L’Angolo de la Wanda – Marzo 2005 – “I Alpini de Peschiera in “Palleria””
…a cura di Graziano M. Cobelli
gcobelli05@gmail.com
Quatro Ciàcoe: da Verona
I Alpini de Peschiera in “Palleria”
Ai me bei tempi ò recitado spesso ne le manifestassioni de I’Ass. Naz. Alpini de Peschiera e me ricordo in particolare quela volta che, ingarbujàndome i pie ne i cavi del palco, son cascà zo in platèa, quasi ne i brassi de ‘n general che, cavalerescamente el m’à riacompagnada sù… con un taco de manco e qualche bòta in più. Par salvarme in corner davanti al pùblico costernà ò dito: “De le tante maniere che la g’à ‘na dona de “cascar”, magari con un bel alpin, mi ò inbrocà la pèso!”
EI grupo Alpini de Peschiera del Garda l’è numeroso e straordinariamente ativo, coredà anca de ‘n coro A.N.A. tra i più conossudi e non solo nel Vèneto. Fondado ne i ani Venti, l’è restà in atività fin a la fine de la seconda guera mondial. Dopo el ’45 el s’à ricostituì da novo, forte del desiderio de ispirarse a la perenità de i “Valori Alpini”, dopo la tràgica esperiensa de la guera che tanto sangue I’èra costà a le nostre “pene nere”, su tuti i fronti, in particolar quel russo. Cusì nel 1952 eco che vien ricostituì uficialmente el Grupo Alpini de Peschiera del Garda, afilià a la session de Verona. Dificile, qua, dar anca solo un’idea de la so storia de ‘sti ani, siora de vicende, avenimenti e persone che à lassà un segno fondo ne la memoria de tuti!
Purtropo el 30 novembre 1998 un incendio doloso I’à distruto la vecia stòrica Sede. Perso el glorioso galiardeto del 1952, tuti i documenti, le fotografie, le targhe, i cimeli con tuto el resto che fasea parte de la storia del Grupo.
Ne i ani ’90 I’esigensa de ‘na nova Sede la deventa urgente. EI Grupo l’è oramai forte de 330 soci e 60 amiçi de i Alpini e gh’è bisogno de spassio, cusì ne I’autuno del 1997 è scominçià la ricostrussion drio ai disegni originài austriaci; testimoniansa de I’orìgine de la “Palleria”… e de la grande volontà de i alpini de rivar a ‘sta difìcile e ambissiosa mèta. L’ano de I’inaugurassion de la nova Sede, ricavà ne la “Palleria” del Parco Catullo l’è stà el 2000; 30 setembre-1° otobre, in concomitansa con el XV aniversario de la fondassion del Coro A.N.A. de Peschiera. Ma cosa èla ‘sta “Palleria”? Dopo l’assedio del 1848, el Genio austriaco I’à scominçià el studio del ridimensionamento generale de le struture militari de Peschiera.
A completamento po’ del novo pian urbanìstico in prossimità del ponte de i Voltoni e de fronte a la caserma de artilierìa , i à tirà sù un fabricato liniar e frontal a uso “palleria”. L’òpera rivà ai nostri tempi in condission disastrose la ghè stà dà in concession trentenal dal Comune de Peschiera al Grupo Alpini che el l’à ripristinà come so Sede, del Coro Alpin e de la Protession Civile de l’ A.N.A.
Beh… se ve catè a passàr da Peschiera del Garda, dopo n’ocià al “Vial dei Alpini” (anca questo òpera del Grupo) e n’altra al bel monumento inaugurà nel 1987, ‘pena passà la porta, dopo el ponte, andè a farghe vìsita ai nostri amiçi: vedarì che i sarà sempre pronti a ofrirve un bon goto de vin, condì con la proverbial alegrìa de le nostre “pene nerè”.
Ringrassio par l’aiuto e l’ospitalità el presidente Luciano Gianello
Peschiera del Garda
Peschiera del Garda, la romana Arilica, la g’à ‘vù longhe vicende militari. Nel 1207 la vedemo rifugio de i Monticoli, po’ persa e riciapà da Ezzelino. Riconquistà da i Vèneti nel 1516, ‘sti qua i I’à trasformà in ‘na fortessa e a disegnar le so mure grandiose g’à pensà, no’ se sa ben se ‘l Sanmicheli o Guidobaldo da Urbino, fra el 1553 e ‘l ’56.
A le fortificassioni vènete i ghe n’à zontà altre Napoleon e i austriaci, tanto che la citadela l’è quasi tuta ocupà da le caserme e altri istituti militari, compreso el tristemente cèlebre carcere, e solo su la destra del Mincio gh’è abitassioni civili. Peschiera la gà tre cese tra le quali la parochiale del sèc. XVIII co’ ‘n’importante “deposission” del sèc. XVI.
EI più interessante però l’è el santuario de la Madona del Frassino, tegnù da i Frati Minori, che ‘l gà ‘vù orìgine da ‘n’imàgine miracolosa catà su un fràssino durante la guera de Cambrai. La cesa l’è del XVI sèc. e la gà quatro tra i mèjo quadri de Paolo Farinati.
Ne i scavi del porto, inoltre, è stà fato importanti scoperte de ogeti preistòrici, vegnù da le palafite che gh’èra anticamente a I’imboco del Mincio.
Wanda Girardi Castellani
