L’Angolo de la Wanda – Marzo 2016 – “Complicà come ’na Pasqua!”
…a cura di Graziano M. Cobelli
gcobelli05@gmail.com
Quatro Ciàcoe: da Verona
Complicà come ’na Pasqua!
Qualche giorno fa m’era vegnù la curiosità de saver come mai el giorno de Pasqua par i cristiani ortodossi el coincide raramente col nostro. Alora ghe l’ò domandà a me fiol Mirco e la spiegassion che el m’à dà l’è stà così interessante che ò sentì la voja de giràrvela.
Dunque, come çerto savarì, la festa de Pasqua l’avemo eredità da i Ebrei, cambiàndoghe el significato (par lori l’è la liberassion da l’Egitto, par noialtri la ressurresion de Cristo), ma non el modo de posissionarla nel calendario. Infati i Ebrei i le festegia el giorno 14 del mese de Nisan… e fin qua sarìa semplice se no ’l fusse che i mesi ebraici i è ligà a la luna: ogni luna nòva inissia un mese novo, a metà mese (ricordémose che el ciclo lunare el dura 28 giorni) ghè la luna piena e con n’altra note sensa luna se passa al mese dopo. Visto che però così se se sfasarìa co’ le stagioni, ogni tanto vien inserì un mese in più par far tornar i conti col sol… anca parché, par esenpio, Nisan el deve cascar in primavera. Quando el concilio de Nicea nel 325 l’à fissà la Pasqua cristiana, l’à tradoto giustamente l’ebraico “14 Nisan” come el “primo plenilunio de primavera”… però visto che la nostra Pasqua la ga da èssar par forsa ’na Domìnica, el Concilio l’à precisà che la sia la “prima Domìnica dopo el primo plenilunio de primavera” (par ci no le savesse, la primavera la scominçia con l’equinossio del 21 Marzo).
Così avemo festegià la Pasqua tuti insieme fin al 1500, quando grassie a i calcoli più precisi de i astronomi se s’à acorti che ghèra stà un problema. Dovì saver che fin da i tempi de i antichi romani el calendario che se usava l’era quel Giuliano: nel 46 a.C. Giulio Cesare, savendo che l’ano l’è longo 365 giorni e un quarto, l’à stabilì che ogni quatro ani bisognasse inserirghe un giorno in più (el nostro 29 Febraro) par tégnar conto de i ‘roti’. Ma l’ano no l’è mia “proprio” 365 giorni e un quarto ‘tondo’… l’è un pochetin de più: solo 9 minuti, che però, acumulàndose de ano in ano, par la belessa de 1.500 ani, messi insieme i era ormai deventà diese giorni. Voléa dir che el vero equinossio de primavera (che l’è quando el giorno l’è longo come la note e l’è facile da misurar) no el cascava più el 21 Marso ma diese giorni prima e che perciò anca quando se calcolava la Pasqua se la calcolava sbalià.
Fato sta che nel 1582 el Papa Gregorio XIII (da li el nome de calendario gregoriano) l’à stabilì che par quel’ano el giorno dopo el 4 de Otobre no el sarìa stà el 5 ma el 15. Par no conplicar massa le robe, è stà stabilì però de continuar con la setimana: visto che el 5 l’era un giovedì, el 15 el sarìa stà un Venerdì. Tuti i giorni che va dal 5 al 14 Otobre 1582 i è stà così saltà a piè pari, no i è mai esistidi e mai i esistarà. Provè a pensar cosa vol dir métar avanti l’orolojo de n’ora e pensè cosa l’è stà métar avanti el calendario de ben diese giorni. E miga tuti insieme: se i Paesi catòlici i è stà ’bastansa rapidi, altretanto no se pol dir par i altri… parlemo de quei protestanti (che i detestava el Papa) e de quei non cristiani, tipo Cina, India, Paesi arabi, ecc.
Comunque un po’ a la volta tuti i à dovù uniformarse al novo calendario. Tra i ultimi ghè stà i russi… Eco parché la “Rivoluzione d’Ottobre” par noialtri l’è stà in Novembre: i zar i doparava ancora el calendario giuliano. Comunque anca i russi dopo la rivolussion i s’à uniformà. Ultima la resta la Cesa Ortodossa, che, no avendo mai volù acetar n’inposission del Papa, la continua ancora ’desso a calcolar le so feste col calendario giuliano. Cusì anca se Russi, Rumeni e Greci i festegia el Nadal el 25 Dicembre, noialtri i vedemo far festa in Genar: gavemo el calendario 10 giorni più avanti. Ovio che se parla solo del calendario “liturgico”, quel che se dòpara par ciapar ’n aereo l’è stesso par tuti. La Pasqua la resta un caso a parte: visto che l’è ligà a la luna (el plenilunio l’è plenilunio par tuti) pol sucédar che anca partendo da ’na data un po’ diversa se riva a la stessa Domìnica (ricordemo che la setimana no l’è mia stà canbià: se l’è Domìnica a Roma, l’è Domìnica anca a Mosca). Par esenpio el 15 Aprile 2001, l’11 Aprile 2004, l’8 Aprile 2007, el 4 Aprile 2010 e el 20 Aprile 2014 s’à fato tuti festa insieme. Par la prossima volta se dovarà spetar el 16 Aprile 2017: ricordèvelo se gavì amici ortodossi!
Wanda Girardi Castellani
Mirco Castellani
