L’Angolo de la Wanda – Marzo 2014 – “Zughi de na olta”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Zughi de na olta
Eco oncora altri zughi che se faséa quando èrene buteleti

LE PICE: par ’sto zugo ocoreva un sacheto de marmorine (de tera cota) e qualche pición (de véro colorà), ’na buseta, fata co ’l taco ne la tera, ocio e ’na bona esperiensa in fato de frignòcole.
Ma co’ le pice se podéa far altri zughi, come, par esenpio,

A COTI: se dovéa tirar a turno ognuno ne la so buseta e quando che se sbaliava se metéa un sasseto; chi ghe l’avéa piena avéa perso.

LA PÉTA o la péga (zugo, anca questo, vecio de secoli): serviva un gesseto o un bastonçìn par disegnar in tera “case” (che i èra: tre par parte e una in testa) e la “péta”, overo un tòco de piastrela o un sasso piatto da tirar e po’ da urtar co ’l pié par pararla avanti. “Am-salam… am-codeghin…” (’na roba che no’ la gavéa gnente a che far con Maometo): se zugava, saltando su un pié solo (ma ci èlo che no se lo ricorda?).

LE BELE STATUINE (una la “piava” e quando che la se voltava de scato quela che no’ s’avéa messa in posa la pagava pegno. “Le bele statuine / d’oro e d’argento / che vale çinqueçento /che val la corona de ’n re / un-due-trè… chi no’ scapa c’è.”

FASSOLETO: se lo zugava a squadre. Se i zugadori i èra 10, se dovéa métarse çinque par parte e ogni zugador el gavéa un nùmaro da 1 a 5; se segnava col gesso tre righe: una centrale par el fassoleto e dó par le squadre a 5-6 metri: ci tegneva (in centro) el fassoleto, a brasso tirà, el ciamava un nùmaro e subito partiva a çercar de ciaparlo e portàrselo a la “base” i du del stesso nùmaro. Vinséa la squadra che gavéa più puntegio.

STREGA, COMANDA COLOR: la buteleta in mèso la diséa: “Strega, comanda color” e el grupo el rispondéa: “che color?” Se la “strega” la diséa (per esenpio) viola, tute le dovéa andar in çerca de qualcosa de viola e quela che la trovava l’èra salva mentre le altre le pagava pegno.

A CADENA: se lo zugava tegnéndose par man e l’ultima de la cadena la le postava al muro. Tute, partendo da la prima, le passava soto al brasso de l’ultima (es. la Luisa), cantando: “povera Luisa legata a le catene, soto le pene ghe tocarà morir” e questa l’èra ligà. Po’ se ricominciava… fin a la prima.

Wanda Girardi Castellani