; la fedele, colaboratrice, e quando che la gh’è morta no’ l’à mai savù catar la strada de la rassegnassion.
‘Na copia del giornaleto che portava l’intestassion del “Teatrin”, el ne informa che Nino Pozzo, la cui atività l’è stà aprovada dal Ministero de la Publica Istrussion, l’à partecipà nel 1964 a la stagion lirica “Arena de Verona”. L’è stà inoltre premià al Festival de Bologna nel 1951, a quel de Mantova nel 1966, a quel de Parma nel 1967 e a quel de Ferrara nel 1968.

Tacà al muro de l’ingresso de casa mia, gh’è l’ùltimo quadro de Nino che ‘l porta la dedica:
“A Wanda, nel ricordo di quando, bambina, assisteva giulivamente e festante allo spettacolo, come oggi, con immutato fervore. Con tanto affetto e profonda amicizia, Nino Pozzo con tutti gli attori del suo “Teatro del mondo piccino” – Verona 14 settembre 1978. Nel 55° anno di attività”.

Wanda Giradi Castellani