L’Angolo de la Wanda – Marzo 2008 – “SAN LORENSO, la più romantica tra le cese veronesi”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“SAN LORENSO, la più romantica tra le cese veronesi”

Dopo averghe dà ‘na sfregoladina a la piera igrometro de la cesa de San Giovanni in Foro (vedi Q.C. genàr 1996) e dopo aver passà la porta “dei Borsari”, o “de Giove”, se infila el corso Cavour (la romana via Postumia) che, da ‘sta porta el và, drito sbarado, fin a Castelvecio, lassandose a la destra l’arco dei Gavi, interessantissimo e del quàl parlaremo in seguito… El Corso l’è uno tra i più bei de Verona, siór de palassi splendidi de storia e de ornamenti (vedi palasso Canossa, residensa de la Santa Madalena).
De Cese, inveçe, ghe n’è dó: quela dei SS. Aspostoli (nela piassa omonima) sula sinistra e quela de San Lorenso, a destra, argomento del presente articolo.
Del tuto ristruturada dopo el disastroso teramoto del 1117, con in più la zonta del bel transeto, dei celebri “matronei” e de le tóri (una de le quale la g’à al só interno la scala che portava le done a assìstar le funsioni dai sudeti matronei), l’è un vero e propio gioièl romanico tanto che nel 1184 Papa Lucio lll vegnù a Verona a tegnerghe el concilio el g’à concesso i stessi privilegi de la basilica costantiniana de S.Lorenso al Varano, in Roma.
La Basilica, probabilmente de epoca zenoniana (sec.IV) se la trova nominà nel Ritmo Pipiniano e anca ne l’epitafio a l’Arcidiacono Pacifico (sec.VIII). Se ritién che la sia stà’ edificada sóra un tempio dedicado a Venere, in seguito al decreto de Costantino del 325 che proibiva i culti pagani. Ma bisogna rivàr a l’8° sec. par ‘vérghe notissie sicure. Se sà che la ricostrussión (dopo el teramoto) de ‘sta splendida cesa l’è stà fata da Pacifico, senonché qualche ano dopo g’à pensà un più grave sisma a dàrghe ‘n’altra disastrosa scòpola.
La ricostrussión atuàl l’è de l’ing. Da Lisca.
Se entra nela nostra Basilica passando soto l’elegante portàl de marmo greco gotico (sec.XV) – gotico ne l’arco ben ornado nela parte de sóra dove spica la statua del Santo che in origine el tegneva co’ la sinistra la gradela del só martirio e co’ la destra la palma; sinbolo del medesimo. Parlando dei du antichi ogeti in fero batudo, ò usà el verbo al “passato” in quanto ani fa un fulmine el l’à sbregà da le man del Santo scaraventandoli a tera. Ritiradi po’ da la Sovrintendensa, no’ i è, a tut’ora, più ritornadi al so posto.
Donca… ’péna drento se se cata in un romantico sagrà dove spica la vera de’n posso ornà da ‘na stema vescovile del “400”. L’ingresso al tempio fin a qualche ano fa l’è stà solo su quel fianco. Inveçe adèsso voltando a sinistra se se trova ai pié de la fassada perfetamente orientà secondo l’andamento stradale dela Verona romana. Ornà da dú massissi torioni scalari cilindrici de stile normanno (uno dei quai el g’à el so interno la scala che portava le done al matroneo) a corsi alternadi de tufo e de coto, che ricorda el severo monastero del film “El nome de la rosa”, serà e sacrificà in epoche sucessive da altre costrussioni, ‘dèsso l’è finalmente godibile
Dentro, al palido ciarór de le candele, qua e la se inpissa afreschi de Paolo Farinati, del Cignaroli e de Sante Prunati. Al centro, l’altàr de l’Adolorada co’ la pietà lignea, opera de Lancetti romano.
Belissimo el giardineto da ‘ndove spunta tochi de antiche colone! Li specialmente, gh’è de che consumàr el botón de la machina fotografica .
Nel tempio però se ghe entra da l’ingresso lateràl (i turisti i paga un modesto bilieto), apena drento l’arco sormontà, come emo dito, da la statua de San Lorenso
La basilica l’è a tre navade con traseto. Sóra e longo i fianchi, córe el soracitado “matroneo”. Gh’è da dìr, ahimè, che un altàr baròco el rovina un pochéto el magico efèto e la severità del complesso.
Tre le navade serà da altretante absidi, ale quale se ghe ne zonta dó sistemà nei du brassi del transeto. Magica la visión dele çinque absidi tute col ‘stesso orientamento.
La navada magiore iluminà dal rosón de la fassada la sveta sora pilastri cruçiformi che, in alternansa de coto e de tufo, i finisse in arcade a sostegno de l’alta copertura a capana. Al centro de l’abside (A) sora l’altar de marmo serà drento ‘na balaustra (XVIII sec.) la pala de Domenico Brusasorzi (1562) la rafigura la Madona col butìn coi Santi Lorenzo, Agostino, e Giovanni Battista. Altri capolavori: un’opera de Girolamo Benaglio, un grande S.Cristoforo romanico, du affreschi de Nicolò Giolfino (1534), el batesimo de Gesù e un Davide musico. Bela anca la statua de marmo de Carrara de Maddalena de Canossa, opera recente del scultór Finotti (1991), e la pala del Fracasso coi Santi Antonio e Luigi (inissio sec.XIX).
San Lorenso, in Corso cavour, la resta comunque una tra le più romantiche cese de Verona, andove, spece par noialtre done l’è facile sognàr a oci vèrti ‘na vesta bianca tra i fiori de naransa, arènte a “l’ideàl”… quél che de sòlito “no’l và a l’altàr”.

Wanda Girardi Castellani