L’Angolo de la Wanda – Marzo 2012 – “Le maestre”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Le maestre

Go senpre avù na gran simpatìa e un profondo rispeto par le maestre de le elementari, par via de la so passiensa nel çercar de métarghe ne la suca i primi rudimenti de la sapiensa a buteleti che, a i tenpi mei, i entrava in prima classe digiuni de tuto, gnanca boni de tegner in man un lapis. Quante aste che faséimo! I primi giorni se macava de forsa co’ la matita fin a sbusar la pagina e a rónparghe regolarmente la ponta. Noialtri “Remigini” (i ne ciamava cusì in onor de S. Remigio, festegià el primo de otobre, giorno de l’inissio de l’ano scolastico) gavéimo tuti el gronbial: par le butelete l’èra bianco e guarnì de ’na càpola rosa, par i mas-ci nero e con la càpola azura. L’aula l’èra fornì de banchi con el calamar par l’inchiostro infilà in un buso e ’na pena de legno armà de un penin generalmente fato a forma de frecia o de manina serà co’ l’ìndice in alto. A ’sto proposito, un conpagno de classe el ga ’vù la bela pensada de métarghe intorno al calamar un astico e con questo, tirado al massimo, el faséa l’arpa. Plin… plon… e el calamar l’è sbalsà fora, udando l’inchiostro su la càpola nova de bala! Beh, seremo sta parèndesi e ’ndemo avanti col discorso.
La roba più inportante in fila co’ la càtedra, l’era la lavagna con i so gesseti e i cancelini de fustagno. De drio a ’sta lavagna la me maestra la me ga confinà de spesso. ’Na olta parfìn tuta la matina… ma l’avéa fata grossa. Quando i n’à fato inparar la poesia “5 Magio”, ossìa la morte de Napoleon, scrita da Alessandro Manzoni, mi che anca a quela età “versegiavo” (più che altro recitavo i versi de me papà) me son fata pescar a declamar ne l’ora de ricreassion: “ei fu sicome inmobile sentado sul bocal che l’aspetava inpavido la scarica fatal.”
Mi e me cusina Wilma, coetanee, èrimo sempre insieme nel stesso banco e sicome me la cavavo mèjo de ela, de solito la me copiava a la grande. Quando che ò scrito: “Mio papà è troppo piccolo per la sua età”… ela, subito: “Mio papà è troppo grande per la sua età.”
La me maestra l’èra rissa e rotondeta. La se ciamava Eugenia e quando nel 1939 i à fato Papa el principe Eugenio Pacelli (Pio Xll), son andà a contar in giro che l’èra el fradel de la me maestra dato che ’l se ciamava Eugenio anca lu. La scola l’èra ’na roba seria e i maestri i era severi. I castighi (el capel da musso co’ le recione, bachetade su le mane e scufioti sul copin) i era aprovà da i genitori che a le zìnsole fiocade in classe i ghe zontava le sue.
Personalmente go de le elementari de i ricordi bei e spesso alegri come el pò-pò de carneval ch’è vegnù fora quando che go dito a la maestra che mi savevo chi èra stado a inventar el leto. La dimanda ghe l’avéo fata a me papà che, ocupà a far un laoro de quei che fa tirar le òstreghe, el m’avéa risposto, tanto parché tasa, “George Stephenson”. Naturalmente quando ò trasferì la risposta in classe la maestra la m’à incaricà de dirghe a me papà che Stephenson l’avéa inventà la locomotiva e no’ el leto. Dopo ‘na tal figura de ciocolata, el me vecio l’à pensà seriamente de andar fora sconto da ’na mascarina! N’altra olta incontràndolo la me maestra la ga dito: “El me parmeta de strénsarghe la man a un eroe!” El fato l’èra che, piena de fantasìa come el me concitadin Salgari, inventavo su me papà maravejose aventure.
Da alora el mondo l’è cambià, tanto che i buteleti de prima (6 ani) no’ i ga çerto bisogno de tacar co’ le aste: i trapela zà col computer e i va in volta col celulare.
Me nuora Analisa che la fa la maestra oramai da ’na vita, la me conta che parfin i scolareti stranieri inseridi ne le classi de i nostri in pochi mesi i se mete a la pari con i autoctoni. Bisogna però tegner presente che me nuora l’è ’na maestra speciale come ghe n’è poche!
Naturalmente qualche perla giaponese la vien ancora a gala anca tra i soi. ’Na olta la ga dà par còmpito da far un pesierìn con la parola “restìo” e tra le altre “perle” è vegnù a gala questa: “Ieri sera è vegnù a catarne me noni e me papà el ga dito – Restìo a çena?–” La setimana passà i scolareti de me nuora, che st’ano l’è ripartì da la prima, i doveva far un “disegneto” par ogni létera de l’alfabeto… un’ape par la “A”, un bicer par la “B”, un can par la “C”, ecc. Rivà a la “T” i à deciso de disegnar un tón: la magior parte i à disegnà un pesseto che nòda ne l’aqua… uno ’na strana roba tonda. A la richiesta de spiegassioni è vegnù fòra che l’aveva disegnà: ’na scatoleta, apunto, de tón.
Anca le maestre, comunque, le pol sbaliar: per esempio una (che la vegneva da la Sicilia), lesèndo in un tema “ieri siamo andati a fare una passeggiata sul Carega”, l’à cancelà “carega”, la ga messo al so posto “sedia” e l’à tacà un bruto voto!
Par conclùdar… voi citar ’na frase sotolinià in rosso trata da un conponimento de un me cusin, in quarta: “La piassa inpienida de popolo mandava potenti stramassi!”

Wanda Girardi Castellani